Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> پرانے کھڈاریاں ولوں آئی سی سی دی نکھیدی

پرانے کھڈاریاں ولوں آئی سی سی دی نکھیدی

وچار ڈیسک
September 19th, 2010

کرکٹ دے پرانے کھڈاریاں نے کرکٹ دی گورننگ باڈی ولوں اک برطانوی اخبار دے آکھن تے پاکستان ٹیم دے خلاف پن چھان دا اعلان کرن دے فیصلے تے حیرانی ظاہر کیتی ہے تے ڈر ظاہر کیتا ہے جو آئی سی سی آپوں ہی کھیڈ دی شہرت نوں تباہ کر رہی ہے۔

پاکستان دے گذریل کپتان آصف اقبال نے کہیا پئی ایہہ وچارن جوگ گل ہے پئی جدوں وی پاکستانی ٹیم جتنا شروع کردی ہے تے انج دے الزام لگنے شروع ہوجاندے نیں۔ انگلینڈ دے گذریل کھڈاری تے مشہور کرکٹ کمنٹیٹر جوناتھن ایگنیو نے کہیا ہے پئی آئی سی سی نوں ایہہ گل یقینی بناؤنی ہووے گی پئی اوہ آپوں ہی کرکٹ دی شہرت نوں نقصان نہ اپڑاوے۔

اوہناں نے کہیا آئی سی سی دا ایہہ فرض ہے جو اوہ کرکٹ وچ ہون والی کسے دی غیر قانونی کاروائی نوں روکے پر انج دے الزام جیہناں نوں ثابت کرنا بہت ہی اوکھا ہے اوہناں دی پن چھان شروع کر کے اوہ آپوں ہی کھیڈ دی شہرت نوں نقصان اپڑا رہی ہے۔

پاکستان دے گذریل کپتان آصف اقبال نے کہیا ایہہ بڑی حیرانی والی گل ہے پئی جدوں وی پاکستان میچ جت جاندا ہے تے اوہدے تے الزام لگنا شروع ہوجاندے نیں۔ اوہناں کہیا پئی ٹیسٹ سیریز وچ جدوں پاکستان نے اوول دے میدان وچ ٹیسٹ جتیا تے اوہدے تے الزام لگ گئے۔

اک واری فیر پاکستان نے اوول دے میدان تے اک وڈا میچ جتیا تے اوہدے تے الزام لائے جارہے نیں۔ اوہناں نے کہیا ایہہ اک معجزہ ہے جو انج دے حالات وچ وی پاکستانی ٹیم چنگی کارکردگی وکھا رہی ہے۔

آصف اقبال نے کہیا پئی ہرکھ والی گل ایہہ ہے جدوں وی پاکستان تے انج دے الزام لگدے نیں تے کجھ گذریل پاکستانی کھڈاری وی ایہدے وچ کُد پیندے نیں تے الزام لاؤنا شروع کر دیندے نیں۔

آصف اقبال نے کہیا جدوں آسٹریلیا دی ٹیم زمبابوے کولوں ہار جاوے، ویسٹ انڈہز دی ٹیم کینیا توں ہار جاوے، آسٹریلیا پاکستان کولوں ہار جاوے تے کوئی انگلی نہیں چکدا پر جے پاکستان دی ٹیم بنگلہ دیش توں ہار جاوے تے اپنے لوک ہی الزام لاؤنے شروع کر دیندے نیں۔ آصف اقبال نے کہیا پاکستانیاں نوں اپنے گریبان وچ وی جھاتی مارن دی لوڑ ہے۔

آصف اقبال نے کہیا پاکستان کرکٹ بورڈ نوں ایس تاثر نوں مکاؤن دی کوشش کرنی چاہیدی ہے پئی ساری برائی پاکستان وچ ہی ہے۔ اوہناں نے کہیا انج دیاں اطلاعواں ساہمنے آئیاں نیں جو آئی سی سی نے سلمان بٹ نوں دورے توں پہلوں ہی وارننگ دے دتی سی۔

پاکستان کرکٹ بورڈ نوں ایہہ دسنا ہووے گا پئی ایہہ گل ٹھیک ہے جو آئی سی سی نے سلمان بٹ نوں وارننگ دے دتی سی تے فیر اوہ کپتان کیویں بنیا جے انج دی کوئی وارننگ نہیں دتی گئی سی تے بورڈ نوں ایہنوں کھل کے ردنا چاہیدا سی۔ پی سی بی دے قانونی مشیر تفضل رضوی نے وسیلیاں نوں دسیا پئی عام طور تے انج دے الزاماں دی پن چھان خفیہ طریقے نال کیتی جاندی سی پر ایس واری کیوں نہیں انج ہویا تے ایہدے تے کوئی رائے دینا نہیں چاہندے۔

انگلینڈ دے مشہور کرکٹ مبصر تے گذریل کھڈاری جوناتھن ایگنیو نے کہیا انج دے الزاماں نوں ثابت کرنا بہت اوکھا ہے۔

اوہناں نے کہیا ایہہ پتہ لاؤنا پئی ون ڈے تے ٹونٹی ٹونٹی میچ دے کیہڑے اوور وچ کنیاں دوڑاں بنن گیاں بہتا اوکھا نہیں۔ اوہناں نے جے پچھلے سارے میچاں دا ریکارڈ کمپوٹر وچ پاؤ تے اوہ انج دی پروجیکشن دے دیندا ہے پئی میچ دے کیہڑے اوور وچ کنیاں دوڑاں بنن گیاں۔

اوہناں کہیا آئی سی سی نوں یقینی بناؤنا چاہیدا جو انج دے الزاماں دی پن چھان کرن توں ولایا جاوے جیہناں نوں ثابت کرنا اوکھا ہی نہیں ناممکن ہووے کیوں جو ایہدے نال کرکٹ دی شہرت نوں نقصان اپڑدا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels