Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> سینما وچ پنجابی دا حصہ۔1

سینما وچ پنجابی دا حصہ۔1

اشتیاق احمد انگریزوں ترجمہ:زبیر احمد
November 29th, 2016
5 / 5 (1 Votes)

(اسیں وچار دے پڑھیاراں لئی لڑی وار اشتیاق احمد دے ایہہ لیکھ ورتاندے پئے آں۔ اپنے ایہناں کھوجی لیکھاں وچ لکھاری نے پنجابی تے پنجابیاں نے سینما وچ جو حصہ پایا اے اوس دی دس پائی اے۔اشیتاق جی پنجاب دی وار (تواریخ) وچ اوہناں گلاں نوں پھولیا اے جیہناں ایس دی سنگیت،لوک سُرت تے سینما دی اُساری کیتی اے۔ )
ساڈے وچلے میل دے جیاں لئی جو سن 50 تے سن 60 دے دہاکیاں وچ لہور وچ وڈے ہوئے،ساڈے لئی سبھ توں وڈی خُشی تے موج میلہ ایہہ سی جو اسیں اپنے جیبی پیساں چوں ایہنے پیسے بچا لئے تاں جو لہور دے سینمے وچ جا کے فلم ویکھ سکیے۔اصل وچ میں جدوں وی ٹمپل روڈ توں ریگل یاں پلازا سینما جاندا ساں میری نبض تیز ہو جاندی سی،ایہناں دویں سینماواں وچ ہالی وڈ تے برطانوی فلماں وکھایاں جاندیاں سن۔ جویں ای اسیں مال روڈ پار کر کے میکلوڈ روڈ ریگل راہیں یاں ایبٹ روڈ چیرنگ کراس راہیں اپڑنے ساں،اوڈین سینما نوں چھڈ کے،سارے سینمے،رجنٹ،رٹز،قیصر،پیلس،رتن،صنوبر،نشاط تے کپیٹل،بولی وڈ تے لولی وڈ دیاں فلماں وکھایاں جاندیاں سن۔کجھ دُور اڈے، لہورریلوے ٹیشن کول ریوالی سینما سی۔ کئی بھاٹی گیٹ دے باہر سن تے پھیر کراؤن سینما گڑھی شاہو کول نکل آیا۔کجھ ہور ایبٹ روڈ اُتے کھل گئے تے ایہہ بوہتے شملہ پہاڑی ول سن۔ ہور وی اُسرے جویں گلبرگ مین مارکیٹ کول تے فیروز پور روڈ کول۔ایہہ پچھوں بنے سن اتے ہن 42 ورھیاں بعد،ایتھے گریٹر سٹاک ہالم ،سولانہ وچ اپنے اپارٹمنٹ وچ بیٹھیاں،میں اوہناں دے ناں چیتے نہیں کر سکدا۔مینوں دسیا گیا اے بالپن دیاں یاداں چیتے اُتے نقش رہندیاں نیں جد بعد دیاں مدھم ہو جاندیاں نیں یاں پھکیاں پے جاندیاں نیں۔اپنے ہندوستانی پڑھیاراں لئی جیہناں دی لہور نال جُڑت سی،کجھ سینمے جیہناں دا میں ذکر کیتا اے اوہناں لئی ہورویں ناں سن۔
پنجابی اداکار پرتھوی راج دا وچار سی فلم تھیٹر دی مندراں تے مسیتاں نال ساکا چاری اے۔
مینوں چیتے اے پئی جد میں مُنڈا جیہا ساں گواہنڈ دی اک کُڑی موہ لیا سی،تے میں امتحاناں وچ چنگے نمبر نہ لئے۔میرے پیو نے میری ماں نوں اک مندی چٹھی پائی،جیہڑی کراچی رہندی سی(میرے ماپیاں وچ 1950وچ طلاق ہو گئی سی جد میں نرا تن ورھیاں دا ساں تے ایہہ پھٹ اصلوں کدی وی میلیا نہیں گیا۔) جس وچ میرے بھیڑے نیتجیاں دا کارن ایہہ سی جو میں پڑھائی کرن دی تھاں ہر ویلے سیلون ریڈیو سُندا آں۔ بوہتے پنجابیاں ہار اوہ سنگیت تے سنگیت کاراں نوں چنگی اکھ نال نہیں ویکھدا سی پر جد اوس قوالی سُننی اوس مست ہو جانا ۔ ایس گل نے مینوں حرانی وچ پا دتا اوس فرق بارے جو اوہ سنگیت دے جائز تے ناجائز وچکار کھچدا سی۔افلاطون جو فرق پاندا اے سنگیت وچ جو روح نوں اُتھاں چکدا اے اتے جو جذبیاں نوں بھرماوندا اے،اوہ فرق کٹڑ وادی (پیورٹن) سوچ دی مُڈھ اے۔یونانی فیلسوف اک مثالی، مکمل ریاست بنانا چاہندا سی اتے مثالی شہری بناون لئی،اوس نے ہٹکاں لایاں تاں اوہناں اثراں نوں جڑوں مُکایا جا سکے جو جذبیاں نوں بھڑکاندے نیں۔
اسلامی کٹڑتا پکی طراں ایہناں ونڈاں اُتے ای مُڈھ رکھی کھلوتی اے۔میں کٹڑتا نوں بہر حال بریلوی ریت وچ رکھ کے سوچدا پیا آں کیوں جے دیوبندی تے وہابی کُل سنگیت نوں حرام سمجھدے نیں۔۔قوالی نوں وی بھاویں اوہ اذان نوں سلاہندے ہن جے ایس وچ سنگیت دی مٹھاس ہووے۔اسیں کہہ سکنے آں پئی سنگیت دی جگت گیری توں نہ نہیں کیتی جا سکدی۔
مہان پنجابی ہنڈیا اداکار پرتھوی راج کپور نے 1960 دے دہاکے دے پوند وچ ہندوستانی تے پاکستانیاں دے لندن وچ اک اکٹھ وچ گل کردے دسیاپئی فلم تھیٹر دی مندراں تے مسیتاں نال ساکاچاری اے،کیوں جے اوتھے وی لوک یقین دے پک نال آوندے نیں۔ میں سمجھناں آں ایہہ بہت باریک گل سی۔فلماں،مذہبی تے سیکولر اختیار رکھن والے اداریاں وانگ خیالاں تے آدرشاں نوں شکل دنیدیاں نیں اتے وسیبی تے اخلاقی سبق پیش کردیاں نیں۔ایہہ ہی کارن اے پئی مذہبی تے سیکولر اسٹبلشمنٹ ہمیش سینما دی اثر بارے ہشیار رہندیاں ہن۔ہٹکاں(سنسرشپ) سارے وسیباں وچ ہوندیاں نیں اتے اجیہے ویلے وی آئے جد سینمے نوں نرا پراپیگنڈا بنا دتا گیا جیویں نازی جرمنی تے سویت یونین وچ ہویا۔ ہور تے ہور لبرل امریکا نے وی میکارتھی دور (1949-1959) دا نشان چھڈیا اے جد اوہناں نوں جیہناں اُتے کیمونسٹ ہوون دا دوش سی تے جو فلم تے موج میلے دیاں صعنتاں وچ کم کردے سن،اوہناں دے پچھا کیتا گیا تے نشانہ بنایا گیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels