Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> عالم لوہار، عوامی موسیقی دا شہنشاہ

عالم لوہار، عوامی موسیقی دا شہنشاہ

محمد اسلام شاہ
May 30th, 2014

مینوں جرمنی تے برطانیہ دیاں لائبریریاں دے موسیقی دے شعبے ویکھن دا موقعہ ملیا، اتے ایہناں لائبریریاں وچ موجود عوامی موسیقی دے خزانیاں دا جائزہ لے کے میں اپنے مطالعے دی روشنی وچ پورے یقین نال ایہہ گل کہہ سکنا واں جے پنجاب وچ عوامی موسیقی دا خزانہ کسے وی دوجے ملک توں گھٹ نہیں، سگوں ڈھیر ودھیرا اے۔ ایس طرح پنجاب نے ان گنت فوک سنگر وی پیدا کیتے۔ ایہہ فوک سنگر کسے اک یاں دو صنفاں وچ یاں چند نغمیاں تے عبور رکھدے سن پر عالم لوہار ویلے دیاں ساریاں رائج عوامی موسیقی دیاں صنفاں تے لاتعداد نغمیاں دے بولاں تے ایہناں دیاں دھناں تے کمال عبور رکھدے سن۔ مختلف محفلاں وچ ساری ساری رات موسیقی پیش کیتی۔ شاہ حسین کالج دی اک محفل وچ طالب علم وی موجود سن، عالم لوہار ساری رات موسیقی وی سنائی تے طالب علماں نوں ہر صنف تے ہر نغمے بارے معلومات وی دِتیاں۔
عالم لوہار 1927ء وچ جمال دین لوہار دے گھر پیدا ہویا۔ اپنے مغل گھرانے دے حوالے نال لوہار دے فن وچ مکمل کاریگری سکھی۔ پڑھن لکھن لئی اوہنوں اپنے نانکیاں دے پنڈ اپنے مامے ہوراں کول جانا پیا۔ ایہناں دے ماموں اہل ذوق سن۔ موسیقی دیاں محفلاں تے میلیاں وچ عالم نوں نال لے جاندے سن۔ ہولی ہولی ایہناں اکٹھاں وچ عالم لوہار آپ وی گیت گونے شروع کر دتے۔ اپنا آبائی پیشہ وی کجھ سال جاری رکھیا تے موسیقی وی نال نال پروان چڑھدی رہی۔ دسویں جماعت دا امتحان پاس کرن مگروں چوکھا دھیان موسیقی ول ہو گیا۔ مشک ملا وانگوں کجھ رکاوٹاں معاشرتی طور تے پیش آئیاں پر اک صوفی دی دعا نال فیر گانا شروع کر دتا۔
صوفیاں نے سدا توں موسیقی دی سرپرستی کیتی اے تے پاکیزہ موسیقی راہیں عام لوکائی دے ذوق نوں اُچیرا کیتا تے ایہدے نال نال لوکاں نوں روحانیت والے پاسے لیاندا۔
عالم لوہار دی آواز عوامی موسیقی لئی موزوں ترین سی۔ آواز دی رینج بلندیاں نوں چھوندی سی۔ پنڈاں تھاواں تے کُھلیاں فضاواں وچ اجیہی آواز دا جادو دونا ہو جاندا اے۔
ایہناں دا معاملہ ذرا وکھرا سی۔ اوہ لوہے نوں موم کردا سی۔ آواز دیاں سختیاں نوں ایس طرح سوز گداز نال پیش کردا سی جے کسے دے کن نوں سختی محسوس نہ ہووے سگوں ہر نغمہ لوکاں دے دلاں وچ لہہ جاوے۔ اوہدی مقبولیت نوں تک کے ریڈیو، ٹیلیویژن تے فلم والیاں نے اوہدے کولوں نغمے گوائے۔ برطانیہ، آئر لینڈ، کینیڈا، مشرق وسطیٰ تے دوجے ملکاں والیاں وی اوہناں نوں اپنے ملکاں وچ بلایا سگوں بار بار بلایا۔ ایہہ وی عالم لوہار دی خوش قسمتی اے جے اوہناں نوں اپنے دور وچ پاکستان دی دوجے ملکاں وچ مقبولیت بنان وچ سبھ توں زیادہ حصہ مِلیا۔
اپنے تھیٹر راہیں ملک دے کونے کونے وچ اوہناں پنجاب دی موسیقی نوں عام کیتا۔ ایس توں اڈ ہر علاقے دی موسیقی تے نغمیاں نوں وی اپنے خزانے وچ شامل کیتا۔ فیر ایہہ سارا خزانہ عالمی پدھر تے عام کیتا۔ اوہناں دیاں ایہناں خدمتاں نوں ویکھ کے 1979ء وچ حکومت نے اوہناں نوں تمغۂ حسن کارکردگی عطا کیتا۔ اک واری اک حادثے دا شکار ہوئے پر ایس حادثے دا دُکھ وی خوش دلی نال گاؤندیاں ہویاں برداشت کیتا۔
پنجابی عوامی موسیقی دے لوک رنگ نوں جیہڑے موسیقاراں نے خوبصورت انداز وچ پیش کیتا اوہناں دے ناں نیں ماسٹر جھنڈے خاں، ماسٹر غلام حیدر، کالے خاں، خواجہ خورشید انور، بابا جی اے چشتی، وزیر افضل، عبد الحق قریشی تے ماسٹر عبد اللہ۔ جیہڑے فنکاراں اپنے اپنے انداز تے اپنی پسند دی صنف وچ رج کے خدمت کیتی اوہناں دے ناں ایہہ نیں، طفیل نیازی، عنایت حسین بھٹی، بالی جٹی، عنایت کوئیا، ریشماں، سائیں اختر حسین، مولوی نور محمد ایمن آبادی، شریف غزنوی، نذیر بیگم، زینت بیگم، محمد صادق، محمد اقبال، شوکت علی، حامد علی بیلاتے ایہناں ساریاں دی مکمل ترجمانی پاکستان دی گلی گلی تے دنیا دے مختلف ملکاں وچ سبھ توں زیادہ خدمت کرن دا سہرا عالم لوہار دے سر تے وے، ایس واسطے اسیں اوہنوں شہنشاہِ عوامی موسیقی وی کہہ سکنے آں۔
244244244


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels