Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> میچ فکسر مظہر مجید دے پول کھلن تے ماہر کیہ کہندے نیں ؟

میچ فکسر مظہر مجید دے پول کھلن تے ماہر کیہ کہندے نیں ؟

وچار ڈیسک
September 1st, 2010

اسکاٹ لینڈ یارڈ نوں ملن والے میچ فکسنگ اسکینڈل دے مڈھلے کردار مظہر مجید دی گل بات والی چالی گھنٹے دی ریکارڈنگ وچ ہور حیران کر دین والیاں گلاں کھلیاں نیں۔ جیہدے وچ مظہر مجید نے گل کھولی ہے پئی ایس سال دے پہلے مہینے سڈنی ٹیسٹ تے ایشیاء کپ وچ پاکستان تے سری لنکا دا میچ فکسڈ سی۔ سڈنی ٹیسٹ بارے اوہناں دا کہنا سی پئی ایس میچ دا پاسا دوجی اننگز وچ پرتیا گیا ہے۔

وسیلیاں نے مظہر مجید دے بیاناں تے مبصراں تے کرکٹ تے ڈوہنگی نظر رکھن والیاں نال رابطہ کیتا تے ایہہ جانن دی کوشش کیتی جو کیہ مظہر مجید دے بیان حقی ٹھیک نیں یاں نہیں۔ مبصراں نے گل کھولن نوں جیویں پرکھیا اوہ کجھ انج ہے۔

سڈنی ٹیسٹ دی پرکھ

مبصر کہندے نیں جو لارڈز وچ جیہڑے کھڈاریاں تے میچ فکسنگ دے الزام لائے گئے نیں اوہناں وچوں سلمان بٹ، محمد عامر، محمد آصف تے کامران اکمل دے ناں ساہمنے آئے نیں۔ تن جنوری دو ہزار دس توں شروع ہون والے سڈنی ٹیسٹ وچ جے ایہناں کھڈاریاں دی کارکردگی نوں پرکھیا جاوے تے مظہر مجید دی گل ٹھیک ثابت ہوندی ہے پئی ایس میچ وچ پاکستان جت دے نیڑے ہو گیا سی۔

ایس میچ وچ آسٹریلیا نے ٹاس جت کے پہلوں بیٹنگ دا فیصلہ کیتا تے پوری ٹیم اک سو ستائی دوڑاں بنا کے آؤٹ ہو گئی۔ محمد آصف نے شاندار بولنگ دا وکھالا کردیاں ہوئیاں پہلی اننگز وچ چھ وکٹاں لئیاں۔ جواب وچ پاکستان نے شاندار 333 دوڑاں بنائیاں جیہدے وچ سلمان بٹ دی 71 زنز دی اننگز وڈی سی جدوں کہ کامران اکمل نے چوداں دوڑاں بنائیاں۔ انج پاکستان نوں آسٹریلیا دی پہلی اننگز تے 206 دوڑاں دی برتری ہو گئی۔

دوجی اننگز وچ آسٹریلیا نے 381 دوڑاں بنائیاں۔ ایتھے ایہہ دسن جوگ گل ہے پئی آسٹریلیا دیاں اٹھ وکٹاں 257 تے ڈگ گئیاں سن پر نویں وکٹ دی سانجھ وچ 123 دوڑاں بنیاں۔ ایس میچ وچ کامران اکمل نے تن کیچز تے اک رن آؤٹ وی مس کیتا۔ ایس اننگز وچ آصف نے ہور دو وکٹاں لئیاں تے میچ وچ اوہناں دیاں اٹھ وکٹاں ہو گئیاں۔

پاکستان نوں میچ جتن لئی 177 دوڑاں بنائیاں۔ عمران فرحت تے سلمان بٹ نے 34 دوڑاں دا مڈھ دتا ، عمران فرحت 22 دوڑاں بنا کے آؤٹ ہو گئے۔ جیہدے مگروں پنجاہ دے سانجھے اسکور تے فیصل اقبال وی آؤٹ ہو گئے۔ ایس موقعے تے انج لگ رہیا سی جو پاکستان سوکھیاں ایس میچ وچ جت جاوے گا۔

مظہر مجید دا ایہہ بیان پئی ایتھوں میچ دا پاسا پرتیا گیا اُکا ٹھیک ثابت ہوندا ہے کیوں جو سلماب بٹ ایہدے جھبدے مگروں اکونجاہ دوڑاں تے اِکی دوڑاں بنا کے آؤٹ ہو گئے۔ ایہدے مگروں محمد یوسف 19 ، مصباح الحق بناء کوئی رن بنائے ، کامران اکمل گیاراں ، محمد سمیع دو، عمر گل 49 ، دانش کنیریا بناء کوئی دوڑ بنائے تے عمر گل چھ رن بنا کے آؤٹ ہو گئے جدوں کہ آصف بناء کوئی دوڑ بنائے ناٹ آؤٹ رہے۔

ایس لئی سڈنی ٹیسٹ وچ جیویں مظہر مجید نے گل کھولی پئی اوہ اُکا ٹھیک ثابت ہوندے نیں تے جتھے جتھے میچ دا پاسا پرتیا گیا اوہ صاف نظر آؤندا ہے۔ ایس حوالے نال مشہور آسٹریلوی اخبار نے سڈنی ٹیسٹ دے فکسڈ ہون یاں نہ ہون تے سروے کروایا جیہدے وچ 91 فیصد پڑھن والیاں دی رائے سی پئی میچ فکسڈ سی۔

ایشیاء کپ

ایشیا کپ وچ سری لنکا تے پاکستان وچکار کھیڈے گئے اک روزہ میچ دے حوالے نال مظہر مجید دا کہنا ہے پئی ایس میچ وچ طے سی جو بالرز کنیاں دوڑاں دیوے گا تے بلے باز کنا اسکور دیوے گا۔ سری لنکا نے ٹاس جت کے پہلوں بیٹنگ کردیاں ہوئیاں متھے ہوئے پنجاہ اووراں وچ 242 دوڑاں بنائیاں۔ بولنگ وچ محمد آصف نے نو اووراں وچ پچونجاہ دوڑاں دے کے اک وکٹ لئی جدوں کہ محمد عامر نے دس اوورز کیتے 57 دوڑاں دتیاں تے دو وکٹاں لئیاں ، جیہڑی کسے صورت سلاہن جوگ بولنگ نہیں کہی جاسکدی۔

جواب وچ سلمان بٹ صفر تے آؤٹ ہو گئے۔ عمر امین نے ست، شاہ زیب نے گیاراں، کامران اکمل نے چوداں، محمد عامر نے پنج تے آصف بناء کوئی رن بنائے پولیس لوٹ گئے۔ ایس میچ وچ اکلے کپتان شاہد خان آفریدی سری لنکن بولنگ دا مقابلہ کردے نظر آئے تے اوہناں نے اک سو نو دوڑاں بنائیاں پر فیر وی ناکامی ٹیم دا مقدر بنی۔ لارڈز وچ میچ فکسنگ وچ رلتی کھڈاریاں دی ایس میچ وچ وی پرفارمنس بہت ہی بے دل کرن والی ہے جیہنوں ویکھدیاں ہی مظہر مجید دا بیان سچ ثابت ہورہیا ہے۔

دورہ انگلینڈ دے چھیکڑلے دو ٹیسٹ میچز

مظہر نے ہور گل کھولی سی پئی اوہ دورہ انگلینڈ دے چھیکڑلے دوہواں ٹیسٹاں دے نتیجے فکسڈ نہیں سن کیوں جو بوکیز سلمان بٹ نوں ہی کپتان ویکھنا چاہندے سن۔ اوہناں دے ایس بیان توں پہلوں جے ویکھیا جاوے تے شاہد خان آفریدی نے انگلینڈ دے پہلے میچ وی ہی ہار توں مگروں استعفیٰ دے دتا حالانکہ دورے توں پہلوں اوہ بہت ہی آس مند نظر آرہے سن تے اوہناں دا ایہہ وی کہنا سی جو اوہناں دے کول ناتجزبہ کار ٹیم ہے پر ایہدے مگروں وی اوہ بھرویں کوشش کرن گے پر قوم نوں بہتیاں آساں نہیں لاؤنیاں چاہی دیاں۔

اخیر کیہ کارن سی پئی پہلوں ٹیسٹ وچ ہار دے مگروں اوہ ٹیسٹ کرکٹ توں وکھ ہو گئے۔ مبصراں موجب اسکینڈل دے مگروں شاہد آفریدی دا ایہہ بیان پئی اوہناں نے کجھ کھڈاریاں نوں اپنیاں کاروائیاں محدود رکھن دی ہدایت کیتی سی پر اوہ نہیں منے، ایہدا مطلب ہے جو آفریدی نوں پتہ سی پئی ٹیم دے وچ کیہ ہورہیا ہے۔ ہوسکدا ہے آفریدی نوں وی آفر کیتی گئی ہووے۔ ہوسکدا ہے جو آفریدی نوں ایہہ وی پتہ ہووے پئی کپتان دے طور تے اوہناں دا بھلک کجھ خاص نہیں۔ ریٹائرمنٹ دے مگروں اوہ پاکستان آگئے تے بہتے میڈیا وچ وی ان رہے، کدی کسے بیان راہیں تے کدی ہڑھ ماریاں دی مدد کردیاں ہوئیاں۔ مبصر کہندے نیں جو ایہہ سارے تے گویڑ نیں تے ایس حوالے نال کجھ وی کہنا ویلے توں پہلوں ہووے گا۔ ایہناں ساریاں گلاں دا پتہ تے پن چھان توں مگروں ہی ہووے گا پر اوہناں موجب اجوکی صورتحال وچ مظہر مجید دے بیان وچ بڑا وزن نظر آرہیا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels