Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> ورلڈ کپ: کرکٹراں لئی پیسہ ہی پیسہ

ورلڈ کپ: کرکٹراں لئی پیسہ ہی پیسہ

وچار ڈیسک
February 16th, 2011

18 فروری توں لے کے 2 اپریل تیکر کھیڈے جاڻ والے کرکٹ ورلڈ کپ وچ رلتی ٹیماں تے کھڈاریاں لئی ایس واری 8 ملین ڈالر دے ریکارڈ انعام رکھے گئے نیں۔ 2007 دے کیریبین ورلڈ کپ دے مقابلے وچ ایہہ رقم 3 ملین ڈالر بہتی ہے۔

پہلا ورلڈ کپ سنہ 1975 وچ انگلینڈ وچ کھیڈیا گیا سی جیہدے وچ 8 ٹیماں نے حصہ لیا سی۔ صرف پنج دن جاری رہڻ والے اوس ورلڈ کپ وچ پندراں میچ کھیڈے گئے سی۔ ایہہ پہلا ورلڈ کپ کلائیو لائیڈ دی ویسٹ انڈین ٹیم نے جتیا سی تے انعام دے طور تے اوس ٹیم نوں چار ہزار پاؤنڈ دتے گئے سی۔ چار سال توں مگروں جدوں ایسے ٹیم نے فیر ایہہ آدر پایا تے انعامی رقم ودھا کے 10 ہزار پاؤنڈ کر دتی گئی سی۔

جدوں آسٹریلوی ٹیم نے2007 وچ کیریبین وچ کھیڈے جاڻ والے ورلڈ کپ وچ مسلسل تیجی واری ایہہ آدر پایا تے اوہنوں 2.2 ملین ڈالر دے انعام دتے گئے جدوں کہ فائنل وچ ہارڻ والی ٹیم سری لنکا نوں اُکا 1.5 ملین ڈالر دتے گئے۔ 1999 وچ انگلینڈ وچ رکھے گئے ورلڈ کپ دے مقابلے وچ ایس واری انعاماں دی کل مالیت پنج گڻا بہتی بڻدی ہے۔

30 ہزار ڈالر دی وادھو رقم اوہناں ٹیماں لئی رکھی گئی ہے جیہڑیاں آپڻا آپڻا پہلے راؤنڈ دا میچ جتڻ گیاں۔ ورلڈ چیمپیئن ٹیم نوں ہور اک لکھ 80 ہزار ڈالر ملڻ گے ایس شرط تے پئی اوہ آپڻے سارے چھ مڈھلے میچ جت لوے۔

سیمی فائنل میچاں وچ ہار جاڻ والیاں دو ٹیماں نوں پنج پنج لکھ ڈالر ملڻ گے جدوں کہ کوارٹر فائنل دے مرحلے وچ ہارڻ والیاں ٹیماں وچوں ہر اک دے حصے وچ ڈھائی ڈھائی لکھ ڈالر آؤڻ گے۔ انعامی رقم وچ اوہ رقم رلتی نہیں ہے، جیہڑی بین الاقوامی کرکٹ کونسل ICC آپڻے منافعے وچوں اوہناں 14 ٹیماں نوں دیوے گی جیہڑیاں ایس ورلڈ کپ وچ حصہ لے رہیاں نیں۔

ICC نوں ایس ٹورنامنٹ توں ہون والی متوقع آمدڻ نوں ویکھدیاں ہوئیاں 2011 دے ورلڈ کپ لئی رکھیاں گئیاں ریکارڈ انعامی رقماں بہت حیرانی دا کارن نہیں ہے۔ چھ ہفتیاں تیکر جاری رہڻ والے ایس ٹورنامنٹ دی پروہنچاری دی ذمے واری ہندوستان، بنگلہ دیش تے سری لنکا رل کے ادا کر رہے نیں تے ایہہ اوہ ملک نیں جتھے کرکٹ دے کھیڈ وچ پیسہ رہندی دنیا دے مقابلے وچ سب توں بہتا ہے۔

2011 دا ورلڈ کپ آسٹریلیا تے نیوزی لینڈ رل کے کرؤانا چاہندے سی پر گذریل ہندوستانی کرکٹ چیف اندرجیت سنگھ بنڈراکے موجب دکھڻی ایشیا نے بہتی آمدڻی دے وعدے کردیاں ہوئیاں ایہہ ورلڈ کپ آپڻے نام کر لیا۔ بنڈرا نے دسیا ' اسیں اوہناں نوں چار سو ملین ڈالر دی آمدڻی دا یقین کروایا سی۔ ایس ورلڈ کپ لئی آئی سی سی نوں کوئی پنجاہ ملین ڈالر خرچڻے پیڻ گے جیہدا مطلب ہے اوہنوں ایس ٹورنامنٹ توں وڈی بچت ہووے گی۔

ایہناں ساریاں گلاں دے مگروں وی حقیقت ایہہ ہے جو کرکٹ دے کھیڈ وچ انعام اوہناں انعاماں دا کجھ وی نہیں ہے، جیہڑے فٹ بال دے کھیڈ وچ لئے جا سکدے نیں۔ دکھڻی افریقہ وچ کھیڈے جاڻ والے فٹ بال ورلڈ کپ لئی 420 ملین ڈالر دے انعام دتے گئے سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels