Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> اوسلو وچ فیض احمد فیض ؔ ہوراں دی سوویں ور ہے گنڈھ منائی گئی۔

اوسلو وچ فیض احمد فیض ؔ ہوراں دی سوویں ور ہے گنڈھ منائی گئی۔

خالد حسین تھتھال
December 27th, 2011
5 / 5 (3 Votes)

ادبی سنگت اوسلو نے ١٧ دسمبر ہفتے نوں فیض احمد فیض ؔ ہوراں دی سوویں ور ھے گنڈھ مناؤڻ دا اکٹھ کیتا ۔ ادبی سنگت اوسلو دے آگو پرویز اقبال ہوراں سموہت کردیاں دسیا جے ایس اکٹھ وچ اوسلو موسیقی تے ثقافت سکول تے امیر خسرو تنظیم دی سانجھ سیر وی اے۔ پروگرام چھوہندیاں جان دتہ ہوراں فیض احمد فیض ؔ ہوراں دی غزل موسمِ گْل ہے تمہارے بام پر آنے کا نام ، بڑ ی سُر وچ گائی تے رلتیاں رج کے داد دتی ، طبلے تے سنگت جان دَتہ دے کوئی دس باراں سالاں دے پُتر دانیال دتہ نے کیتی تے بڑا سوہڻا طبلہ وجایا تے بڑی واہ واہ ہوئی۔

ارشد بٹ ہوراں فیض احمد فیض ؔ ہوراں دے بارے گل کردیاں آکھیا جے فیض صاحب چھڑے پاکستان دے شاعر ای نہیں اوہ سارے برِصغیر پاکستان ، انڈیا تے بنگلہ دیش دے نال نال دنیا تے جتھے جتھے وی اردوسمجھڻ بولڻ والے لوک نیں ، اوہناں سب دے شاعر نیں۔ اردو دے نال نال اوہ ہندی والیاں دے وی شاعر نیں ایس لئی جے ایہناں دونواں بولیاں والے اک دوجے دی بولی نوں چنگی طرحاں سمجھدے نیں، اوہناں ایہدے لئی ہندی فلماں دی مثال دتی۔ ایس اکٹھ دے آہر وچ انڈیا دے لوکاں دی رلت نوں ساہمڻے رکھدیاں آکھیا جے ایہہ سچ اے جے ادب تے موسیقی دُپھیڑاں نوں گھٹاندے نیں۔اخیر وچ فیض صاحب دے سیاسی تے نظریاتی پکھ بارے گل بات کردیاں اوہناں آکھیا جے فیض ؔ صاحب ازادی توں پہلاں کمیونسٹ پارٹی انڈیا دے رکن اہے تے ازادی مگروں اوہ پاکستان کمیونسٹ پارٹی دے رکن بڻے۔آپڻی سیاسی سیدھ کارن اوہ پنج سال جیل وچ رہے۔ فیض ؔ صاحب ایس پیغام دے داعی اہے جے ونڈ تے وکھیویں دے پاروں وی اسیں دوستی تے امن نال رہ سکنے ہاں۔

امیر خسرو تنظیم دے آگوواں وچوں شری لال ہوریں انڈین پنجاب توں نیں تے موسیقی سکھاؤندے نیں۔ پاکستانی تے بھارتی مِتراں دا ایس اکٹھ وچ رلنا ایس گل دی گواہی دیندا اے جے ادب تے فن حداں سرحداں دی ولگڻاں توں باہر رہ کے لوکاں نوں نیڑے لیاؤندے تے آپس وچ دوستی تے امن دے ودھا دا سبب بڻ دے نیں۔
فیر شوکت چنگیزی ہوراں فیض احمد فیض ؔ ہوراں دی غزل گلوں میں رنگ بھرے بادِ نو بہار چلے، گائی تے رلتیاں بڑی واہ واہ کیتی۔

ایہناں حرفاں دے لکھاری نے فیض احمد فیض ؔ ہوراں دے سوویں ورہے دے جشناں دی گل کردیاں دسیا جے پاکستان، بھارت تے بنگلہ دیش توں وکھ یورپ ، روس، شمالی امریکہ تے ہور کئی دیساں وچ ایہہ سال بڑے آہر نال منایا جا رہیا اے۔ کئی دیساں جیویں یو کے دے کئی شہراں وچ ایہہ اکٹھ کیتے گئے۔ اوسلو وچ وی ادبی سنگت دا ایہہ اکٹھ سلاہڻ جوگ اے۔ فیض صاحب د ی شاعری پاکستان دی تاریخ تے سیاست د ے گھُنڈ ای کھولدی اے۔ اوہناں دا ایہہ وَل تے چج ای لوکاں نوں من کھچواں لگا۔
اب وہی حرفِ جنوں سب کی زباں ٹھہری ہے جو بھی چل نکلی ہے وہ بات کہاں ٹھہری ہے
ہم نے جو طرزِ فغاں کی ہے قفس میں ایجاد فیض ؔ گُلشن میں وہی طرزِ بیا ں ٹھہری ہے

فیر میں فیض احمد فیض ؔ ہور اں دی پنجابی نظم، ربا سچیا توں تے آکھیا سی جا او بندیا جگ دا شاہ ایں توں، پڑھی تے فیر فیض ہوراں ؔ دے چلاڻا کرن ویلے لکھی گئی آپڻی نظم سڻائی۔
کلیاں پھُل تریل سویر شاعرا تیرے ہجر وچ اج اُداس ہوئے
اک رات دی اکھ وی تر ہوئی کئی دن وی ا ج اُداس ہوئے

ایہدے مگروں نارویجین جاز سِنگر ساؤانی اَیلی ہیللاند نے فیض صاحب دی نظم تنہائی تے غزل گُلوں میں رنگ بھرے بادِ نو بہار چلے، انگریزی وچ بڑے کمال دیاں گائیاں تے رلتیاں نے کُھل کے داد و ی دِتی۔ اوہنے فیض ہوراں دے کلام دے اک انگریزی ترجمے وچوں آپ ای ایہناں نوں چُڻیا۔ اوہنے ایہہ وی آکھیا جے میں ایہناں دے کلام نوں پہلی وار پڑھیا اے تے میں بڑی موہت ہوئی ہاں۔

وقفے مگروں سُمیش شمّی نے فیض صاحب دیاں پنجابی نظماں، ربا سچیا توں تے آکھیا سی تے اُٹھ اُتانہہ نوں جٹا مردا کیوں جانا ایں، بڑیاں سوہڻیاں گائیاں تے بڑی واہ واہ ہوئی۔ طبلے تے سنگت شری لال تے منجیت سنگھ ہوراں کیتی۔ مگروں سکندر خان راگ میگھ وچ اپنے فن دا وکھالا کیتا۔ انڈیا توں آئے سرود نواز مُکیش ہوراں راگ جھنجھوٹی نال محفل وچ اک سماں بنھ دتا۔ اخیر تے شری لال ہوراں دی نونہہ سُنِندا نے فیض احمد فیض ؔ ہوراں تے اوہناں دی کوتا دی سلاہڻا کردیاں اک راگ گایا اوہناں دے نال طبلے تے سنگت اوہناں دے پتی جے شنکر ہوراں کیتی جیہڑے پیشے ولوں ڈاکٹر نیں۔ سُنِندا ہوراں دے گاؤڻ نا ل بڑا رنگ بدھا۔ اخیر تے پرویز اقبال ہوراں ایس رنگا رنگ محفل لئی رلتیاں تے کلاکاراں دا شکریہ آکھیا تے انج فیض احمد فیض ؔ ہوراں دیاں یاداں تے اوہناں دے کلام نال گوتو گوت ایہہ محفل توڑ چڑھی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels