Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> بنگلہ فلم مہر جان تے پھڈا

بنگلہ فلم مہر جان تے پھڈا

وچار ڈیسک
April 20th, 2011
5 / 5 (1 Votes)

بنگلہ دیشی فلم مہر جان جدوں ایس سال جنوری وچ ریلیز ہوئی سی تے فلم میکر رباعیات حسین لئی اک وڈا مرحلہ سی۔ اوہناں دی ایہہ پہلی فلم سی تے اوہدے پورے ہوڻ دے نال ہی اوہ بنگلہ دیش دیاں کجھ زنانیاں فلم میکرز دی فہرست وچ رلتی ہو گئیاں۔

مہر جان فلم وچ سن انی سو اکہتر دی جنگ آزادی وچکار اک بنگلہ زنانی تے پاکستانی بلوچ فوجی وچکار محبت دی کہانی پیش کیتی گئی ہے۔ جنگ وچکار مہر نوں پاکستانی فوجی نال محبت ہو جاندی ہے۔

جدوں ایس محبت دا پتہ لگدا ہے تے اوہناں دی بے عزتی کیتی جاندی ہے تے گھر والے تے سماج اوہناں نوں چپ کروا دیندا ہے۔ سالاں توں مگروں جدوں اوہناں دی اک سا ک سارہ نال ملی ہوندی ہے تے اوہ پچھوکڑ نوں فیر اک واری کریدڻ دی کوشش کردی ہے۔

پر حسین بی بی نوں کیہ پتہ سی جو اوہناں دی فلم تے پھڈا ہو جاوے گا۔ میڈیا تے انٹرنیٹ دی بھرویں نکھیدی دے مگروں اک ہفتے وچ ہی فلم ڈسٹری بیوٹراں نے فلم نوں تھیٹراں توں ہٹا لیا سی۔

نکھیدی کرڻ والے کہندے نیں فلم نے تاریخ نوں تروڑ مروڑ کے پیش کیتا ہے تے جنگ وچ آلام نوں اگنور کر دتا گیا ہے۔ پر فلم دی ہدایت کار ایہدے نال اک نہیں ہیڻ۔ رباعیات حسین کہندیاں نیں ' انی سو اکہتر دی جنگ دے سلسلے وچ اسیں بنگلہ دیشی ہیروز تے پاکستانی ظالم دی شبیہ ہی ویکھدے رہے نیں۔ میں اوہنوں توڑڻ دی کوشش کیتی ہے تے ایسے پاروں اینا وڈا واویلا کھڑا ہویا ہے۔'

ایس فلم وچ علاقے دے کجھ وڈے اداکاراں نے کم کیتا ہے۔ بالی ووڈ دی اداکار جیا بچن تے وکٹر بنر جی نے وی ادارکاری کیتی ہے۔ ایہدے وچ پاکستان تے بنگلہ دیش دے کلاکاراں نے وی کم کیتا ہے۔

مہر جان فلم دے ڈسٹری بیوٹر حبیب الرحمان دا کہنا ہے ' ذاتی طور تے فلم مینوں پسند ہے۔ پر عوام دا اک میل اُچیچا آزادی دے مجاہد،اوہدے توں ناخوش سی۔ مجاہد آزادی دی حیثیت وچ آپوں اوہناں دے احساساں نوں مجروح کرنا پسند نہیں کراں گا، ایسے لئی میں سینما ہال توں فلم نوں ہٹاؤڻ دا فیصلہ کیتا۔'

کجھ فلم دی نکھیدی کرڻ والے کہندے نیں وڈے اداکاراں دی رلت دے مگروں وی فلم وچ جنگ وچکار بھیڑیاں واپریاں نوں چنگی طرحاں نہیں وکھایا گیا ہے۔

پر محترمہ حسین کہندیاں نیں ' کیوں کہ اسیں فلم دے کینوس تے جنگ دے منظر ہی پیش نہیں کیتے، اوہ اوہنوں انج ویکھدے نیں جیویں میں نسل کشی توں نانہہ کردیاں ہوڻ، جدوں کہ گل انج دی نہیں ہے۔ فلم وچ انج دیاں کئیاں سینتاں نیں جیہدے نال پتہ لگدا ہے جنگ جاری ہے۔ ایہہ فلم میکر دا اختیار ہے پئی اوہ اک اُچیچے موضوع نوں کیویں پیش کرنا چاہوندا ہے۔ میں قتل تے اک فلم بناء خون دے اک تبکے نوں وکھائے ہوئے بنا سکنی آں'۔

پر حسین بی بی نوں ایہہ وضاحتاں بنگلہ دیش وچ اوہناں دی نکھیدی کرڻ والیاں نوں چپ نہیں کرسکیاں نیں، جتھے جنگ ورگے مسئلے ہڻ وی بہت حساس قسم دے نیں۔

فردوس پریہ بھشینی جیہڑیاں مشہور مجسمہ ساز نیں، جنگ وچکار تئی سال دیاں سڻ۔ پاکستانی فوجیاں نے اوہناں دے نال کئی واری جنسی زیادتی کیتی سی۔ اوہ کہندیاں نیں فلم نے جنسی زیادتی دے شکار انج دیاں ہزاراں زنانیاں دے احساساں نوں نظر انداز کیتا ہے۔

میں جنسی زیادتی دی شکار زنانی آں جیہدی بہت بے عزتی ہوئی تے اوکڑاں وچ پئی آں۔ میرا اعتراض بس ایہو ہے پئی فلم وچ پاکستانیاں دے حوالے نال نرمی وکھائی گئی ہے۔ فلم وچ اک چپ سنیہا ایہہ ہے پئی اسیں اوہناں نوں بھل سکنے آں، ایہہ تاریخی احساس کدی مکائے نہیں جاسکدے نیں۔

کجھ کہندے نیں پئی حالی اوہ ویلا نہیں آیا پئی اک پاکستانی فوجی تے بنگلہ دیشی کڑی وچکار پیار محبت دی کتھا پیش کیتی جاوے۔ پر اینے سالاں توں مگروں وی اخیر ایہہ معاملہ اینا حساس کیوں ہے ؟

ملک دے مشہور ادیب علی ذاکر کہندے نیں ' پاکستان نے جنگ وچکار اپنی فوج ولوں لکھاں بنگلہ دیشیاں دے مرڻ تے حالی تیکرمعافی نہیں منگی ہے ۔ انج دے حالات وچ انج دی فلم بڻاؤڻا ویلے توں پہلوں ہے '۔

پر ایہدے مگروں وی ذاکر فلم نوں ہٹاؤڻ دے حق وچ نہیں ہیڻ۔ کئی دوجے لوک وی کہندے نیں پئی فلم نوں ہٹاؤڻ نال کیہ فیدا ہووے گا۔

پر ہڻ بنگلہ دیشیاں لئی ایہہ فلم فیر تھیٹر وچ کدوں اپڑے گی ایہنوں اُڈیکنا ہووے گا۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels