Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> ہندوستانی ٹیم دی ملکی میڈیا وچ نکھیدی

ہندوستانی ٹیم دی ملکی میڈیا وچ نکھیدی

وچار ڈیسک
February 28th, 2011

کرکٹ دا ایہہ عالمی کپ جتڻ لئی فیورٹ سمجھی جاڻ والی ہندوستانی ٹیم اتوار نوں انگلینڈ توں نہیں جت سکی تے ہُڻ ایسے پاروں ملکی میڈیا تے عوام اوہدی نکھیدی کر رہی ہے۔

ہندوستانی ٹیم نال کئی آساں لائیاں گئیاں نیں۔ ایہدے توں الٹ انگلینڈ دے خلاف 338 دوڑاں بڻا کے وی جتڻ وچ ناکام رہڻ تے ہندوستانی کھڈاریاں دی بڑی شامت آئی ہوئی ہے۔ اتوار نوں کھیڈے گئے اک سوادی مقابلے دے مگروں انگلینڈ نے ہندوستانی ٹیم دے جت دے سفنے نوں چکنا چور کر کے پنجاہ اووراں وچ 338 ہی دوڑاں بڻائیاں۔

ہندوستانی میڈیا قومی ٹیم لئی ایس نتیجے نوں اک انتہائی سنیہے دے طور تے پیش کر رہیا ہے۔ ہندوستانی ٹیم وچ باؤلنگ تے فیلڈنگ دے شعبیاں وچ ظاہر ہوڻ والیاں کمزوریاں نوں اُچیچا نشانہ بڻایا جا رہیا ہے۔

دی میل ناں دے انگریزی اخبار نے لکھیا ہے ' ٹاپ ریٹڈ ہندوستان نوں انگلینڈ نے ویک اپ کال دتی ہے'۔ اخبار نے ہندوستانی گیند بازاں ولوں انگلینڈ دے مڈھلے بلے بازاں نوں چھیتی آؤٹ نہ کرن دے سلسلے وچ بالرز دیاں خوبیاں تے سوالیہ نشان چکے نیں۔

دی ہندوستان ٹائمز نے سوال چکیا ہے پئی ' کیہ اُکا دوڑاں دا ڈگ ورلڈکپ جتڻ دا ضامن ہو سکدا ہے ؟'' دی ٹائمز آف انڈیا نے ہندوستانی باؤلنگ لائن نوں بہت کمزور متھ دتا ہے۔ 'ساڈی ٹیم کسے وی سکور دے دفاع دی خوبی توں ویہلی نظر آؤندی ہے، پر چنگی گل ایہہ ہے جو ساڈیاں کمزوریاں مڈھلے مرحلے وچ ہی ظاہر ہو گئیاں نیں۔''

دوجے پاسے انگلش ٹیم دے آگو اینڈریو سٹراس، جیہناں نے ہندوستان دے خلاف اک سو اٹھونجاہ دوڑاں دی شاندار اننگز کھیڈی، پچھلے دیہاڑے دے معرکے تے خوشی دا وکھالا کیتا ہے۔ '' ایس ٹورنامنٹ وچ سب تے ایہہ کھل گیا ہے جو اسیں اک انج دی طاقت آں، جیہنوں منڻا پوے گا۔' سٹراس ہی ایس میچ دے سب توں چنگے کھڈاری منے گئے سی۔

اوہناں دے مخالف ہندوستانی کپتان مہیندرا سنگھ دھونی میچ دے نتیجے توں خوش نہیں پر آپڻے فاسٹ بالر ظہیر خان دی کارکردگی توں راضی نیں۔

ظہیر نے چھیکڑلے لمحیاں وچ چھ گینداں تے اک سکور دے کے تن انگلش بلے بازاں نوں ٹھکاڻے لایا۔ اوہناں وچ سٹراس توں اڈ 69 دوڑاں بناؤڻ والے ایان بیل وی رلتی سی۔ ایس توں پہلوں اک اہم موقعے تے یوراج سنگھ دی باؤلنگ تے ایان بیل دے ایل بی ڈبلیو آؤٹ ہوڻ دی اپیل رد کر دتی گئی سی۔ دھونی نے ایس فیصلے تے وی ہرکھ ظاہر کیتا۔

پچھلے دیہاڑے دے مقابلے دی اک ہور اُچیچی گل ریکارڈ ساز سچن تندولکر دی سنچری رہی۔ اوہ عالمی کپ دے مقابلیاں وچ پنج سنچریاں بناؤڻ والے اکلے کھڈاری بڻ گئے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels