Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> کرکٹ ٹیم تے جوئے دے الزاماں تے پاکستان وچ غصہ

کرکٹ ٹیم تے جوئے دے الزاماں تے پاکستان وچ غصہ

وچار ڈیسک
August 30th, 2010

وزیر اعظم یوسف رضا گیلانی نے کہیا ہے پئی پاکستانی ٹیم دے کجھ کھڈاریاں تے جوئے دے نویں الزام اک بہت ہی نموشی والی گل ہے جیہدے نال ساڈے سرشرم نال نیویں ہو گئے نیں۔ اوہناں کہیا اوہ متعلقہ پربندھیاں نوں ایس واپری دی پوری پن چھان دی ہدایت کرن گے۔

پاکستان کرکٹ بورڈ دے وڈے پردھان صدر آصف علی زرداری نے وی اتوار نوں جاری ہون والے اک بیان وچ قومی ٹیم دے کھڈاریاں دے خلاف ایہناں الزاماں تے بے دلی دا وکھالا کردیاں ہوئیاں بورڈ نوں ہدایت کیتی ہے جو لندن وچ ایس سکینڈل دی ہون والی پن چھان توں اوہناں نوں خبردار کیتا جاوے جدوں کہ پی سی بی دے چیئر مین اعجاز بٹ نوں ایس پن چھان دی مڈھلی رپورٹ صدر نوں پیش کرن دی ہدایت کیتی گئی ہے۔

برطانیہ دے اک اخبار وچ ایس خبر دے چھپن توں مگروں پئی پاکستانی باولر محمد آصف تے محمد عامر نے پیسیاں دی خاطر جان کے نو بالاں کروائیاں برطانوی پولیس نے ایس سکینڈل دے وڈے کردار مظہر مجید ناں دے بندے نوں پھڑیا ہے تے انٹرنیشنل کرکٹ کونسل نے ایہدی تصدیق کیتی ہے۔ قومی ٹیم دے کپتان سلمان بٹ تے وکٹ کیپر کامران اکمل دے ناں وی ایہناں کھڈاریاں وچ رلتی نیں جیہناں توں برطانوی پولیس نے پچھ گچھ کیتی ہے۔

کھیڈاں دے وفاقی وزیر اعجاز حسین جاکھرانی نے وسیلیاں نوں دسیا پئی پاکستانی ٹیم دا جیہڑا وی کھڈاری جوئے وچ رلتی ہویا اوہدے خلاف ساری حیاتی لئی روک لائی جاوے گی کیوں جو انج دے کھڈاریاں نوں پاکستان دا سفیر بنن دا کوئی حق نہیں۔

پاکستانی ٹیم دے منیجر یاور سعید نے تصدیق کیتی ہے پئی پولیس دے تفتیش کاراں نے کھڈاریاں دے اڈ آپوں اوہناں کولوں وی ہوٹل آکے پچھ پرتیت کیتی ہے پر اوہناں ہور کوئی تفصیل نہیں دسی۔

سکاٹ لینڈ یارد پولیس نے ہفتے نوں اک بیان وچ کہیا سی پئی دی نیوز آف دی ورلڈ ولوں دتی گئی جانکاری موجب اک 35 سالاں دے مظہرمجید نوں پھڑیا گیا جیہدے تے میچ وچ شرطاں لاؤن دے اک فراڈ وچ رلتی ہون دا شک ہے۔

دی نیوز آف دی ورلڈ موجب ایہدے عملے نے اک خفیہ ویڈیو بنائی جیہدے وچ مظہر مجید پاکستانی کھڈاریاں ولوں نو بال کراؤن دی پک دے بدلے اخبار دے رپورٹراں ، جیہناں نے آپنے آپ نوں جواریاں دے اک بین الاقوامی جتھے دے رکن ظاہر کیتا اوہناں توں ڈیڈھ لکھ پاؤنڈ لیندیاں نظر آرہیا ہے۔ اخبار نے مگروں ایہہ ویڈیو پولیس نوں دے دتی۔

کجھ اطلاعواں موجب پولیس نے کھڈاریاں دے کمریاں چوں اوہناں دے موبائل، کمپوٹر تے وڈی گنتی وچ نقدی وی قبضے وچ کر لئی ہے پر ٹیم منیجر یاور سعید نے ایہناں الزاماں نوں ردیا ہے۔

ایس سال دے شروع وچ آسٹریلیا دے دورے وچ وی پاکستانی ٹیم دے کھڈاریاں دے خلاف ڈسپلن دی خلاف ورزی، جوئے تے دوجے انج دے الزام ساہمنے آئے سن جیہناں نوں قومی ٹیم دی ایس سیریز وچ ہار دا وڈا کارن متھیا گیا سی۔

پاکستانی کرکٹ بورڈ نے ایہناں الزاماں دی پن چھان توں مگروں ست کھڈاریاں نوں جرمانے تے کرکٹ کھیڈن تے روک لاؤن دی سزا سنائی سی۔ پر مگروں کھڈاریاں دیاں سزاواں مکا دتیاں گئیاں سن۔ایہناں وچ محمد یوسف، کامران اکمل، عمر اکمل، تے شعیب ملک رلتی سن جیہڑے انگلینڈ دے خلاف کھیڈی جان والی اجوکی سیریز وچ وی ٹیم دا حصہ نیں۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels