Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> سینما وچ پنجابی دا حصہ۔7لکھاری اشتیاق احمد

سینما وچ پنجابی دا حصہ۔7لکھاری اشتیاق احمد

انگریزوں ترجمہ:زبیر احمد
December 30th, 2016

سوہنے پنجابی بندے تے زنانیاں فلمی صعنت بنن دے شروع دے دناں وچ بمبئے تے کلکتہ ول جاون لگ پئے کیوں جے لہور دی فلم صعنت کول گھٹ سرمایہ سی تے بوہتیاں فلماں وی پنجابی وچ بن دیاں سن جیہناں دے اگوں اپڑ وی گھٹ سی۔ولن،کریکڑ ایکٹر،مخولی،نکّے اداکار، کہانی کار، سکرپٹ لکھاری،سنگیت کار، ہدایت کار،پیشکار، فلماں بناون والے تے پنجاب توں سٹوڈیو دے مالک ،وہ سارے جیہناں نوں نوکری دے موقعے چاہیدے سن تے جیہڑے کسے وی ڈھنگ نال کُل ہندوستان وچ اپنا ناں بنانا چاہندے سن، بمبئے تے کلکتہ ول تر پئے۔ جیویں پہلاں وی دسیا گیا اے پئی اوہناں نوں دکھنی ایشیاء دیاں دوجیاں قوماں اُتے جو برتری سی اوہ اوہناں دا اُردو۔ہندی(ہندوستانی) آون دا گُن سی۔اوہناں دی مُڑ لگدی سی پھیر پربت(شمال) ہندوستان دے اُردو تے ہندی بولن والیاں نال تے بہار تے حیدرا اباد تے دکھنی ہندوستان دیاں راجیاں دیاں ریاستاں نال۔ پرانے ہنڈھے ورتے فلمی اخبارچی پرویز راہی تے یسین گوریجہ نے لہور دے سینما دی تواریخ دا شاندار حال لکھیا اے۔ایس لئی اوہناں دیاں کتاباں لہور،بمبئی، کلکتہ سانگے بارے بڑیاں مزے دار گلاں دسدیاں نیں۔
پرویز کاردار دی کتاب میاں عبدالرشید کاردار بارے چنگی جانکاری دنیدی اے جیہڑے فلم صعنت دا وڈا ناں اے۔ کاردار دا تعلق لہور دی منی پرمنی برادری آرائیں ، زیلدار نال سی جتھے اوہناں دی ریتل حویلی بھاٹی گیٹ وچ سی۔ کاردار((1904-1989 نے اپنی فلم دی ہیروئن بہار اختر نال 1930وچ ویاہ کر لیا۔ بہار اختر اک ہور بہت مشہور سردار اختر دی وڈی بھین سی، جس اپنی پہچان بنائی سہراب مودی دی فلم ’پکار‘ وچ مچھیانی دا پاتر بن کے، ایہہ فلم کانگریس دی تواریخ توں پریرنا لے بنائی گئی سی تے شہنشاہ جہانگیر دے نیاں(انصاف) دے سولے گاوندی اے۔
کاردار دا ایہہ دوجا ویاہ سی تے ایس پاروں چنگی کھپ پئی۔ اوس دے اپنے ٹبر وچ ہی سگوں بہار اختر ولوں وی تے اوس نوں عدالتاں وچ وی دھرویا گیا پر پھیر اوہ بری ہو گیا جد بہار آکھیا اوس نے کاردار نال اپنی مرضی نال ویاہ کیتا ہے۔بہرحال فلم ڈک دتی گئی تے نیگٹوز ساڑ دتے گئے۔ کاردار نے لہور چھڈ دتا تے کلکتہ وچ ایسٹ انڈیا فلم کپمنی وچ رلتی ہو گیا۔اوہ لہوروں اپنے یار وی لے گیا جیہناں وچ کریکڑ ایکٹر ایم۔اسماعیل تے ہنڈے ہیرو نذیر،ہیرالال ،فضل شاہ تے گل حمید شامل سن۔راہی نے پچھے جہیے اک کتاب لکھی اے،آغا حشر کشمیری اور مختار بیگم، جیہڑی مشہور اسٹیج دی گاؤن والی تے اداکار سی(مگروں فلم ہیروئن وی)۔مختار بیگم فریدہ خانم دی وڈی بھین سی۔مختار بیگم امبرسر دی رہن والی سی تے اوس دا ویاہ آغا حشرکشمیری نال ہویا سی،جیہناں نوں سٹیج ڈرامے دا پیو تے ہندوستان دا شکسپیر آکھیا جاندا اے۔ اوہ ایسٹ انڈ یا فلم کمپنی دیاں کئی فلماں وچ ہیروئن بنی سی تے کاردار نوں ہدایت کار بناون وچ وی اوس دا بڑا ہتھ سی۔کاردار دی’ عورت دا پیار‘ سپر ہٹ ہوئی۔پر کمپنی دا بھٹہ بہہ گیا تے کاردار بمبئی چلا گیا، جتھے اوس اخیر کاردار سٹوڈیو اُسار لیا۔ اُس اپنے ویلے دیاں مشہور فلماں بنائیاں جیہناں وچ شاہ جہان،جس وچ کے ایل سہگل نے اپنی حیاتی دا اخیری کم کیتا تے پھیر جنوری 1947 وچ چلانا کر گئے۔ کاردار دیاں دوجیاں یادگار فلماں وچ درد(1947) دُلاری( 1949 ) دل لگی
(1949) تے داستان (1950) سن جس وچ اوہناں سنگیت کار نوشاد نال وی سانجھ پائی۔ ثریا،گیتا بالی،ہیرا لال،شیام،سروش(نسیم احمد جیہڑی قادیان پنجاب وچ جمی) تے گاؤن والے رفیع تے شمشاد بیگم،ایہہ سبھ لہور توں سن یاں ایہناں دا لہور نال تعلق سی اوس دی ڈھانی دا حصہ سن۔ایس توں پچھوں اوہناں لتا منگیشتر توں وی گیت گاوائے تے سنگیت کار سی۔رام چندر ،طلعت محمود وی اوہناں لئی گایا۔
کاردار دی چمک اک ہدایت کار پاروں بہتا چر نہ چلی ۔مُڑ اوہ وسر وی گیا۔اوس دی اخیری ذکر جوگ فلم سی ’دل دیا درد لیا‘(1966)دلیپ کمار ایس وچ سی۔عمومی پکھوں اسیں کہہ سکنے آں کاردار دے بمبئی وچ ہوون پاروں اک لہوری ڈھانی بنی جس وچ نکّے وڈے اداکار ،ہدایت کار تے سنگیت دے لوک سن۔ جیہناں وچ کاردار دا ہتھ ونڈان والا ایم۔صادق وی سی جیہڑا آپوں وی بھاٹی رہن والا سی اوس دی مشہور ی ’ چودھویں کا چاند‘ فلم توں ہوئی سی۔ایم۔صادق 1970 وچ پاکستان آ گیا سی تے چھیتی فوت ہو گیا۔ میں اُس دے پُتر نال ملن دا آہر وی کیتا جیہڑا میرا وچار ہے جیل روڈ لہور ہٹی چلاندا سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels