Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> پرکاش مہرہ: اک فلمی بندے دی غیر فلمی پر درد بھری کتھا

پرکاش مہرہ: اک فلمی بندے دی غیر فلمی پر درد بھری کتھا

وچار ڈیسک
May 18th, 2011

پرکاش مہرہ بالی ووڈ فلماں دے ڈائریکٹرز تے پروڈیوسرز دیاں صفاں دا انج دا ناں ہے جیہنے اپنیاں فلماں وچ گجھیاں اپنی حیاتی دا، اپنے دل دا درد پرویا۔ خورے بہت گھٹ لوکاں نوں ایس گل دا پتہ ہووے گا پئی امیتابھ بچن دی فنی زندگی نوں عروج بخشڻ والی فلم ' زنجیر' دا رول ایسے فلم دے ڈائریکٹر پروڈیوسر پرکاش مہرہ نے امیتابھ توں پہلوں راج کمار نوں آفر کیتا سی پر راج کمار نے کسے پاروں ایہہ کردار ادا کرڻ توں روک دتا جیہدے پاروں ایس کردار نے امیتابھ بچن دی قسمت ہی بدل دتی۔ ایس فلم نال اوہناں نے کامیابی دا اوہ سفر کیتا جیہڑا اج وی جاری ہے۔ حالانکہ ہڻ نہ راج کمار رہے نہ پرکاش مہرہ !!

ہندی فلماں دے کامیاب ہدایت کار فلمساز پرکاش مہرہ تے امیتابھ وچ اینی ڈوہنگی دوستی سی پئی پرکاش نے اپنی حیاتی دا چھیکڑا ساہ وی امیتابھ بچن دے ساہمڻے ہی لیا۔

ریاست اتر پردیش دی سوندھی مٹی وچ جنم لے کے ممبئی آڻ وسڻ والے پرکاش مہرہ نے جیہڑا مقام پایا، اوہدی حسرت ان گنت لوک کردے نیں۔ اوہ گیت کار بڻڻ دی سدھر لے کے ممبئی آؤندے سی پر اوہناں دی قسمت وچ گیت کار بڻڻا نہیں۔ ڈائریکٹر تے پروڈیوسر بڻڻا لکھیا سی۔

پرکاش اپنی حیاتی وچ فلمی شاعر انجان توں بہت متاثر سی۔ خورے اوہ آپوں وی انجان ورگی ہی شہرت چاہوندے سی۔

پرکاش دیاں بہتیاں فلماں وچ ہیرو نوں لاوارث وکھایا جاندا سی جیہدے تے دوجے لوک تے حیران سی ہی آپوں انجاڻ وی پرکاش مہرہ توں کئی واری ایہہ سوال پچھدے سی پئی تیریاں فلماں دا ہیرو لاوارث ہی کیوں ہوندا ہے پر پرکاش ہمیش ہس کے ٹال دیندے سی۔

لاوارث ہیرو دے کردار وی سب توں بہتے امیتابھ نے ہی نبھائے۔ فلم ' شرابی ' دا ہیر لاوارث نہیں سی پر پیو ہوندیاں ہوئیاں وی امیتابھ نوں ایہہ کردار لاوارثاں ورگا ہی کرنا پیا۔ پرکاش مہرہ دی ماں نکیاں ہوندیاں ہی چلانا کر گئی سی جدوں کہ پیو پاگل ہو گیا سی جیہدے پاروں پرکاش نوں لاوارثاں ورگی ہی حیاتی لنگھاؤڻا پئی۔ پرکاش مہرہ نوں ایس گل دا بڑا ہرکھ سی تے اوہناں دیاں فلماں وچ جیہڑا لاوارث ہیرو ہوندا سی خورے اوہدا درد اوہی ہوندا سی جیہڑا پرکاش دا اپنا درد سی۔

پرکاش مہرہ نے انجان نوں اک واری اپنا اک گیت 'اگر دل ہمارا شیشے کے بدلے پتھر کا ہوتا ' سنایا سی جیہنوں سڻ کے انجان نے پرکاش مہرہ دے مڈھلے کیرئیر وچ ہی پیش گوئی کر دتی سی پئی ایہہ منڈا اپنے جگر وچ کئی طوفان لئے ہوئے ہے۔ پرکاش نے موقع ملدیاں ہی ایہہ گیت اپنی فلم وچ وی پا دتا۔ انجان تے پرکاش مہرہ دی سنگت بہت ڈوہنگی سی۔ اتے ایہہ چھیکڑلی عمر تیکر قائم رہی۔

انجان دے مگروں پرکاش مہرہ دی دوجی پسند قادر خان سی۔ قادر خان نال پرکاش مہرہ دی انج دی جگل بندی سی پئی اوہناں دی موت تے قادر خان نے کہیا سی اوہ یتیم ہو گئے نیں۔ پرکاش مہرہ اوہناں دے ڈائریکٹر ہی نہیں سگوں استاد وی سی۔

انج دے لوکاں دے ساتھ تے محبت نے ہی پرکاش مہرہ نوں اُس تھاں تے اپڑایا جتھے سارے سوکھیاں نہیں بچ سکدے۔ سال 1968 وچ فلم '' حسینہ مان جائے گی '' دی ڈائریکشن نال اپنے فنی سفر نوں شروع کرڻ والے پرکاش مہرہ نے کدی پچھے مڑ کے نہیں ویکھیا پرکاش کم کردے گئے تے لوک اوہناں نوں سلاہوندے رہے۔ اپنی فلم ' زنجیر' توں پرکاش مہرہ نے بالی ووڈ نوں اینگری ینگ مین امیتابھ بچن دتا۔اوہناں دوہواں دی جوڑی تے دوستی چھیکڑلے ویلے تیکر لوکاں لئی مثال بنی رہی۔

'' لاوارث '' '' مقدر کا سکندر '' '' ہیرا پھیری '' '' شرابی '' '' جادوگر '' تے '' نمک حلال '' وغیرہ امیتابھ دے نال پرکاش دی انج دیاں فلماں نیں جیہناں نوں کدی بھلایا نہیں جاسکدا۔ فلم '' شرابی '' وچ تیراں تاریخ نوں امیتابھ توں بڑا نیش دن اکھواڻ والے پرکاش مہرہ دا جنم وی تیراں تاریخ نوں ہی ہویا سی۔

امیتابھ دے نال باکس آفس دی تاریخ بدلڻ والے پرکاش مہرہ نے اپنے تئی سالاں دے فلمی جیون وچ کوئی ویہہ فلماں وچ اپڻا آپ منوایا۔ سال دو ہزار اک وچ فلم ' مجھے میری بیوی سے بچاؤ ' دے مگروں پرکاش مہرہ دے فلمی سفر نوں بریک لگے۔ ایسے وچکار اوہناں دی شریک سفر وی اوہناں دا ساتھ چھڈ گئیاں۔ بیوی دی موت نال پرکاش مہرہ اندروں ٹٹ گئے۔ اخیر 17 مئی 2009 نوں امیتابھ دے نال اپنی اک ہور وڈی فلم '' گالی '' دی میکنگ دی حسرت لئے اوہ ایس دنیا توں ٹر گئے۔

پرکاش امیتابھ جوڑی صرف فلماں تیکر ہی محدود نہیں رہی سگوں اوہناں وچکار نہ ٹٹن والا جذباتی ساک وی سی۔ فلماں وچ اوہناں نے جو کجھ کیتا اوہ سارے جاڻدے نیں پر بہت گھٹ لوک جاڻدے نیں پئی 17 مئی 2009 نوں سویرے چھ وجے جدوں پرکاش مہرہ نے چلانا کیتا تے اوہناں کول صرف امیتابھ ہی موجود سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels