Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> پیٹ واسطے سب خرابیاں نیں ۔۔۔۔وارث شاہ

پیٹ واسطے سب خرابیاں نیں ۔۔۔۔وارث شاہ

May 8th, 2011
5 / 5 (1 Votes)

363
کار ساز ہے رب تے پھیر دولت سبھو محنتاں پیٹ دے کار نے نی
نیک مرد تے نیک ہی ہووے عورت اوہناں دوہاں دے کم سوار نے نی
پیٹ واسطے پھرن امیر در در سید زادیاں نے گدھے چارنے نی
پیٹ واسطے پری تے حور زاداں جان جن تے بھوت دے وارنے نی
پیٹ واسطے رات نوں چھوڑ گھردر ہو پاہرو ہوکرے مارنے نی
پیٹ واسطے سبھ خرابیاں نیں پیٹ واسطے خون گزارنے نی
پیٹ واسطے فقر تسلیم توڑن سبھو سمجھ لے رنے گوارنے نی
ایس زمین نوں واھندا ملک مُکا اتے ہو چکے بڈے کارنے نی
کانوہورتے راہک نیں ہور اس دے خاوند ہور دم ہورناں مارنے نی
مہربان جے ہووے فقیر اِک پل تساں جہے کروڑ لکھ تارنے نی
وارثؔ شاہ جے رن نے مہر کیتی بھانڈے بول دے کھول منہ مارنے نی

مُشکل لفظاں دے معنے

کار ساز: کم بناون والا   (ساز دا مطلب ہے بناون ہار)؛  کم سوارنا: ٹھیک کر دینا؛  خون گزارنا: کسے نوں جان توں مار دینا؛ تسلیم توڑنا: رب دے سامنے کیتے وعدے  توڑ دینا؛ بڈے: وڈھے؛ کانو: زمین منن یا ماپن والے؛  راہک: واہی کرن والا، عام طور تے کسے دوجے دی زمین تے ادھ یا کسے متھے حصے تے واہی کرن والا؛  دم مارنا: مال  بناونا، یا  وس چلاونا؛  تارنے: بیڑا پار کر دینا؛ بول: پیشاپ؛ بھانڈے بول والے: پیشاپ کرن دی تھاں۔

سدھا مطلب

رانجھا کہندا سب توں پہلاں کم کرن والا رب ہے تے پھیر  دولت ہے۔ سب محنتاں پیٹ پالن لئی کیتیاں جاندیاں نیں۔

بھاویں نیک مرد ہووے یا زنانی ، نیکی دے پاروں اوہناں دوہاں دے کم  سنور(ٹھیک ہو) جاندے نیں)۔

پیٹ واسطے ہی امیر در در پھردے تے سیداں دے پُتر کھوتے چاردے پھردے ہین۔

پیٹ واسطے ہی پریاں تے حوراں ورگیاں سوہنیاں زنانیاں جناں بھوتاں وانگ بد شکل بندیاں دے صدقے واری جاندیاں ہین۔

پیٹ واسطے ہی پہرہ  دین والے اپنے گھر چھڈ  رات ہوکراں ماردے پھردے ہین۔

سب خرابیاں دی جڑ ڈھڈ ہے، تے ایسے دی خاطر اک دوجے  دی جان لتی جاندی ہے۔

پیٹ دے کارن ہی بڑے وڈھے فقیر وی اپنے  وعدے توڑ دیندے ہین ۔ توں گوار  (بے عقل) عورت ہیں تے اہناں گلاں نوں سمجھن دا جتن کر۔

ایس زمین نوں واہندیاں  زمانے مُک گئے  (صدیاں لنگھ گیاں) تے ایس تے بڑیاں بڑیاں واپریاں (کارنے دا مطلب وڈھیاں وڈھیاں ہوئیاں واپریاں) ہو گذریاں ہین۔

ایس زمین نوں مند ا (ماپ) کوئی ہے، واہندا کوئی ہور ہے ، مالک  ہور نیں تے  ایس توں مال کوئی ہور بناوندا ہے۔

جے کر فقیر ہو جاون تے تہاڈیاں ورگیاں دے بیڑے تار دتے جاندے ہین۔

وارث شاہ جے عورت بڑی مہربان وی ہو جاوے تے ودھ توں ودھ اپنی پیشاپ والی تھاں تہاڈے مُنہ تے مار سکدی ہے  یا تہاڈے سامنے رکھ سکدی ہے۔ 

کھلارواں مطلب

ایس بند وچ وارث شاہ ہوریں   پچھے  سہتی تے رانجھے دیاں دتیاں دلیلاں نوں سمیٹ رہے ہین۔ رانجھے  تے سہتی نے وکھ وکھ طرحاں نال  قدرت دیاں ساریاں شیواں دے  ورتارے بارے سماج وچ چالو وچار تے فارمولے دسے سن۔ رانجھے دا بہت زور زنانی دی جنس تے سی تے اوہ اوسدے خلاف سماج وچ  مشہور ہوئیاں گلاں دُہرا رہے سن۔ سہتی  دا بہتا زور طبقے تے سی    تے رانجھے دی ہر برائی اوہدے چاک ہوون نال جوڑ دیندی سی۔ پچھلے بند وچ سہتی نے  بندیاں  دیاں  خوبیاں تے گھاٹیاں دے وکھ وکھ فارمولے دتے سن۔ ایس بند وچ وارث شاہ ہوریں تت کڈھدیاں کہندے ہین  جو بندیاں دیاں اپنیاں کوئی صفتاں نہیں ہوندیاں  ایہہ سب پیٹ دی لوڑ توں شروع ہوندیاں ہیں۔ مطلب  بندے دے معاشی جتن ہی ہر سماجی قانون تے وکھالے دا مُڈھ بندے ہین۔

ایس بند وچ پہلی واری  وارث شاہ ہوریں رانجھے کولوں  کہاوندے ہین جو  بندے زنانی وچ کوئی فرق نہیں ہے۔ جے  مرد تے زنانی نیک ہوون تے دوہاں دے کم ٹھیک ہو جاندے نیں ۔ اوہناں دی جنس دا اوہناں دے چنگے بھیڑے ہوون نال کوئی تعلق نہیں۔ ایسے طرحاں اوہ ایہہ کہندے نیں جو پیٹ سید زادیاں کولوں کھوتے وی چروا لیندا ہے۔ سہتی نے کہیا سی جو سید اوہ ہے جو کنجوس ، بُزدل  (کائر) تے زانی نہ ہووے  ۔ پر وارث شاہ ہوریں کہندے نیں ایہہ کوئی ماپن دا پیمانہ نہیں  کیوں جو سید ہووے، پری تے حور جنی سوہنی زنانی ہووے سب معاشی لوڑاں  ہتھوں  بجھے ہوئے ہین۔ پیٹ واسطے ہی خون کیتے جاندے نیں  تے پیٹ دی لوڑ سامنے فقیری وی کُجھ نہیں  کردی۔ سو پیٹ دی لوڑ مُڈھ ہے بندے دی ہوندا دا۔

پیٹ  نوں مُڈھ بنا کے وارث  شاہ ہوریں  پیٹ بھرن دے مڈھلے وسیلے،  زمین  ول آوندے ہین ۔ "ایس زمین نوں واہندا مُلک مکا"  دی سینت راہیں اوہ کہہ رہے ہین جو ایہہ سی مُڈھلا سادھن  (ذریعہ) پیٹ بھرن دا جیس تے سارا کھلارا   تے پیٹا تانا تنیا ہویا ہےاوہ زمین  دی پیداوار   وچ سدھے بنے طبقیاں  دیا ں پرتاں کھولدے ہین۔ مطلب ایس  نوں  واہندا کوئی ہے، ایس دی پیداوار نوں مندا کوئی ہے، مالک کوئی بن جاندا ہے تے ایس توں امیر کوئی ہور ہو جاندا ہے۔ ایہہ اک پیچدار  پربندھ ہے۔پیٹ تے زمین بارے گل کھول کے وارث شاہ ہوریں   انسانی سماج دے مُڈھلے اصول دی گل کر رہے ہین ۔ مطلب سارے اصول قانون، انکھ عزت ایسے معاشی نظام نال جُڑیاں ہوئیاں نیں۔

اخیری مصرعہ کافی  کھرورا جیہیا لگدا ہے  پر شاید وارث شاہ دا مُڈھلا مطلب ایہہ ہے جو اسیں  مرد زنانی دے رشتے بارے جنے فلسفے تے کہانیاں مرضی بنا لیئے ، مڈھلی حقیقت ایہہ ہے جو  دوہاں دا مُڈھلا ساک جنس دا ہے  جیس نوں  ولھیٹ کے انج کہیا جاندا ہے جو مُڈھلا ساک  اپنی نسل پیدا کرنا تے اگے ودھانا ہے۔ قدرت دی بنائی ساری مخلوق دے اندر اپنی نسل ودھان تے چلاون   دی سدھر ہے۔ اوہ بندے وچ وی ہے  تے اوہ جنس راہیں  ہوندی ہے۔

وارث شاہ ہوریں ایس بند وچ دو مُڈھلے اصول سامنے لیاوندے ہین : اک تے پیٹ تے زمین دے حوالے نال  معیشت   یا معاشی جتناں دا ہر  سماجی اصول دا مُڈھ ہونا تے دوجا   جنس (سیکس) جیس نوں سوجھوان نسل ودھاون لئی ضروری سمجھدے ہین۔

 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels