Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> ساڈے ہیرو!

ساڈے ہیرو!

وسعت اللہ خان
April 18th, 2011
4.5 / 5 (2 Votes)

کیہ تسیں مستانے نوں جاڻدے ہو؟ نہیں وی جاڻدے تے کیہ فرق پیندا؟ پنجاب دے کمرشل تھیٹر، ٹی وی اتے فلم راہیں لکھاں لوکاں نوں ہسا ہسا کے ڈھڈ پیڑ کرا دیڻ والا مستانہ 57 ورھیاں دی عمر وچ بہاولپور دے وکٹوریہ ہسپتال وچ غریبی اتے کینسر ہتھوں مر گیا۔ بھاویں کجھ لوکاں نے اوہنوں دو تن لکھ روپیئے دی خیرات وی دتی پر مستانہ تے دو ورھے پہلاں ہی فیصل آباد وچ اک سٹیج شو وچکار اک پولیس والے دا تھپڑ کھا کے ذہنی طور تے مر گیا سی۔

مستانے دے مرن دے 5 دیہاڑے پچھوں کمرشل تھیٹر اتے فلم کامیڈی دا اک ہور بادشاہ ببو برال 52 ورھیاں دی عمر وچ کینسر، شوگر، جگر اتے پیسے دی تنگی نہ سہندیاں مر گیا۔ بھاویں اوہنوں وی کجھ لوکاں اتے اک ادھے سرکاری محکمے نے چار پنج لکھ دی خیرات دتی سی۔

سندھ دے صوفی سنگیت دا بادشاہ سہراب فقیر، مستانہ اتے ببو نالوں نصیباں والا نکلیا۔ اوہ 2 ورھے پہلاں دل اتے جگر دے روگ وچ مقامی طبیباں کول دھکے کھاندا کھاندا 73 ورھے دی عمر وچ مر گیا۔ حالانکہ حکومت نے اوہنوں پرائیڈ آف پرفارمنس وی دتا سی۔

سندھ دی اک وڈی لوک فنکارہ زینت شیخ نوں بڑھاپے اتے ناقدری نے ٹھٹھہ دیاں گلیاں وچ بھیک منگوا دتی اتے فیر ریڈیو پاکستان والیاں نے ترس کھا کے اوہدے لئی بینیفٹ شو کیتا اتے وظیفے دا وی اعلان کیتا۔ سڻیا ہے زینت اک واری فیر فاقیاں تے اپڑ گئی ہے۔ دعا کرو اوہدی مشکل چھیتی آسان ہو جاوے۔

صفی اللہ عرف لہری جیہدے کاٹ دار اتے مخولی فقرے سڻے بنا سنہ 60 اتے 70 دے دہاکیاں وچ کوئی پاکستانی اردو فلم کامیاب نہیں سی۔ پچھلے 25 ورھیاں توں کراچی دے اک فلیٹ وچ شوگر ہتھوں اک پیر وڈھا کے فالج وچ پیا ہے۔ لہری نوں وی ویلے کویلے پنج چھ لکھ دا عطیہ مل گیا ہے پر جُگت مارڻ دی دا بھُس فیر نہیں جاندا۔

پشتو لوک گلوکاری دا چہرہ معشوق سلطان ہے۔ اوہدا اک پتر مقدمے بازی وچ پھسیا ہے اتے معشوق سلطان پشاور دے چغل پورہ وچ کرائے دے مکان وچ شوگر نال لڑ رہی ہے۔ دو چار بندے اوہدا حال وی پچھ لیندے ہیڻ پر فیر وی معشوق سلطان رب دا شکر نہیں کردی۔

اک وکھری پشتو لوک آواز زرسانگہ دا گھر ہڑھ نے کھا لیا۔ عمران خان نے اوہنوں گھر بڻوا دیڻ اتے صوبائی حکومت نے امداد دیڻ دا اعلان کیتا ہے۔ پر زرسانگہ اج وی ٹپری واسی دی عادت توں مجبور ہے۔

اک ہور نویکلا پشتو سنگر گلزار عالم کراچی وچ ٹیکسی وی چلاؤندا رہیا۔ باچا خان فاؤنڈیشن نے ترس کھا کے 20 ہزار روپیئے تے ملازم وی رکھ لیا پر کرن نوں کم نہیں دتا۔ گلزار عالم نے نوکری چھڈ دتی۔ ہڻ پیر تڑوا کے گھر وچ غیرت دی جُلی لئی پیا ہے۔ مشہور فوک سنگر ہارون باچا سیاڻا نکلیا اتے امریکا جا وسیا۔ کامیڈین عالم زیب وی چاتر نکلیا۔ ایس ویلے کوالالمپور وچ ٹیکسی چلاؤندا تے موجاں ماڻ دا ہے۔

قومی ہاکی ٹیم دا اک گولی محمد قاسم کینسر اتے گمنامی وچ مر گیا۔ ٹیسٹ کرکٹر انتونی ڈی سوزا کدوں اتے کتھے مر گیا کوئی پتہ نہیں۔ فٹبال دے انٹرنیشنل کھڈاری غفور، موسیٰ، غازی اتے عمر نوں کراچی دے لیاری دیاں گلیاں نگل گئیاں۔ انٹرنیشنل باکسر رحمان بولٹن مارکیٹ وچ فروٹ دا ٹھیلہ لاؤندا سی۔ کجھ چر توں نظر نہیں آ رہیا۔ اک ہور انٹرنیشنل باکسر عبدالعزیز جونا مارکیٹ دی فٹ پاتھ تے چابیاں بڻاؤندا سی۔ ہڻ اوہ وی نظر نہیں آؤندا۔ ایشین گیمز وچ پاکستان لئی کانسی دا تمغہ جتڻ والا دیدار احمد پچھلے سال آپڻے تمغے اتے انعام سڑک تے لے آیا۔ حکومت نے نموشی لکاؤڻ لئی اوہنوں دو لکھ روپیئے دیڻ دا اعلان کیتا۔ اُنج جے دیدار احمد بمب دھماکے وچ مر جاوے تے اوہنوں گھٹو گھٹ 3 لکھ روپیہ لبھے گا۔ اولمپیئن باکسر حسین شاہ بہتا تیز نکلیا۔ پاکستان لئی سول اولمپکس سڻے کئی عالمی مقابلیاں وچ تمغے جتڻ والا حسین شاہ اجکل جاپان وچ رہندا ہے اتے رب دا شکر کردا ہے۔

میں بڑی کوشش کیتی پئی ایس کالم وچ رلاؤڻ لئی غریب، بیمار، مندے حال، اکھوں پروکھے کیتے کسے گذریل جرنیل، ریٹائرڈ جوائنٹ سیکریٹری یاں گذریل ایم پی اے دا ناں لبھ لواں۔ حالے تیکر کامیابی نہیں ہوئی۔ پتہ لگا تے ضرور دساں گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels