Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> بیڑیاں پا کے وی نچیا جاندا ہے

بیڑیاں پا کے وی نچیا جاندا ہے

انورسن رائے
April 30th, 2011

29 اپریل نوں ناچ دا عالمی دیہاڑا سی پر پاکستان ورگے ملکاں وچ کیہنوں چیتا ہووے گا؟ ہور اینے مسئلے نیں پئی بندہ زندگی بھل جاندا ہے، انسان ہوڻا بھل جاندا ہے۔

پر ایہہ اوس ناچ دی گل نہیں ہے جیہڑا 80 دے دھاکے وچ جھیڑے والی مداخلت توں شروع ہویا تے ویکھدیاں ہی ویکھدیاں پاکستان دے گلی محلیاں، گلیاں، تعلیمی اداریاں تے عبادت گاہواں تیکر آ گیا۔ تے ہڻ کوئی نہیں آکھ سکدا پئی اوہ موت دے ایس جنونی ناچ توں محفوظ ہے۔ انج لگدا ہے پئی ایہدے جنونی ناچے ہر تھاں اکٹھے ٹر رہے ہوڻ، اگے ،پچھے، سجے تے کھبے۔

پر جدوں ایہہ ناچ شروع کر دتا گیا تے اصلی ناچ تے روک لا دتی گئی پر ایس روک نوں صرف زنانیاں تے ہی لایا گیا۔

انوکھی گل ہے جو ایسے 80 دے دھاکے وچ ہی 1982 وچ اقوام متحدہ دے ادارے یونسکو نے 29 اپریل نوں ناچ دا عالمی دیہاڑا متھ دتا تے ایسے لئی متھیا پئی ایہہ نویں بیلے دے خالق جین جورجس نوورے دے جمڻ دا دیہاڑا سی۔ ایس فرانسیسی ناچے دے جمڻ نوں اج 284 سال ہو گئے نیں۔

ناچ دا سانگا ساڈے جثے نال ہے تے ساڈی روح نال ہے۔ اک آھنگ ہوندا ہے جیہڑا ہر جثے وچ ہوندا ہے۔ ایس خون وچ ہوندا ہے جیہڑا ساڈے جثیاں وچ دوڑ دا ہے تے ساڈے دل نوں دھڑکدے رہڻ تے اک آھنگ پیدا کرن ول لیاؤندا رہندا ہے۔

انسان نے ناچ دا مڈھ کدوں رکھیا ایس بارے وچ تاریخ سانوں گویڑاں توں اڈ کجھ نہیں دسدی پر لازمی ہے جو ناچ دا ایہہ پہلا موقع اودوں آیا ہووے گا جدوں انسان نوں پہلی خوشی ملی ہووے گی تے ایس بارے وی تاریخ سانوں کجھ نہیں دسدی۔

جدوں انسان نوں ایہہ احساس ہویا پئی ناچ خوشی دا وکھالا ہے تے اوہنے اوہناں لئی نچڻا شروع کیتا جیہناں دی دلی خوشی اوہنوں چاہیدی ہوندی ہے۔ خورے ایتھوں ہی ناچ مذہب تے جبر نال جڑیا تے طاقتور نے مجبوراں نوں ظلم دے مگروں نچڻ تے مجبور کرنا شروع کیتا۔

اقوام متحدہ دا ادارہ یونسکو ہر سال اک وڈے ناچے نوں ایس موقعے تے بیان جاری کرن دی درخواست کردا ہے۔ ایس سال ایہہ اعزاز بلجیم دی 51 سالاں دی اینی ٹریسا کیرس مائیکر دے حصے وچ آیا ہے۔

اوہ بے پناہ رقاص تے کوریو گرافر نیں تے اوہناں دا کہڻا ہے پئی ' ناچ اک سوچڻ دا طریقہ ہے جیہڑا ساڈی ہوند دا حصہ ہوندا ہے تے ایہدے راہیں ساڈے تے اوہ تصور کھلدے نیں جیہڑے بہت ہی تجریدی ہوندے نیں، ناچ اک ساک ہے جیہڑا لوکاں نوں جوڑدا ہے، اک دنیا ہوندی ہے جیہنوں اسیں آپڻے جسماں وچ لے کے ٹرنے آں تے جیہڑی ناچ توں اظہار پاؤندی ہے۔'

ذرا ٹریسا کیرس دی گل ذہن وچ رکھو تے وچارو پئی اوہ کوڻ نیں جیہڑے ناچ دی مخالفت کردے نیں تے کیوں کردے نیں؟

پاکستان وچ ناچ دی مخالفت جنرل ضیاء الحق دے دور توں شروع ہوئی۔ پر 90 دے دھاکے تیکر آؤندیاں آؤندیاں کئی ناں ساہمڻے آگئے اوہناں وچ کجھ مشہور ایہہ نیں شیما کرمانی، نگہت چودھری تے تحریما مٹھا جیہناں نے ناچ نوں اوہدی ریت نال جوڑن دا ارادہ کیتا۔

پرحالات توں ست کے تحریما دیس نکالا لے کے امریکہ ٹر گئیاں۔ نگہت نے آپڻے آپ نوں اک اُچیچے میل تیکر محدود کر لیا۔ اک شیما نیں جیہناں ایہنوں اوس ساک دے طور تے ورتیا جیہڑا لوکاں نوں جوڑدا ہے۔

ایہہ کردیاں ہوئیاں اوہناں تے کیہ بیتی ایہہ اک وکھری کہاڻی ہے۔ پر اوہ ایس راہ تے ٹریاں نیں جیہدے لئی ایس سال یونسکو نے اپیل کیتی ہے ' نچو پر ہڻ بند تھاواں تے نہیں کھلیاں تھاواں تے، سڑکاں تے، بازاراں وچ، پارکاں وچ تے اوتھے جتھے آؤڻ جاڻ والے عام لوکاں دی توجہ ملدی ہووے'۔

خورے ایس اپیل دا مقصد لوکاں نوں چیتا کراؤڻا ہے پئی ناچ تے اوہناں دی ہوند دا اوہ حصہ ہے جیہڑا اوہناں نوں اوہناں دی ہوند چیتے کراؤندا ہے۔ اوہ ہوڻا جیہنوں حالات دے دبا وچ آکے بھلا دتا گیا ۔

پر شیما کرمانی کہندیاں نیں پئی ' ایہو بہت نہیں ہے، ناچ نوں ودھاؤڻ دے ادارے بناؤڻے چاہیدے نیں، ادارے بناؤڻ لئی مدد دتی جاڻی چاہیدی ہے کیوں جو جمہوریت ایہو منگ کردی ہے تے کیوں جو ناچ ودھاؤڻا جمہوریت ودھاؤڻا ہے۔'


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels