Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کھیڈ تے کھڈاری >> پال آکٹوپس ورلڈ کپ توں مگروں

پال آکٹوپس ورلڈ کپ توں مگروں

وچار ڈیسک
July 14th, 2010

ورلڈ کپ دے نال ہی ظاہر وچ پال آکٹوپس دا بھلک وی مک گیا ہے کیوں جو جرمنی دے ایس مچھی خانے دے پربندھیاں نے جتھے اک ایکویریم وچ پال دی آکٹوپس رہندا ہے، اوہدی ریٹائرمنٹ دا اعلان کردیاں ہوئیاں کہیا ہے پئی اگے توں پال پیش گوئیاں نہیں کرے گا تے ہن اوہ صرف مچھی خانے وچ آؤن والے سیلانیاں تے اُچیچا بالاں نوں پرچاؤن تے اپنا دھیان رکھے گا۔

پال دی آکٹوپس دی شہرت دا پینڈا دو ہزار اٹھ دے فٹ بال دے یورو کپ دیاں پیش گوئیاں دے نال شروع ہویا سی۔ یورو کپ وچ ایہدیاں پیش گوئیاں اسی فیصد ٹھیک ثابت ہوئیاں۔

ورلڈ کپ دے شروع وچ پال نے صرف اوہناں میچاں دیاں پیش گوئیاں کیتیاں جیہناں وچ جرمنی دی ٹیم رلتی سی۔ جیویں جیویں اوہدیاں پیش گوئیاں ٹھیک ثابت ہوندیاں گئیاں پال دیاں دُھماں جرمنی توں نکل کے ساری دنیا وچ پے گئیاں۔ سیمی فائنل وچ جرمنی دے مقابلے وچ اسپین دے حق وچ پیش گوئی کرن تے پال نوں اپنے جرمن چاہونداں ولوں بڑے روس وکھالے دا ساہمنا کرنا پیا۔

سیمی فائنل توں مگروں تیجی پوزیشن لئی پیش گوئی ٹھیک ہون تے آکٹوپس پال نوں فٹ بال دی دنیا دی اک وڈی ہستی من لیا گیا۔ تے دنیا دے ٹی وی چینلاں، میڈیا تے کھڈاری تے کھیڈاں وچ موہ رکھن والے صرف اک ہی موضوع تے گل کرن لگے پال آکٹوپس تے۔

تے فائنل وچ اسپین دی جت توں مگروں پال آکٹوپس دی سارے جگ وچ اک انج دے نجومی دے پکھوں مشہوری ہوئی جیہدیاں پیش گوئیاں سو فیصد ٹھیک ثابت ہوئیاں۔ جیہڑا کہ اک عالمی ریکارڈ ہے۔

نیدر لینڈز دے خلاف فائنل مقابلے وچ اسپین نے اپنا پہلا تے چھیکڑلا گول ، وادھو ویلا مکن توں بس چار منٹ پہلوں کیتا۔ کئی لوکاں دا خیال ہے پئی ایہدی جت وچ آکٹوپس دا ہتھ ہے۔ نیدر لینڈز دے کھڈاریاں نے فائنل وچ جیویں دا کھیڈ کھیڈیا ایہدے توں انج لگدا سی جیویں اوہ مسلسل پال دے دبا وچ رہے تے اوہناں نوں میدان وچ بناء جوڑ دے مصنوعی چمڑے دی فٹ بال جیولانی دی تھاں آکٹوپس دیاں اٹھ لتاں ہلدیاں ہوئیاں نظر آؤندیاں رہیاں ۔خورے ایہو وجہ سی جو اوہناں نے ریکارڈ گنتی وچ فاؤل کیتے تے گول کرن دے شاندار موقعے ہتھوں کڈھے۔

بھاویں ورلڈ کپ دا میدان اسپین نے مار لیا ہے پر ایہدا ریکارڈ وی بڑا حیران کرن والا ہے۔ مثال دے طور تے اوہ عالمی چیمپیئن دے پکھوں سب توں گھٹ گول کرن والا ملک ہے۔ ایہدا اک ہور ریکارڈ ایہہ وی ہے پئی اوہنے اپنے سارے گول مقابلیاں دے چھیکڑلے حصیاں وچ کیتے یعنی میچ دے 60 ویں منٹ توں لے کے 116 منٹ وچ۔

کھیڈ توں مگروں اسٹیڈیم وچ اسپین دے حمیتی پال آکٹوپس دے حق وچ نعرے ماردے رہے جدوں کہ ڈچ آکٹوپس نوں کوئلیاں تے بھن کے کھان دیاں تڑیاں لاؤندے رہے۔ ایہہ منظر اکلے دکھنی افریقہ وچ ہی نہیں سگوں اسپین تے نیدر لینڈز سنے دنیا دے اوہناں کئی ملکاں وچ ویکھن وچ آئے جیہڑے ورلڈ کپ وچ بڑا سواد لے رہے سن۔

ریٹائرمنٹ دا اعلان خورے ایس ڈر توں کر دتا گیا پئی کِتے لوک آکٹوپس توں فٹ بال دے وکھ دوجے شعبیاں بارے وی پیش گوئیاں دیاں فرمائشاں نہ کرن لگ پین تے غیب دے پردے اٹھن نال نویں مسئلے نہ پیدا ہو جان۔

عالمی کساد بازاری دے ڈنگے ہوئے کئی لوکاں دا کہنا ہے پئی پال آکٹوپس دی ریٹائرمنٹ دا فیصلہ اک مندا فیصلہ ہے کیوں جو ایہدی مدد نال فٹ بال دے بین الاقوامی تے عالمی مقابلیاں وچ ارباں ڈالر دے خرچے بچائے جا سکدے نیں۔ مثال دے طور تے دو ہزار دس دے ورلڈ کپ دے پربندھاں تے چار ارب ڈالر توں ودھ خرچ ہوئے۔ تن لکھ توں بہتے جی مقابلے ویکھن لئی دکھنی افریقہ گئے۔ سارے جگ وچ کروڑاں لوکاں نے اک مہینے تیکر ایہہ میچ ٹیلی ویژن تے ویکھے۔ کروڑاں ڈالر پبلسٹی تے خرچے گئے۔ جے ایہہ سارے میچ کراؤن نالوں ہار جت دے فیصلے پال دی آکٹوپس کولوں کروا کے جتن والی ٹیم نوں کپ دے دتا جاندا تے ارباں ڈالر تے قیمتی ویلا بچایا جا سکدا سی۔ تے فیر پال دی سو فیصد ٹھیک پیش گوئیاں دے ریکارڈ نوں ویکھدیاں کوئی ٹیم نا انصافی دی شکایت وی نہیں کر سکدی سی۔

پر لگدا ایہہ ہے جو ریٹائرمنٹ دے اعلان توں مگروں وی پال آکٹوپس دی کتھا حالی مکی نہیں کیوں جو اسپین دی بزنس کمیونٹی نے جرمنی دے مچھی خانے دے مالک نوں پیشکش کیتی ہے جو اوہ پال آکٹوپس نوں38 ہزار یورو وچ خریدن لئی تیار نیں۔ اوہناں نے ایہہ وی کہیا پئی اوہ پال نوں بڑے آرام تے عزت نال رکھن گے کیوں جو اوہ اوہناں دا ہیرو ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels