Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> کرکٹ دا سب توں کالا دیہاڑ ؟

کرکٹ دا سب توں کالا دیہاڑ ؟

سہیل حلیم
September 1st, 2010

جدوں توں کجھ پاکستانی کھڈاریاں دے خلاف سپاٹ تے میچ فکسنگ دے الزام ساہمنے آئے نیں کہیا جارہیا ہے پئی ایہہ کرکٹ دی تاریخ دا سب توں مندا دن ہے۔ سخت تے مثالی سزا دی منگ ہر پاسے ہے کوئی پاکستان نوں بین الاقوامی کرکٹ توں معطل کرن دی منگ کر رہیا تے کوئی چاہندا جو قصور وار کھڈاریاں تے غداری دا مقدمہ چلایا جاوے !

میڈیا نوں کوریج ہووے یاں پاکستان وچ سیاسی اگوائی دا جواب یاں فیر کرکٹ نال پیار کرن والیاں دا غصہ، جو کجھ کھوتیاں نال مار کٹائی کر کے مسلسل ٹی وی تے اپنا روسا وکھا رہے نیں۔

انج لگدا ہے جیویں کوئی انہونی ہو گئی ہووے، کجھ انج دا ہو گیا ہووے جیہڑا یاں تے پہلوں کدی ہویا نہیں یاں جیہدی کسے نے کدی آس نہیں کیتی سی۔پاکستانی کھڈاری نوے دے دھاکے توں میچ فکسنگ دے الزاماں وچ گھرے رہے نیں، سن دو ہزار وچ دکھنی افریقہ تے ہندوستان دے کجھ کھڈاریاں دا رول وی بے نقاب ہویا تے دوجیاں ٹیماں دے کجھ کھڈاریاں دے ناں وی ویلے کویلے بوکیز نال سانگیاں دے سلسلے وچ لئے گئے نیں۔

تفصیل جے پڑھنا چاہو تے پاکستان وچ جسٹس قیوم، دکھنی افریقہ وچ کنگس کمیشن تے ہندوستان وچ مرکزی کاہڈو بیورو دیاں رپورٹاں نوں ویکھ لوو، انٹرنیٹ تے ایہدی تفصیل بھری پئی ہے۔

میچ فکسنگ کتھے کُو اپڑ گئی سی ایہدا گویڑ کنگس کمیشن دے ساہمنے دکھنی افریقہ دے گذریل کپتان ہنسی کرونیے دے ایس لکھے ہوئے بیان توں ہوندا ہے۔

' چھیکڑلے اک روزہ میچ توں پہلوں ( ہندوستانی بوکی) ایم کے نے میچ ہارن دے بدلے دو لکھ امریکی ڈالر دی پیشکش کیتی سی۔ میں ایس بارے کجھ کھڈاریاں نال صلاح مشورہ کیتا تے اوہناںنوں دسیا پئی اسیں اک ٹیم میٹنگ وچ کوئی چھیکڑلا فیصلہ کراں گے۔ میچ توں اک دن پہلوں ٹیم دی میٹنگ ہوئی جیہدے وچ سارے کھڈاری موجود سن۔ میں بوکی دی پیشکش اوہناں دے ساہمنے رکھنی جیہنوں کھڈاریاں نے رد دتا۔ طے ایہہ ہویا سی جیہڑا وی فیصلہ ہووے گا ایکے نال ہووے گا۔ میٹنگ توں مگروں کجھ کھڈاری بس ایہہ جاننا چاہندے سن جو کیہ ایم کے رقم ودھا سکدا ہے۔۔۔ رقم ودھا کے ڈھائی لکھ ڈالر کر دتی گئی۔پر میچ توں پہلوں اک ہور میٹنگ ہوئی جیہدے وچ ایس گل تے ایکا ہویا پئی ایہہ پیشکش قبول نہیں کیتی جاوے گی۔۔۔۔ جدوں کوچ باب وولمر نوں پتہ لگیا تے اوہ بہت ناراض ہوئے !

پوائنٹ ایہہ نہیں ہے جو میچ فکسنگ کیوں جو بہت چراں توں ہوندی رہی ہے ایس لئی ایہنوں نظر انداز کر دینا چاہی دا سگوں ایہہ کہ جو کجھ ہویا ہے اوہنوں اپنے وسیب دے سانجھے تناظر وچ وی ویکھو تے خورے ردعمل نوں '' ٹون ڈاؤن '' کرنا سوکھا ہووے۔

تے جیہڑے لوک قوم دا سر نموشی نال نیواں ہو جان دی گل کر رہے نیں، یاں کرکٹراں تے لگے الزاماں نوں قوم دے وقار نال جوڑ رہے نیں ، اوہناں نوں ایہہ سوال ضرور پچھیا جانا چاہی دا جو پچھلے پندراں سالاں وچ کھیڈ نوں صاف کرن لئی اوہناں نے کیہ کیتا ؟
ہندوستان وچ آئی پی ایل نوں کنے وڈے الزاماں دا ساہمنا ہے پر چھیکڑلی واری تسیں ایہہ خبر کدوں ویکھی سی ؟

مڈھلی گل ایہہ ہے جو کرکٹرز وی ایسے وسیب دا حصہ نیں جیہدے وچ اسیں تے تسیں ساہ لیندے او تے اوہدیاں برائیاں تے اچھائیاں دا انج ہی اثر پیندا ہے جیویں دوجے لوک۔ ایہناں رہندےاں لوکاں وچ کون آؤندا ہے ؟ ملک دے سیاستدان؟ سرکاری نوکر؟ کھڈاری ؟

ایگزٹ کنٹرول لسٹ کنی لمی سی ؟ کنے لوکاں دے خلاف مثالی کاروائی ہوئی ؟ برصغیر وچ کنے وڈے سیاستداناں دے خلاف بے ایمانی دے مقدمے بنے نیں ؟ کنیاں نوں مثالی سزا دتی گئی ہے ؟ تے فوجی افسر، اوہناں دا کیہ ؟ اوہناں نے تے واہوا چراں تیکر ملک تے کرکٹ دوہواں دی واگ ڈور سنبھالی ہوئی ہے ؟ اوہناں دیاں کارستانیاں نال کیوں کسے دا سر نموشی نال نہیں نیواں ہوندا ؟ کرکٹراں نوں وی ایسے پیمانے تے تولیا جانا چاہی دا ۔

اخیر کوئی کارن تے ہووے گا جیہڑا ٹرانسپرنسی انٹرنیشنل دی بنائی ایماندار ملکاں دی فہرست ( پرسیپشن انڈیکس ) وچ ہندوستان دا نمبر چوراسی تے پاکستان دا اک سو انتالیواں ہے ؟

تے دنیا وچ کنے ٹیم سپورٹس انج دے نیں جیہڑے مشہور ہون جیہناں وچ واہوا پیسہ ہووے تے جیہناں بارے ایہہ کہیا جاسکے پئی اوہ پاک صاف نیں ؟ اٹلی دی مشہور ترین کلب فٹبال وچ بے ایمانی دے سکینڈل بارے تسیں پڑھیا ہی ہووے گا ؟ صرف تن سال پرانی گل ہے۔ یاں کدی ایہہ وی وچاریا ہووے گا جو عالمی کپ یاں یورپی چیمپئن شپ ورگے وڈے مقابلیاں وچ کواٹر فائنل میچ اکٹھے کیوں کھیڈے جاندے نیں ؟

یاں روک لگیاں دوائیاں نوں ورتن دی گل کرو تے کینیڈا دے بین جانسن خورے تہانوں چیتے ہوون گے ؟ فہرست نوں لما کرنا چاہو تے آندرے اگاسی، میرئن جونس، ڈوین چیمبرز تے سیکڑیاں دوجے سوپر سٹارز دے ناں رلتی کیتے جاسکدے نیں۔

سپورٹس نوں پاک صاف رکھن تے ڈوپنگ دا پتہ لاؤن لئی نویں نویں ٹیسٹ ورتے جاندے نیں پر کھڈاری کجھ ہی دناں وچ ایہناں توں بچن لئی کوئی طریقہ کڈھ لیندے نیں کیوں جو دوہواں دھراں کول ماہراں دیاں خوبیاں ہوندیاں نیں۔

ذاتی فعل دی گل کرنا چاہو تے ٹائیگر وڈز دی مثال حالی سجری ہے۔ پاکستانی کرکٹرز باے اپنا ردعمل ظاہر کردیاں ہوئیاں آسٹریلوی کپتان رکی پانٹنگ نے کہیا پئی ساڈے کلچر تے اوہناں دے کلچر وچ بڑا فرق ہے ! پتہ نہیں پئی اوہ کیہ کہنا چاہ رہے سن پر '' ہائی مورل گراؤنڈ '' اختیار کرنا خطرے توں ویہلا نہیں۔ شین وارن مارک وا نے بوکیز نوں بچ تے موسم دی جانکاری دین لئی پیسے لئے سن ! موسم دی جانکاری ؟

کجھ جوان پاکستانی کھڈاریاں نے جے اوہ سب کیتا جیہناں دا اوہناں تے الزام ہے تے کوئی شک نہیں غلط سی پر اوہناں نوں خورے پچھوکڑ دیاں واپریاں نال ایہہ تاثر ملیا ہووے گا پئی سارا کجھ چلدا ہے، جیہڑے کھڈاری پہلوں انج دے الزاماں دی لپیٹ وچ آئے سن، جدوں اوہناں نے اپنے کرئیر پورے کیتے تے اسیں کیوں سوکھیاں پیسہ کماؤن دا ویلا کھنجائیے ؟

تے ایہہ گل وی سچی ہے جو ویڈیو دی '' شاک ویلیو '' وی بہتی ہوندی ہے پر ایہدے نال جرم دی قسم نہیں بدل جاندی۔ ایس لئی ایس سارے قضیے نوں سانجھیاں ویکھنا چاہی دا۔ کھیڈ دی دنیا دے وی تے وسیب دے وی۔ قصور ثابت ہووے تے سزا سخت ہونی چاہی دی ہے پر نال ہی ایہہ سنیہا وی جانا چاہی دا پئی اک چھکہ مارن نال نہ قوم دا سر اُچا ہوندا ہے تے نہ تن چار کھڈاریاں دی بے ایمانی نال نیواں ہوندا ہے۔

میرے لئی ایہہ کرکٹ دی تاریخ دا کالا دیہاڑ نہیں سی۔ انج پچھوکڑ وچ بڑی واری ہویا ہے تے جے ایہہ الزام سچے نیں پئی گل کھڈاریاں توں اگے تیکر جاندی ہے ، تے بھلکے وی ہوندا رہوے گا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels