Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> لوک گائیکی دے دو وڈے فنکار: عالم لوہار تے الن فقیر

لوک گائیکی دے دو وڈے فنکار: عالم لوہار تے الن فقیر

وچار ڈیسک
July 2nd, 2011
4 / 5 (1 Votes)

ساز تے آواز دی دنیا وچ جولائی دا مہینہ پاکستان دی لوک گائیکی دے دو وڈے فنکاراں دے حوالے نال یاد کیتا جاندا ہے۔ عالم لوہار تے الن فقیر!!

ایہہ دوویں فنکار دو وکھریاں وکھریاں بولیاں نال سانگا رکھدے نیں۔ عالم لوہار پنجابی جدوں کہ الن فقیر سندھی بولی دے لوک فنکار سی تے سببیں جولائی دے پہلے ہفتے، 3 تے 4 جولائی نوں دوویں ایس دنیا توں ٹر گئے تے انج جولائی دا مہینہ ایہناں فنکاراں دا اک حوالہ بڻ گیا۔

عالم لوہار نوں چمٹا وجاؤڻ تے آواز دا جادو جگاؤڻ وچ بڑا کمال سی۔ اوہناں دے گائے ہوئے پنجابی گیتاں دی خشبو اج وی تھاں تھاں کھلری ہوئی ہے۔ اوہناں دی اُچیچی پچھاڻ اوہناں دا چمٹا سی۔ اوہناں نے چمٹے نوں سنگیت دے طور تے ورتیا تے دنیا نوں اک نواں ساز دتا۔

عالم لوہار پہلی مارچ 1928 نوں گجرات دے اک نیڑلے پنڈ وچ جمے۔ اوہناں نکی عمر توں گلوکاری شروع کیتی۔ اوہ آپڻے اُچیچے انداز تے آواز پاروں بہت چھیتی لوکاں وچ مشہور ہو گئے۔ اوہناں دی گائی ہوئی '' جگنی'' اج وی لوک سنگیت دا انگ ہے۔

جگنی اینی مشہور ہوئی پئی اوہناں دے مگروں آؤڻ والے کئی فنکاراں نے ایہنوں آپڻے آپڻے ڈھنگ وچ پیش کیتا پر جیہڑا کمال عالم لوہار نے آپڻی آواز نال پیدا کیتا اوہ کسے دوجے توں نہ ہو سکیا۔ جگنی دی شہرت دا گویڑ ایس گل توں وی لایا جا سکدا ہے پئی ایس دور دی اردو تے پنجابی فلماں وچ وی جگنی نوں اُچیچا رلایا گیا جدوں کہ جگنی دی پکچرائزیشن وی اوہناں تے ہوئی۔ جگنی توں اڈ عالم لوہار نے کئی ہور وکھریاں دھناں وی بڻائیاں جیہناں وچ ' دھرتی پنج دریاں دی '' بہت پسند کیتی گئی۔

عالم لوہار دی گائیکی دا ڈھنگ وکھرا تے ان چھوہیا سی جیہڑا ملک وچ ہی نہیں باہرلے ملک جتھے پنجابی تے اردو بولی نہیں سمجھی جاندی اوتھے وی لوک اوہناں دیاں سوہڻیاں دھناں تے جھوم اٹھ دے سی۔

چمٹا وجاؤڻ دے نال نال گلوکاری دا فن بھاویں محدود ہو گیا ہے تے چمٹا وجاؤڻ والیاں دی گڻتی مکدی جا رہی ہے پر عالم لوہار دے پتر عارف لوہار نے چمٹے توں چھڑڻ والی نویں توں نویں دھناں راہیں آپڻے پیو دے فن نوں جیوندا رکھیا ہویا ہے سگوں اوہ آپوں وی ایس فن وچ دوجیاں توں وکھرے نیں۔

سندھی بولی دے لوک فنکار الن فقیر صوبہ سندھ دے اک نکے جہے علاقے جام شورو وچ 1922 وچ جمے۔ الن فقیر نے صوفیانہ کلام گا کے ملک گیر شہرت پائی۔ اوہناں دی گائیکی دا اک نویکلا ڈھنگ سی جیہڑا اوہناں نوں دوجے لوک فنکاراں توں وکھرا کردا ہے۔

اوہناں آپڻی گائیکی پاروں کئی ایوارڈ لئے۔ اوہناں وچ 80 دے دھاکے وچ ملن والا صدارتی ایوارڈ سب توں اُتے ہے۔ اوہ 4 جولائی 2000 نوں چلاڻا کر گئے پر اوہ اج وی آپڻے چاہوڻ والیاں دے دلاں وچ جیوندے نیں۔

الن فقیر دی گائیکی نے فلسفیانہ عشق الٰہی پاروں لوکاں دے دلاں وچ تھاں بڻائی۔ اوہناں نے روایتی لوک گائیکی نوں اک نواں انداز بخشیا۔
الن فقیر نے شاہ عبدالطیف بھٹائی دی شاعری نوں وی آپڻی آواز وچ پیش کیتا۔ اوہناں دا گایا ہویا اک گیت'' تیرے عشق میں جو بھی ڈوب گیا۔۔۔ اسے دنیا کی لہروں سے ڈرنا کیا۔۔''
اوہناں نوں فن دی دنیا وچ امر کر گیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels