Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> کرکٹ ورلڈ کپ کوڻ جتے گا؟

کرکٹ ورلڈ کپ کوڻ جتے گا؟

وچار ڈیسک
February 17th, 2011

پٹھی گڻتی شروع ہو گئی ہے تے عالمی کپ شروع ہوڻ وچ کجھ ہی دن رہ گئے نیں۔ گذریل پاکستانی کپتان عمران خان موجب سری لنکا تے ہندوستان فیورٹ ٹیماں نیں جدوں کہ ورلڈ کپ پاکستان وی جت سکدا ہے۔

لگاتار تن واری دا چیمپیئن آسٹریلیا پچھلے 27 عالمی کپ میچاں وچ نہیں ہریا پر ٹورنامنٹ شروع ہوڻ توں دو ہفتے پہلوں مائیکل ہسی تے اسپنر نیتھن ہورز دا پھٹڑ ہو کے ٹیم توں باہر ہوڻا آسٹریلیا لئی 440 وولٹ دے جھٹکے توں گھٹ نہیں۔ آسٹریلوی خوبیاں نوں سلاہون والے عمران خان موجب وی آسٹریلیا دے جت دیاں موجاں مانڻ دے دیہاڑے ہڻ مکڻ والے نیں۔

عمران نے دسیا جو آسٹریلیا نوں ہراؤڻ دا ایہہ سب توں چنگا موقع ہے کیوں جو ایہہ 1987 دے مگروں عالمی کپ کھیڈڻ والی آسٹریلیا دی سب توں ماڑی ٹیم ہے۔

سنہ 1975 تے 1979 دے پہلے دو ورلڈ کپ وچ پاکستان دی اگوائی کرن والے آصف اقبال دا کہڻا ہے جو 2011 وچ کامیابی دا قرعہ کسے دے ناں وی نکل سکدا ہے۔ آصف اقبال نے دسیا پئی ایہہ ٹورنامنٹ اوپن ہے تے ہڻ پچھوکڑ وانگوں آسٹریلیا دی ٹیم جت دی دعویدار نہیں رہی۔ پاکستانی ٹیم دے کول وی اونا ہی موقع ہے، جنا ہندوستان یاں کسے دوجی ٹیم دے کول۔

آصف اقبال موجب ہندوستان، پاکستان تے سری لنکا دیاں ٹیماں تے دوجیاں توں بہتا دبا ہووے گا پر اوہی ٹیم جتے گی جیہڑی دبا نوں چنگا سہہ لوے گی۔

ایشین بریڈ مین ظہیر عباس موجب ہندوستان، دکھڻی افریقہ، آسٹریلیا تے انگلینڈ دیاں ٹیماں ایس واری سیمی فائنل وچ اپڑ جاڻ گئیاں۔ ظہیر نے دسیا پئی پاکستان دی ٹیم جے سیمی فائنل تیکر اپڑی تے اوہ ایس ٹیم دا کارنامہ ہووے گا۔

فیورٹس دی بحث وچ، دنیا وچ سب توں بہتا چھ ورلڈ کپ کھیڈڻ والے جاوید میانداد دی رائے ظہیر عباس توں بہت وکھری ہے۔ جاوید میانداد نے دسیا پچھوکڑ وچ کدی وی کوئی فیورٹ ٹیم ورلڈ کپ نہیں جتی۔ ون ڈے وچ پیشگوئی نہیں کیتی جا سکدی۔

پاکستان ولوں ورلڈ کپ مقابلیاں وچ سب توں بہتیاں تن سنچریاں اسکور کرن والے گذریل کپتان رمیز راجہ اسپاٹ فکسنگ وچ تن وڈے کرکٹراں دے بناء وی ورلڈ کپ کھیڈڻ والی پاکستانی ٹیم نوں اکھوں پروکھے کرن نوں تیار نہیں۔ رمیز موجب 1992ء وچ وی کوئی پاکستان دا ناں نہیں لے رہیا سی پر اسیں جت گئے۔ ایس واری وی جے شاہد آفریدی نے وسیلیاں نوں چنگا ورتیا تے پاکستان فیر توں تاریخ لکھ سکدا ہے۔ ایہہ ٹیم ٹیلنٹ دے حساب نال 1992 دی ٹیم توں کِتے ودھ چنگی تے ذہنی طور تے مضبوط ہے۔ رمیز راجہ دے خیال وچ سب توں بہتا دبا ہندوستان دی ٹیم تے ہووے گا۔

ورلڈ کپ وچ کوئی وی کسے ٹیم دی کامیابی دی ضمانت دیڻ نوں تیار نہیں ہے پر برصغیر دے تیراں شہراں وچ اگلے 45 دن بھلک دے چیمپیئن دے نال آپوں ون ڈے کرکٹ دے بھلک دا فیصلہ کرن لئی بہت اہم ہوڻ گے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels