Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> پاکستانی کرکٹ لئی جھیڑیاں دا سال

پاکستانی کرکٹ لئی جھیڑیاں دا سال

وچار ڈیسک
December 30th, 2010

دو ہزار دس مُکڻ والا ہے تے پاکستانی کرکٹ ٹیم لئی ایہہ سال اک انج دے سفنے وانگوں سی جیہنوں اوہ فیر خورے کدی نہ ویکھڻا چاہوے گی۔جتھے اک پاسے پاکستانی ٹیم دی میدان وچ کارکردگی نا گھڑت رہی اوتھے سپاٹ فکسنگ سکینڈل نے اپڻیاں دا سکون تے غیراں دا اعتبار سارا کجھ کھوہ لیا۔

برطانوی اخبار ولوں پاکستان دے انگلینڈ دے دورے وچ ساہمڻے آؤن والے ایس سکینڈل وچ کپتان سلمان بٹ تے فاسٹ بالر محمد آصف تے محمد عامر دا ناں ساہمنے آیا۔ ' گھر کو آگ لگی گھر کے ہی چراغ سے ' وانگوں سلمان بٹ راہیں محمد آصف تے محمد عامر نوں اپنے اشاریاں تے نچاؤڻ والا کوئی ہور نہیں ایہناں کرکٹراں دا ایجنٹ اکھواؤڻ والا مظہر مجید سی۔

مظہر مجید دیاں گلاں نوں پہلوں تے پاکستان کرکٹ بورڈ تے پاکستان دی سرکار دوہواں نے منڻ توں نانہہ کر دتی تے اوہ تناں کرکٹراں نوں معطل نہ کرن تے اڑے رہے پر جدوں آئی سی سی نے ایہناں کھڈاریاں دی معطلی دا پیر پٹیا تے اسکاٹ لینڈ یارڈ دی پُڻ چھاڻ ساہمڻے آئی اودوں جا کے اوہناں نوں معاملہ وگڑڻ دا احساس ہویا۔

ہُڻ آئی سی سی نے ایس معاملے تے تن رکنی ٹربیونل بڻایا ہے جیہڑا چھ توں گیاراں جنوری تیکر ایس کیس دی سڻوائی دوہا وچ کرن والا ہے۔ پاکستانی کھڈاریاں دے سپاٹ فکسنگ سکینڈل دی اگ حالی بجھی نہیں سی پئی پاکستان کرکٹ بورڈ دے چیئر مین اعجاز بٹ نے انگلینڈ دے کرکٹر تے سپاٹ فکسنگ وچ رلتی ہوڻ دا بیان دے کے اپنے کھڈاریاں لئی ہی مسئلہ نہیں بنا دتا سگوں انگلینڈ دی قانونی چارہ جوئی دے جواب وچ اوہناں نوں لکھ کے معافی منگڻی پئی۔

آئی سی سی دے رکن ملک وی پاکستانی کرکٹ وچ کرپشن توں بہت ناراض رہے تے اک ویلا اوہ وی آیا جدوں پاکستان کرکٹ بورڈ تے اوہدے چیئرمین نوں بین الاقوامی کرکٹ توں اڈ کرن دی منگ ودھ گئی پر آئی سی سی نے اک ٹاسک فورس راہیں پاکستانی کرکٹ دے معاملے تے کرڑی راکھی دا فیصلہ کیتا۔

ایس سال پاکستانی کرکٹ نوں صرف سپاٹ فکسنگ نے نقصان نہیں اپڑایا سگوں دوجے معاملے وی دنیا دے ساہمنے اوہنوں ذلیل کردے رہے۔

آسٹریلیا دے دورے توں مگروں پاکستان کرکٹ بورڈ نے اک کاہڈو کمیٹی بنائی جیہدے ساہمڻے پیش ہوڻ والے کرکٹر تے آفیشلز دے رازدارانہ بیان جیہڑے اک دوجے دے خلاف الزام تے بھیت کھولڻ تے بڻے سڻ راز نہ رہ سکے تے جگ ہسائی دا موقع دے گئے۔

ایس کاہڈو کمیٹی دیاں سفارشاں تے پاکستان کرکٹ بورڈ نے پہلے تے یونس خان، محمد یوسف، کامران اکمل، عمراکمل، راڻا نوید تے شعیب ملک تے جرمانیاں تے روکاں دیاں سزاواں دا طوفان کھڑا کر دتا پر باہر دے دبا تے اپنی نااہلی دے سٹے وچ آپوں کرکٹ بورڈ دے پیر ایس طوفان وچ اکھڑ گئے تے سزا ملے ہوئے کرکٹرز اک اک کر کے ٹیم وچ واپس آگئے۔

کپتان دی بدلی پاکستانی کرکٹ وچ کوئی معنے نہیں رکھدی۔ ایس سال یونس خان نے اگوائی چھڈی تے اوہناں دے مگروں محمد یوسف، سلمان بٹ ، شاہد آفریدی تے فیر مصباح الحق ایس ' میوزیکل چیئر گیم ' دا حصہ بڻے۔

جتھے محمد یوسف نے اک واری فیر بین الاقوامی کرکٹ نوں چھڈیا تے فیر یُوٹرن لے کے ٹیم وچ واپس آئے اوتھے وکٹ کیپر ذوالقرنین حیدر دا دبئی وچ ٹیم چھڈ کے لندن ٹر جاڻا تے اوتھے پناہ دی درخواست دیڻ دی واپری وی پاکستان کرکٹ بورڈ دے کرتا دھرتاواں دیاں نیندراں اڈا گئی۔

اوکڑاں تے پریشانیاں وچ گھرے رہڻ دے مگروں وی پاکستانی ٹیم ولوں کجھ چنگیاں کارکردگیاں وی ویکھڻ وچ آئیاں۔ برطانیہ وچ آسٹریلیا دے خلاف اپنی ہوم سیریز کھیڈ دے ویلے پاکستان نے ہیڈنگلے وچ آسٹریلیا نوں صرف اٹھاسی دوڑاں تے آؤٹ کر کے ٹیسٹ میچ جتیا جیہڑے پندراں سال توں مگروں آسٹریلیا دے خلاف اوہدی پہلی جت سی۔

ایسے سیزن وچ اوہنے انگلینڈ دے خلاف اوول ٹیسٹ وی جتیا جدوں کہ متحدہ عرب امارات وچ دنیا دی نمبر دو ٹیسٹ ٹیم جنوبی افریقہ دے خلاف دوہویں میچز وی ڈرا کیتے۔

ٹیسٹ وچ چنگی کارکردگی دے الٹ ٹی ٹوئنٹی وچ پاکستانی کارکردگی بے دل کرن والی رہی تے پاکستان ایس سال سب توں بہتا ٹی ٹوئنٹی میچ ہارڻ والی ٹیم دے طور تے ساہمڻے آیا۔ ایہناں ناکامیاں وچ ورلڈ ٹوئنٹی ٹوئنٹی دا سیمی فائنل وی رلتی ہے جتھے مائیکل ہسی نے ایہدے توں جت کھوہ لئی۔

سال دے چھیکڑلے دناں وچ نیوزی لینڈ دے دورے وچ وی پاکستان نوں ٹی ٹوئنٹی سیریز وچ ہار ہوئی۔

انفرادی کارکردگی وچ وی پاکستانی کرکٹرز دوجیاں توں پچھے ہی رہے۔ ٹیسٹ میچاں وچ سب توں بہتیاں پنج سو ترتالی دوڑاں سلمان بٹ نے بڻائیاں۔ بولنگ وچ محمد عامر تے محمد آصف دا جادو سر چڑھ کے بولیا تے اوہناں دوہاں نے تیتی تیتی وکٹاں لے کے مخالف بلے بازاں نوں کسے وی موقعے تے سکھ دا ساہ نہیں لیڻ دتا۔


پر ایہناں تناں دی ایس کارکردگی نوں سپاٹ فکسنگ سکینڈل نے دھندلا دتا۔

اک دیہاڑے میچاں وچ کپتان شاہد آفریدی سب توں بہتے کامیاب پاکستانی بلے باز رہے جیہناں نے دو سنچریاں دی مدد نال چھ سو اک دوڑاں بڻائیاں جدوں کہ بولنگ وچ اوہ تے شعیب اختر انی وکٹاں لے کے اگے رہے۔

ایس سال کرکٹ نوں پہلی واری ایشین گیمز وچ رلایا گیا پر گوانگزو وچ ہوڻ والے ایشین گیمز وچ پاکستان دی مرداں دی کرکٹ ٹیم اوہناں مقابلیاں نال ہندوستان دی غیر حاضری دا فیدا چکن وچ ناکام رہی تے سیمی فائنل وچ افغانستان کولوں ہار گئی۔ پر مرداں دے الٹ پاکستانی زنانیاں نے کرکٹ مقابلیاں وچ شاندار کاکردگی وکھائی تے فائنل وچ بنگلہ دیش نوں دس وکٹاں توں ہرا کے گولڈ میڈل جت لیا۔

ہُڻ جدوں کہ آؤڻ والا سال کرکٹ ورلڈ کپ دا سال ہے ویکھڻا ایہہ ہے جو ایس سال مسئلیاں وچ گھری پاکستانی ٹیم نویں سال وچ ایس بھنور توں نکلڻ وچ کامیاب ہوندی ہے یاں نہیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels