Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> سینما وچ پنجابی دا حصہ۔ اشتیاق احمد( لڑی3)

سینما وچ پنجابی دا حصہ۔ اشتیاق احمد( لڑی3)

ا نگریزوں ترجمہ:زبیر احمد
December 12th, 2016

کالونی گیراں اوس سینما نوں ترجیح دتی جیہدا مُڈھ متھہاس(متھالوجی) اتے کالونی گیری توں پہلوں دی تواریخ سی۔
میں اک اجیہے پنجاب نوں خیالدا آں جیہڑا کھلارواں تے رلواں اے تے جس وچ اوہ سارے پنجابی بولن والے نیں جو پشور اتے بنوں۔کوہاٹ،کوئٹہ اتے ہور دوجیاں تھاواں اُتے رہندے نیں جیویں چڑھدے ول دہلی تیک۔ کالونی گیری اتے ایس توں پہلاں دا پنجاب جیوندی جاگدی اک تگڑی کہانی ریت رکھدا سی جو سورمیاں تے رومنچک قصّیاں نوں سُر سنگیت وچ کردی سی۔ایس لئی اجہیاں کہانیاں ہیررانجھا،سوہنی میہنوال،سسّی پُنوں، پُورن بھگت بیٹھکاں اتے داریاں وچ گائیاں جاندیاں سن جاں پنڈ دے چونکاں وچ اُچے،لمے رُکھاں ہیٹھ۔کسبّی قصّہ کار پنجاب وچ پھردے رہندے سن جو مہابھارت،رامائن،کربلا اتے امیرحمزہ تے ہوراں دیاں اجہیاں کہانیاں سُناندے سن۔رام لیلا دے دیہاڑ اُتے،ایہہ پھرنتو راہس دھارئیے سُنیراں ساہمنے راہس رچاندے سن۔اِنج ای محفل ء سما جیویں قوالی تے دوجیاں سانجھیاں سنگیت مجالساں صوفی خانقاہواں اُتے رلے ملے دھرمی سُنیراں نوں ٹُنبدیاں سن۔
شاہ حُسین ،اک نابر صوفی جو شراب پیندا تے لہور دیاں گلیاں وچ مست ہو نچدا سی۔ اوس دے اچرج ورتارے اتے انکاری جیون ڈھنگ نے وسوں دے پچھل پیریاں(قدامت پسند) نوں کوڑ چڑھا دتی تے اوہناں اکبر بادشاہ نوں (جیہڑا اوس ویلے لہور ای سی) آکھیا پئی ایس دا مادھو لال نال گوڑھے تعلق پاروں مکّو ٹھپیّا جاوے۔مادھو شاہدرے دا اک سوہنابراہمن مُنڈا سی جو راویوں پار چڑھدے کنڈھے رہندا سی۔اکبر نے اوہناں دے وکھالیاں(احتجاج) نوں مُکھ نہ دھریا ۔شاہ حُسین تے مادھو لال اکو مقبرے وچ دفن نیں تے ورھے وار عُرس وچ بہوں گنتری دے لوک رلت کردے نیں۔مگروں بُلھے شاہ وی جو اک ہور نابر صوفی تے شاندار شاعر سی۔۔اوس نیڑھے دے قصور توں ہجرت کر کے،لہور ڈیرا لایا جتھے اوہناں وی بہوں گنتری دے اپنے ورگے انکاریاں نوں جُوڑ لیا۔اوہ تے اوہناں دے صوفی مُرشد شاہ عنایت قادری ، قادری شطاری سلسلے دے سن جو اسلامی تے ہندو صوفی مت نوں جوڑدا اے تے بندے دے وجود دی اکائی اُتے زور دنیدا اے،اتے ایس وچار نوں وحدت الوجو دا دا ناں دتا جاندا اے۔
جے اسیں ہن جوگی تے بھگتی لہراں دے اثر نوں ساہمنے لیائیے اتے بابا نانک دے مہاں اثر نوں وی لئیے،جیہناں دا سنگی بھائی مردانہ سی تے جتھے وی اوہ بھلیائی دے وچار لئی جاندے سن نال جاندا سی(نانک دُکھیا سبھ سنسار)،اسیں اوس نیہہ نوں موکھلا کرسکدے آں جس وچ کئی طراں دے اثر سن،جیہناں جنگ دیاں سختیاں اتے اوہناں جھیڑیاں نوں نرم کیتا جیہڑے پنجاب دے ویری سن کیوں جے پنجاب ہمیش کابل تے دہلی ۔آگرہ دے فوجی جھیڑیاں وچ ولیا جاندا سی۔ اسیں کہہ سکنے آں پنجاب اک اجیہی رہتلی تے غیرکٹڑتا دی جُوہ سی جتھے دویں دھرم کرڑا اسلام تے کٹڑ ہندومت بہتا چر اک دوجے اُتے بہتا اثر نہ پا سکے اتے انت صوفی،جوگی،بھگتی،گرو ریت نے جگ دُھمی سیانپ ’ جیو تے جیون دیو‘ دے فلسفے دی اگوائی کیتی۔
اورنگ زیب تے مذہبی کٹڑتا دا چڑھا اجہیاں صوفی رتیاں نوں دھکا سی تے میرا وچار اے سنگیت اُتے ہٹکاں نیں بھاویں پنجاب دے مسلمان سنگیت کاراں تے دوجیاں نوں شیعہ فرقے ول گھل دتا کیوں جے اصلوں جدوں اوہ ہندو مت توں اسلام ول آئے تے اوہناں نوں صوفیاں دا تھاپڑا سی جیہڑے رلویں تے جوڑویں وچاراں دی گل کردے سن تے سُنی اصولاں نوں مندے سن۔ایہہ اک اجیہی گل اے جو کھوج دی منگ کردی اے۔اوہناں دی اک لگر سُنی رہی تے ایہہ قوالی گاون والے بن گئے۔اورنگ زیب دی شُدھی جو نقصان کیتا خورے اوہ ایناں گوڑھا نہ ہووے۔مہاراجہ رنجیت سنگھ (1799-1839)دے راج وچ دربار دا سنگیت کاراں نوں تھاپڑا مُڑ پرت آیا تے لہور وچ گاؤن نچن آلیاں(کورٹیزن) دی رہتل دی چڑھتل ہوئی۔ اصل وچ مہاراجہ دی من مرضی دی حیاتی وچ گاؤن نچن آلیاں دے کوٹھیاں اُتے آون جاون رہندا سی۔ایس نال سنگیت تے ناچ نوں چنگی ہلہ شیری ملی تے راہس دھاریاں تے نقلیاں نوں وی۔رنجیت سنگھ دی موت پچھوں لہور دی ریاست چھیتی ڈھیہہ پئی تے برطانیہ نے فوجی پکھوں پنجا ب اُتے 1846وچ مَل مار لیا۔فلماں تے سینما دا وارا اجے بھلک وچ دُورڈا سی پر ایس دا مُڈھ پنجاب اندر جیوندے ماندے سنگیت ،ناچ تے مشہور راہس دھاریاں دی شکل وچ رکھ دتا گیا سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels