Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> فِلم رئیس اُتے پابندی

فِلم رئیس اُتے پابندی

جاویدبُوٹا
February 8th, 2017

بڑے دِناں بعدوں آیا ایں اج؟
اوہ یار بس.....
کیہ گل اے؟ کیہ ہویا اے؟
کُجھ ہیگا ای؟
اوہ چِٹی والی ہیگی اے۔
چل اوہو ای پادے بھورا کُو۔
چنگا، دس تاں سہی؟ تیرا مُونہہ کیوں لمکیا ہویا اے؟
یار میں رئیس ویکھن دا مُوڈ بنا رہیا ساں۔ سینسر نے اوہدے اُتے پابندی لا دِتی اے۔
بڑا چنگا کِیتا اے بھاء جی اوہدے اُتے پابندی لا کے۔
کیوں؟ ایہدے وِچ چنگی کیہڑی گل اے؟
سینسر والے آکھدے نیں۔ اوہدے وِچ مُسلماناں دی بے عزتی کیتی گئی اے۔ اوہ فِلم مُسلماناں دے خِلاف اے۔
مُسلماناں دے خِلاف کیویں ہو سکدی اے؟ اوہدے وِچ شاہ رُخ خان اے، پھیر پاکِستانی ایکٹرس ماہرہ خان اے۔ دوویں مُسلمان نیں۔
اِنڈیا بڑا دھوکھے باز اے۔ مُسلماناں توں ای مُسلماناں دے خِلاف کم کرواندا اے۔
اوہ کِیویں؟
شاہ رُخ خاں توں اِک مُسلمان گینگسٹر دا رول کروایا اے۔ جیہڑا بڑا ظالم اے۔ قاتل اے۔ مافیا دا کِنگ اے۔ شراب دا کاروبار کردا اے، اوہ وی ناجائز اَتے غیر قنونی شراب دا کاروبار۔ اَتے ماہرہ خان اوہدی ووہٹی بنی ہوئی اے۔ مُسلمان تاں ایہو جیہا بھیڑا کم کر ای نہیں سکدا۔
ہاں یار، گل تے توں سوا سولہ آنے ٹھِیک آکھی اے...... پر.... قتل، ڈاکے، چورِیاں، بالاں نال جِنسی زیادتی، اغوا، ریپ اَتے ہور بیشمار وارداتاں دِیاں خبراں نال روز ایہہ جیہڑے اخبار بھر ہوندے نیں؟ ٹی. وی. اُتے بریکِنگ نِیوزاں چلدِیاں نیں ایہہ کیہڑے لوک کر دے نیں؟ ایہہ سارِیاں وارداتاں کوئی باہروں آکے کر جاندا اے؟
اوہ توں چھڈ ایس گل نوں۔
یار ایہہ فِلم تاں ہوراں مُلکاں وِچ وی رِیلِیز ہوئی ہووے گے؟
ہاں، کئیاں مُلکاں وِچ۔
مُسلمان مُلکاں وِچ وی؟
ہاں مُسلمان مُلکاں وِچ وی۔
اوہناں دا دھیان ایس پاسے نہیں گیا؟
تینوں کہیا تاں ہے، چھڈ ایس گل نوں۔
نہیں یار، ایہہ چھڈن والی گل اے؟ ساڈی سرکار نوں اوہ جیہڑا ادارہ اے نا، یو. این. او. اوہدے وِچ رولا پاؤنا چاہیدا اے کہ ایس فِلم اُتے پابندی لائی جائے۔ ایس فِلم نال مُسلماناں دا اِمیج خراب ہوندا اے۔
یار تینوں آکھیا تاں ہے ، چھڈ ایس گل نوں۔ چُک ایہہ گلاس۔
یار دوسرے مُسلمان مُلکاں نوں وی ایہدے اُتے پابندی لاؤنی چاہیدی اے۔
یار تیری سوئی کِتھے اڑھ گئی اے؟ چھڈ ایس گل نوں۔ جھلیا، دوسرے مُلکاں دِیاں سرکاراں تے لوک کوئی ساڈے ورگے نیں۔ ایسے کر کے تاں ایتھے پاکِستان وِچ ایہدے اُتے پابندی لائی اے۔
ہاں یار ..... توں کہنا تاں ٹھِیک ای ایں۔ اسیں ایہو جیہے کماں دا ٹھیکہ جُو لیا ہویا اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels