Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> پاکستان کرکٹ مکاؤن دے جتن ہورہے نیں: آفریدی

پاکستان کرکٹ مکاؤن دے جتن ہورہے نیں: آفریدی

وچار ڈیسک
September 22nd, 2010

پاکستان کرکٹ ٹیم دے کپتان شاہد خان آفریدی نے گل کھولی ہے جو وہاب ریاض تے جوناتھن ٹروٹ وچ جھیڑے توں مگروں پاکستان ولوں پچھلے دیہاڑے انگلینڈ دے خلاف کھیڈے جان والے چوتھے ون ڈے میچ دے بائیکاٹ تے گوہ کیتا گیا سی۔

انگلینڈ دے دورے تے موجود پاکستان ٹیم دے فاسٹ باؤلر تے انگلینڈ دے بلے باز مین جوناتھن ٹراٹ وچ پیر نوں میچ توں پہلوں ہون والی توں تراں تے مار کٹائی دے مگروں دوہواں ٹیماں دے سانگے بہت ہی خراب ہوئے نیں۔

انگلینڈ دے خلاف پچھلے مہینے کھیڈے جان والے چوتھے ٹیسٹ میچ وچ تن پاکستانی کھڈاریاں تے میچ فکسنگ وچ رلتی ہون دے الزاماں توں مگروں شروع ہون والا جھیڑا بہتا اودوں ودھ گیا جدوں تیجے ون ڈے توں مگروں پاکستان کرکٹ بورڈ دے چیئر مین اعجاز بٹ نے بکیز دے بیاناں دے حوالے نال انگلینڈ دے کھڈاریاں تے وی میچ فکسنگ وچ رلتی ہون دا الزام لایا سی۔

انگلینڈ کرکٹ بورڈ نے پہلوں ہی اعجاز بٹ کولوں اپنے کیتے تے معافی منگن دی منگ کیتی ہے جدوں کہ اک برطانوی اخبار موجب انگلینڈ دے کھڈاریاں نے اعجاز بٹ دے خلاف ہتک عزت دا دعویٰ دائر کرن لئی اک برطانوی قانونی فرم نال رابطہ کر لیا ہے۔

منگل نوں اک پرائیویٹ ٹی وی نال گل بات کردیاں ہوئیاں شاہد آفریدی نے کہیا سی پئی وہاب ریاض تے جوناتھن ٹراٹ وچ ہون والے جھیڑے توں مگروں اوہناں نوں ایہہ صلاح دتی گئی سی جو ٹیم انگلینڈ دے خلاف میچ دے ٹاس لئی روس وکھالے وچ میدان وچ نہ آوے۔ پر مگروں اوہناں دی ٹیم نے میدان وچ آؤن دا فیصلہ کیتا۔

شاہد آفریدی موجب انگلش ٹیم دے کھڈاری نے وہاب ریاض نال بدتمیزی کیتی سی تے اوہناں نوں میچ فکسر کہیا سی۔ اوہناں دا کہنا سی جو میچ ریفری جیف کرو ولوں واپری دی اطلاع ملن دے مگروں دوہواں کھڈاریاں نوں سد کے معاملہ پچھیا گیا جیہدے تے ٹروٹ نے اپنے ورتارے تے معافی منگ لئی۔

پاکستانی کپتان نے کہیا اوہناں دی ٹیم دی وڈھیائی ہے جو اوہناں جھیڑے نوں اوتھے مکاؤن دا فیصلہ کیتا نہیں تاں اوہناں موجب '' جے اوہ چاہندے تے ایس معاملے نوں اگے تیکر کھڑ سکدے سن تے اوہدے تے پولیس کیس بن سکدا سی ''۔

شاہد آفریدی نے کہیا انگلینڈ دے دورے وچکار کھڈاریاں تے لگن والے الزاماں توں مگروں پاکستانی ٹیم دے حوصلے ودھ گئے نیں تے ایہہ پاکستانی کھڈاری ذہنی طور تے انگلش کھڈاریاں نالوں ودھ کے مضبوط نیں۔


اوہناں دا کہنا سی جو پاکستان ٹیم نوں مکاؤن دی کوشش کیتی جارہی ہے پر اوہناں موجب '' پاکستانی قوم نوں جنا دبایا جاوے گا ایہہ اونا ہی ابھرے گی۔''

شاہد آفریدی نے کہیا اوہناں نوں انگلینڈ وچ جاری ٹور وچ ہون والیاں واپریاں تے ہرکھ ہے۔پر اوہناں دا کہنا سی جو اوہناں دی ساری توجہ چھیکڑلے ون ڈے میچ جتن تے ہے کیوں جو اوہناں موجب انج دے حالات وچ جت توں چنگا ہور کجھ نہیں ہوسکدا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels