Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> میچ فکسنگ سکینڈل پاکستانی ٹیم دے خلاف ہندوستانی سازش ہے

میچ فکسنگ سکینڈل پاکستانی ٹیم دے خلاف ہندوستانی سازش ہے

وچار ڈیسک
August 30th, 2010

اخیر ہندوستانی لابی جت گئی تے ہندوستانی لابی نے کرکٹ دے منصوبے بناؤن والیاں نال رل کے کمزور پاکستانی کرکٹ بورڈ تے عالمی قنوناں تے نویں ٹیکنالوجی توں ناواقف کرکٹراں نوں پھسا دتا۔ میچ فکسر مظہر مجید دی فوٹیج کتھوں دی ہے کیویں بنی تے کوئی مورکھ توں مورکھ بندہ وی اج دے دور وچ میز تے انج پیسے نہیں سجاؤندا تے نہ انج دی وڈی ڈیلنگ وچ پیسے گن کے لئے جاندے نیں جیویں میچ فکسرپیسے گن رہیا سی۔

اج دے دور وچ ہون والی میچ فکسنگ موجب نوٹاں دی ٹرانزکشن انج نہیں ہوندی جیویں فوٹیج وچ وکھائی گئی ہے سگوں کریڈٹ کارڈ سکریچ ہوندے نیں تے فکس کیتی گئی رقم اک اکاؤنٹ توں دوجے اکاؤنٹ وچ گھلی جاندی ہے یاں فیرمیچ فکسر نوں پراپرٹیاں دی نشاندہی کیتی جاندی ہے جیہڑے فکسر خرید کے مگروں کرکٹراں دے ناں لا دیندا ہے۔ انج سدھا ساہواں ٹیبل تے پیسے رکھ کے اک اک کر کے گننا منن وچ نہیں آؤندا۔

پاکستان دی سرکار نوں جتھے ایس سکینڈل دی پن چھان سیریس انداز وچ کرنی چاہی دی ہے اوتھے ایس کرکٹ بورڈ نوں وی پچھنا چاہی دا جیہڑا اپنے کھڈاریاں دا دفاع نہ کرسکے۔ میچ فکس کرن والے میچ فکسر مظہر مجید ولوں جیہڑا پوائنٹ میچ فکسنگ دے حوالے نال چکیا گیا ہے پئی پاکستانی بولر محمد عامر اپنے اک اوور دی چھیکڑلی بال نو بال کرن گے۔ ایس حوالے نال بکیز دی دنیا وچ کئی سوال جنم لیندے نیں کیوں جو دنیا وچ کِتے وی ہون والے میچاں وچ نو بالز تے جوا نہیں ہوندا تے نہ ہی کوئی بکی جواریاں نوں ایہدا ریٹ دیندا ہے۔

ایتھے ایہہ گل دسن جوگ ہے پئی میچ فکسر مظہر مجید جیہڑا دعویٰ کردا ہے پئی اوہنے پاکستانی کرکٹراں نوں بھاریاں رقماں دتیاں نیں اوہ نو بال کرن لئی دتیاں نیں تے ایہدا فائدہ میچ فکسر نوں کیہ ہووے گا کیوں جو سارے جگ وچ کِتے وی نو بال تے جوا نہیں ہوندا تے نہ ہی ایہدا ریٹ ملدا ہے۔ ایس اک پوائنٹ نال ایہو ثابت ہوندا ہے جو پاکستانی کرکٹ ٹیم دے کھڈاریاں دے خلاف ایہہ ایشو جان کے بنایا گیا ہے تے اصل وچ ایہہ کم پاکستانی بالر محمد عامر تے محمد آصف دا کیرئیر تباہ کرن لئی کیتا گیا ہے تے سازش وچ میچ فکسر مظہر مجید تے اوہدے بھرا اظہر مجید نوں ہندوستانی لابی نے ورتیا ہے۔

ایہہ سارے ایشوز پاکستان نوں بدنام کرن دی اک بھیڑی سازش ہے انڈین لابی نے صرف پاکستانی کرکٹ نوں بین کراؤن لئی اپنے ملک دے وڈے بک میکرز جیہڑے میچ فکسنگ وچ رلتی نیں اوہناں راہیں انگلینڈ وچ وسنیک مظہر مجید سنے سارے جی جیہڑے ایس اسکینڈل بناؤن وچ سب توں اگے نیں نوں لابھ دے کے سارا ڈرامہ رچایا گیا ہے۔ ایتھے ایہہ گل وی کرن والی ہے پئی مظہر مجید دی نیوز آف دی ورلڈ ٹیبلائیڈ دے رپورٹر نال ڈیل سنٹرل لندن وچ اک انڈین ریسٹورنٹ وچ ہوئی ہے۔ پاکستانی کرکٹر تے میچ فکسنگ دے الزام لاؤن والے میچ فکسر فیصل آباد منشی محلہ دے وسنیک مظہر مجید بارے دسیا گیا ہے جو اوہناں انڈین کڑی نال ویاہ کیتا ہویا ہے تے اوہدی بھین دا ویاہ وی ہندوستانی شہری نال ہویا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels