Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> پاکستان وچ فلم بناؤن دا جذبہ حالی مریا نہیں

پاکستان وچ فلم بناؤن دا جذبہ حالی مریا نہیں

وچار ڈیسک
April 12th, 2011

پاکستان وچ فلماں تے گڻیاں چایمں بڻ دیاں نیں۔ پر جتھے اک پاسے ہدایت کار شعیب منصور دی فلم ' بول ' ریلیز ہورہی ہے، دوجے پاسے نکے پیمانے دی فلم ' گول چکر ' وی سکرین تے آؤڻ والی ہے۔

چھیتی ہی ریلیز ہوڻ والی فلم ' گول چکر ' وچ اک کردار کینڈی ناں دے بندے دا ہے ۔ کینڈی اوہناں جواناں دی نمائندگی کردے نیں جیہڑے اپنے رات دن اسلام آباد دے وڈے شاپنگ مرکز جناح سوپر وچ لنگھاؤندے نیں۔ اسلام آباد دے جوان اوہناں نوں ' جناح بوائز ' کہندے نیں۔ ایہہ اوہ منڈے نیں جیہناں دا کم ہی گڈیاں وچ اُچی آواز وچ گیت لا کے جناح سوپر وچ کڑیاں نوں تنگ کرڻ لئی چکر لاؤڻا ہے۔

فلم گول چکر دی ہدایت کاری اسلام آباد دے دو جواناں عائشہ لینیا اختر تے شہباز شگری نے کیتی ہے۔ عائشہ نے حالیں اک ہور آزاد فلم ' سلیکستان ' وچ اداکاری کیتی سی، تے ایہدے مگروں عائشہ نوں اک فلم بڻاؤڻ دا خیال آیا۔

' جناح بوائز ' دے بارے عائشہ نے کہیا پئی ایہہ اسلام آباد دی ثقافت دا اک اہم حصہ نیں۔ ' جیہناں نوں اسیں جناح بوائز کہنے آں، اوہناں دا سانگا میرے تے شہباز دے سماجی میل نال نہیں ، پر کینڈی کردار بڻاؤڻ دا مقصد اوہناں دا مذاق اُڈاؤنا نہیں سی۔ ساڈا مقصد جناح بوائز دا نرم پہلو وکھاؤڻا سی۔'

ایس فلم دی سرمایا کاری آپوں عائشہ تے شہباز ہی نے کیتی ہے تے اوہدی لاگت کوئی دو لکھ روپئے دی سی۔ جتھے عائشہ نے فلم سلیکستان وچ اداکاری کیتی ہے تے فیر گول چکر فلم وی بنائی ہے پر ایس توں پہلوں، کینڈی دے کردار دے دوالے ویہہ منٹ دی ' سول سرچ ' ناں دی فلم فیس بک تے یوٹیوب تے ریلیز کیتی سی۔ ایس ویہہ منٹ دورانیے دی مقبولیت دے مگروں عائشہ تے شہباز نوں ایہناں کرداراں تے بی اک لمی فلم بڻاؤڻ دا حوصلہ ملیا۔

فلم بڻاؤندے ویلے عائشہ تے شہباز نے ایہدے ریلیز بارے بہتیا وچاریا نہیں سی۔ ' اسیں ایہنوں فیس بک تے یوٹیوب تے ریلیز کر ہی نہیں سکدے۔ اوہدا دورانیہ پنتالی منٹ توں اک گھنٹے دا ہوسکدا ہے۔ تے اسیں لوکاں نال نجی محفلاں وچ نمائش لئی تے ڈی وی ڈی دی ونڈھڻ والیاں نال گل کر لئی ہے'۔

کجھ مہینے پہلوں جدوں ' سلیکستان ' نوں پاکستانی سینسر بورڈ نے گندی بولی پاروں پاس نہیں کیتا، تے اوہدے ہدایت کار حماد خان نے فلم نوں نجی محفلاں وچ وکھاؤنا شروع کیتا۔ انٹرنیٹ تے ریلیز کیتا تے فلمی میلیاں وچ نمائش کیتی۔

فلم دی نکھیدی کرن والے، ہدایت کار تے کراچی فلم فیسٹیول دے پردھان حسن زیدی نے کہیا شروع وچ انج دا جذبہ تے چنگا ہوندا ہے۔ ' جدوں اسیں اپی پہلی فلم بنائی سی تے ایہہ نہیں وچاریا سی جو اگے کیہ کرنا ہے کیوں جو سانوں پتہ ہی نہیں سی۔ شروع وچ ایہہ چنگی شے ہوندی ہے پئی لوکاں دے کول اینا جذبہ ہے۔'

حسن زیدی دا ایہہ وی کہنا سی پئی کیوں جو پاکستان وچ گڻیاں چایاں فلماں بڻ دیاں نیں ایس لئی انج دی آزاد یاں نکے پیمانے دیاں فلماں نوں توجہ بہتی ملدی ہے۔ جیویں ہندوستان وچ اک ہزار فلماں وچ دو درجن انج دیاں فلماں ریلیز ہوڻ تے بندہ اینا نہیں وچاردا۔ پر ایتھے کیوں جو تہاڈے آلے دوالے کجھ نہیں ہے تے ساڈے ایتھے رہندیاں انج دیاں دو تن فلماں آجاندیاں نیں تے اوہناں نوں ایس لئی بہتی اُچیچتا دتی جاندی ہے کیوں جو ہور کجھ نہیں ہے۔

دوجے پاسے، سال دو ہزار ست دی مشہور فلم ' خدا کے لئے ' دے ہدایت کار شعیب منصور دی چھیتی اپنی نویں فلم ' بول ' ریلیز کر رہے نیں۔ فلم دی نکھیدی کرڻ والے تے ہدایت کار عمر خان نے ایہدے بارے کہیا پئی ' سلیکستان ' ، ' گول چکر ' ' بول ' تے اوہناں دی اپنی بنائی ہوئی ڈراؤڻی فلم ' ذبح خانہ ' دے ویکھڻ والے ہور نیں۔

اک گل تے طے ہے۔ پاکستان وچ فلمی صنعت دا ماتم بہت ہویا ہے، پر گول چکر تے بول ورگیاں فلماں توں گویڑ لایا جاسکدا ہے پئی فلم بڻاؤڻ دا جذبہ حالی مریا نہیں ہے۔

بی بی سی دے شکرئیے نال


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels