Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> اندردےعجا‎ئب گھر (نظم)

اندردےعجا‎ئب گھر (نظم)

خالد حسین تھتھال
January 15th, 2018
5 / 5 (4 Votes)

 

ہر بندے دے اندراپنا

اک عجا ئب گھر وی ہوندا اے

سے خانے سے تہوا‌ں جس وچ

ہر خانہ اک وکھری دنیا

ہر تہہ وکھرا اک جہان

کسے وچ نکے ہوندیاں دے

لاڈ پیار تے جھاکے شرماں

پچھن منگن چہلاں

مت نصیحت جھڑکاں جھنباں

ہسنا رسنا رونا

ڈر انجانے خواب ڈرا‎ؤنے

اپنے پرچھانویں تیں ڈرنا

نہیری جھکھڑ بجلی چمکن

بدّل گجن تیں وی ڈرنا

ڈ ر بھو تے کھڑملھی اڑیاں

ہر پل اپنے چوگردے نال

اشنا ئی دی سدہر دھڑکا

 

کسے وچ سخر جوانی دے زو دھگانے

مستی کھور کھندھک کھہڑ ے

انمنی اُشکل ہتھل ہیڑے

ہاسے روسے جھیڑے چہڑاں

مخول مسخری تتل تیڑاں

جیون کھیڈ دے وکھرے وکھرے

پڑاں وچ پہلی واری پاندے

پیر دیاں تصویراں

کھیڈ تماشہ کھپ کھڑلّی

ات امدھول تے الھی

کسے وچ اوہدی ڈھلدی عمر دے

لمے ہوندے پرچھانویں

کسے وچ اوہدے گھاٹے وادھے

کسراں غرضاں لوڑاں تھوڑاں

ساک سین لگ لا کسے وچ

کسے  وچ سجن متر اوہدے

 کسے  وچ دوکھی  ویری

 کسے  وچ اوہدیاں تانگھاں

دی ٹٹ بھج دا ملبہ     

کسے  وچ کواریاں سدہراں دے

پڑے پھسے ہو ئے نقشے

سورج چن گرہن حیاتی

نکے وڈے بھونچالاں

تے روگ کھٹر نال

جپھوڑکی دنگل کھاڑے

شوق دیاں ونگاں دے کدہرے

کھلرے پلرے ٹوٹے

کدہرے منہ ملا حظے سنگتاں

رجھیاں آپو اپنے وختاں

سوچاں سیدھاں سانجھاں دے

وکھو وکھرے نگ

تے ون سونّے کھوٹے سکے

 

ہوش کلاوے  بیہوشی دے

ہوش دے متھے اُکریاں ہویاں

جیون دے جہداں دیاں جھریاں

حیلے بہانے ہوش فکر فیر

  اُسّل وٹّے لیندی

  بیہوشی کولوں چنڈ چھڈاندی

دوڑاں لاندی پچھے مڑ نہ تکد ی

 

کسے وچ اپنے جمے جایاں

دے پل پل دے ساری پوتھی

آل دوالے گھٹناواں دیاں سے تصویراں

ہینساں ہونیاں رتّیاں نہیریاں

برود دی واچھڑ اگ دے بھانبڑ

قہر قتلام  قیامت

اک خدائی خلقتاں دی

اندر باہر جنہاں دا سارا

نرا مرگ تے نرا نرگ

میلے جنجاں میل ویاہواں

دے رنگاں دی ساری رونق

 

اندر دے اس عجا ئب گھر دی

حالت انج دے ہوندی اے جے

  ایہدے اندر نکلن وڑن دی

سدہر وی اک اوکھا کم اے

چج وسب نال وکھو وکھریاں

تختیاں لا کے رکھن دی

اوہنوں ویہل نہیں لگدی

سیجل سلھ زنگال کھہی

 تے ٹٹ بھج تیں بچاون دی

کسے چنگی تھاں سجاون دے

اوہنوں ویہل نہیں لگدی

پر فیر وی بندہ جاگدا ستا   

کار ویہار وچ رجھا ہووے

اکلاّ ہووے غمی خوشی دی

سنگت دے وچ بیٹھا ہووے

ایہدے وچ ای کدہرے

گیا گواچا رہندا اے

اوہنوں اپنا بت وی کدہرے

وکھو وکھریاں روپاں وچ

 وکھو وکھریاں ٹوٹیاں وچ

وکھو وکھرے چوکھٹیاں وچ

جڑیا پڑیا دسدا اے

ایہہ سارا کجہہ اک تھاں کرن دی

اوہنوں ویہل نہیں لگدی

 

فیر وی جہان تے جتھے کدہرے

جہڑا جہڑا من بھاوندا

کوئی نظارا منظر مورت

کوئل دی کوئی کوک کرہے جیوں

پپل بوہڑ دے رکھ کسے تے

دھپ وچ لشکدیاں چیج ووہٹیاں

ساون کالیاں ہاٹھاں دے وچ

ہرے کچور رکھاں دے دوالے

اُڈدے پھردے چٹے بگلے

اُڈدے پھردے رات ٹٹہنے زیویںاُتے

جھرمٹ وچوں ٹٹدے تارے اسمان اُتے

کسے پہاڑ دی اُچی ٹیشی برف چمکدی

جھرنے، دریا، چو ئے ، سر

کوئی درڈّا، اوکھی گھاٹی

تھاں سوہنی کوئی بندہ سوہنا

سوہنا کوئی لشکارا

قصے کتھا، کہانی، کوتا

سینتی گوشہ، راز نیاز

مدہوشی دی محفل کوئی

گیت سنگیت، ناچ دھمال

ماڑی چنگی دیکھی سنی ،بیتی واپری

بھکھ تریہہ کوئی بھل بھلیکھا

دکھ سکھ میل وچھوڑا

سنگ سنگتاں تیں وچھڑن ویلے

کوک کوئی انج دی مارے

ڈاروں وچھڑی کونج کسے دے

ہوون جیوں ککارے

آس نراس غمی خوشی کوئی

ڈاڈھے دا کوئی ستیں ویہیں سو

ماڑے دا کوئی ہاڑا ترلا

بیری دے جیوں بور دے اتے

نیلو دھار دا گھیرا

جتھے کدھرے وی جو دسدا اے

جو کجہہ سجھدا ے

ایہدے وچ اکٹھا کردا جاندا اے

کدے کدے اوہ بوہا کھول کے

لوکاں نوں وی اندر آؤن

دا سدّا دیند اے

اپنے آپ بنا ئے ہو ئے  

اپنے ای بت کسے دے نال کھلو کے

اپنی ہی تصوار بناندا اے

جہڑی جھب ای سوشل میڈیا اتے

 لا کے خوش وی ہوندا اے

ایہدی اوہنوں فکر نہیں ہوندی

یا فیر ایہدی ہوش نہیں ہوندی

خبرے کس دیہاڑے کیہڑے ویلے

کنجی اوہدے ہتھ ہونی اے

بوہا اندروں ای بند ہو جانا اے  

تے ایہہ سارا کھیڈ کھلارا

مو ئے دا ڈیرہ ہو جانا اے!

 

 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels