Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> روح دی عدالت و چ کوڻ آیا؟ اداکار جناب گلشن گروور

روح دی عدالت و چ کوڻ آیا؟ اداکار جناب گلشن گروور

گرپریت سیکھوں
April 7th, 2011


روح دی عدالت دے جک تسیں ہو پر میں تہاڈیاں گلاں نوں لوکاں تک پہنچاؤڻ لئی کجھ بہتے لفظاں دی ورتوں کرن لگ پیا سی، پر توبہ جیکر پنجابی سڻنا نہیں چاہوندے تاں میں بہتا بولاں کیوں؟ اج ساڈی عدالت وچ کلاکاری دا اک گھڑھیا ہویا بُت پیش ہویا ہے، جس نوں اوس پرماتما نے خود کلا بخشی تے چھا گیا اوہ اس کھیتر و چ۔ ہندوستان وچ ہی نہیں سگوں ساری دنیا تے، ایہہ ہور کوئی نہیں ساڈا آپڻا گلشن گروور، فلمی اداکار ہے، جس نے ہالی ووڈ وچ جا کے آپڻی کلا دے جھنڈے گڈ دتے۔ پیش ہے اج اوہ تہاڈی عدالت وچ، سوال تہاڈے نے اتے جواب اوہدے صاف تے کھرے آؤ جاڻیئے اوہدے اس سفر بارے:

سوال : ست سری اکال معاف کرنا میں تہانوں پچھاڻیاں نہیں سی، اس باڻے و چ تاں تسیں اک ثابت صورت گیانی جی ہی لگدے ہو؟ ہاں سچ اسیں ایہہ جانڻا چاہوندے ہاں کہ تسیں پنجاب نال سانگا رکھدے ہو؟
جواب: (کھڑیا چہرہ) گرپریت بہت اپنت بھرے لفظ نال، میری ماں بولی پنجابی ہے اتے میرا دل وی پنجابی ہے بے شک میرا خاندان دلی رہڻ لگ پیا پر میرا دل پنجاب نوں ہی یاد کردا رہیا اتے روم روم وچ میرا سوہڻا پنجاب وسدا رہیا اتے اج وی وسدا ہے۔

سوال: جس طرحاں کہ تسیں فلمی دنیا وچ آ گئے اتے چھا گئے، کیہ تہاڈا ٹبر وی اس شعبے نال سانگا رکھدا سی؟
جواب: نہیں میں اک وچلے میل دے ٹبر نال سانگا رکھدا ہاں۔ میرے پتا جی اک چنگے لکھاری اتے وپاری سڻ، پر اوہ پڑھائی دی اچیچتا نوں جاڻدے سڻ اتے اوہناں مینوں بھارت دے کامرس دے سبھ توں ودھیا کالج سری رام کالج آف کامرس و چ پڑھن لئی پایا۔ پر اک گل تہانوں ضرور کہاں گا کہ زندگی وچ اگے ودھڻ لئی ماتا پتا دا سر تے ہتھ اتے پڑھائی بہت ضروری ہے۔

سوال: گروور صاحب میں کِتے پڑھیا سی کہ جدوں کالج وچ امیراں دے بچیاں نوں ویکھدے سی تاں تسیں وی امیر بڻنا لوچدے سی؟
جواب: ہاں، سیکھوں صاحب سچ گل ہے، پر تسیں ہو بہت چلاک پراڻیاں اٹاں وی پٹ لئیاں (اک گہری سوچ وچ ڈبیا، فنکار) اوس کالج دے وچ بہتے امیراں دے بچے ہی پڑھدے سڻ اتے جدوں اوہ آؤندے تاں اوہناں نوں دوجیاں نے پچھانڻا کہ ایہہ فلانے دا منڈا ہے، مینوں پتہ سی کہ ایہناں نوں تاں نام وراثت وچ ملیا ہے اتے سانوں کھٹڻا پیڻا ہے، بس ایسے لالسا نے اگے ودھڻ دی چیٹک لا دتی۔

سوال: پر گلشن جی اک سمجھ نہیں آئی کہ کامرس دے پڑھیار نے آپڻا مُکھ سنیما ول کیویں موڑ لیا؟
جواب: سیکھوں، تسیں جاڻدے ہو، جویں تیز دریا دے ویہندے پاڻی نوں موڑنا اؤکھا، انج ہی متھے دیاں لکھیاں تقدیراں نوں کوئی نہیں میٹ سکدا میں سوچدا کہ جیکر میری تقدیر وچ نہ لکھیا ہوندا تاں میں ایتھے تک نہیں پہنچ سکدا سی۔ (گلشن گروور مینوں رب وچ وشواش کرن والا اک سیوک لگیا) سبھ توں وڈی گل گرپریت، میں کالج پڑھدیاں کھیڈاں اتے کلا وچ وی آپڻا سِیر پا رہیا سی اتے مینوں پریزیڈینٹ فائن آرٹس سوسائٹی وی چڻیا گیا سی۔ کامرس دی پڑھائی کیتی سی پر بزنس لئی اینی مایا نہیں سی سو رب دے آسرے نال آپڻی پڑھائی ختم کرکے ممبئی چلا گیا۔

سوال:ممبئی دی زندگی تاں بہت اؤکھی ہوڻی اوتھے تہانوں سنبھالڻ والا کوئی ہے سی، گلشن گروور صاحب؟
جواب: نہیں، میں ممبئی اک فقیر وانگ گیا سی، نہ کوئی سنگی سی تے نہ کوئی ساتھی، مڈھلا جیون اؤکھا سی، پر نشانہ اکو سی اتے تیر کمان سی محنت تے لگن والا جو شاید ٹٹ جاندا جے بہتا چر کمان نشانے تے نہ لگدا، پر رب نے خیر پائی، میں روشن تنیجا دے ایکٹنگ سکول وچ شتروگھن اتے اوم پوری ورگے فنکاراں نال ایکٹنگ دے گر سکھے اتے اوس ویلے مظہر خان اتے انیل کپور وی اوتھے ایکٹنگ سکھ رہے سڻ اتے بعد وچ اوسے ایکٹنگ سکول وچ میں پڑھاؤڻ لگیا اوتھے میرے شاگرد سنجے دت، گووندا اتے ٹینا منیم ورگے کلاکار سڻ۔


سوال: تہانوں ایہہ فلماں ملنیاں کیویں شروع ہوئیاں؟
جواب: (اکھاں بند کرکے گلشن جی نے بابے دا شکرانہ کیتا اتے ایہہ بول بولے، جے بابے نانک دی مہر ہووے اتے مہراں والی دا سر تے ہتھ ہووے تاں بندہ اگے ہی ودھدا پچھے نہیں مڑدا)
سیکھوں، جدوں سنجے دت میرے توں کلا دی پڑھائی سکھ رہیا سی تاں اک وار سنیل دت جی آئے اتے مینوں سنجے دت دے دوست دا رول فلم راکی دے وچ دتا۔ انیل کپور دے پتا نے "ہم پانچ" شبانہ اعظمی نے موہن کمار نوں کہہ کے "اوتار" وچ کم دوایا اتے فیر اپیش مہرا دی "سوہڻی مہینوال" مل گئی اتے فیر تاں بس بلے بلے ہو گئی!

سوال: گلشن جی، تسیں کجھ پنجابی فلماں وی کیتیاں پر واہوا چر بعد؟
جواب: گرپریت سیکھوں، تسیں جاڻدے ہو کہ پنجابی فلماں تے پیسہ خرچڻ لئی کوئی راضی نہیں سی، بے شک مینوں پنجابی فلماں دے کئی وار آفر ملے سڻ، پر میں چنگی فلم دی بھال وچ سی اتے جدوں مینوں فلم دی کہاڻی اتے اوس دا بجٹ ٹھیک لگیا تاں میں کم کیتا۔

سوال: اک ہور دکھ بھری خبر، میں کِتے پڑھیا سی کہ تہاڈے چار آپریشن ہوئے؟
جواب: اوئے گرپریت، بالکل غلط ہے، سب کجھ ایہہ کسے دشمن نے شرارت کیتی ہے میری کوئی سرجری نہیں ہوئی۔ میں وی ایہہ وکی پیڈیا تے پڑھیا اتے ہڻ اسیں اس نوں اوتھوں ہٹاؤڻ لئی قانونی لڑائی لڑ رہے ہاں۔

سوال: شکر ہے کہ ایہہ خبر جھوٹھ ہے اتے اگے توں وی تسیں تندرست رہو پر مینوں اک گل دسو تسیں ایہہ پنڈے نوں سڈول اتے جوان کیویں رکھیا ہویا، کسرت کردے ہو روز؟
جواب: گرپریت، صحت ہے تاں جہان ہے، تے بناں صحت دے کجھ وی نہیں، اسیں تاں کلاکار ہاں سانوں تاں لوک فٹ دیکھڻا چاہوندے ہیڻ، پر ہر اک انسان نوں چاہیدا ہے کہ اوہ صحیح کھاڻا کھاوے، کسرت کرے اتے تندرست رہے۔

سوال: پر ساڈے عدالت دے جج صاحبان اک گل ضرور پچھڻا چاہوڻ گے کہ تسیں ہیرو دے طور تے آپڻے آپ نوں کیوں نہیں منوایا اتے ولن دے روپ وچ چھا گئے؟
جواب: سیکھوں، تسیں جاڻدے ہو کہ فلم اندر ہیرو وی ہوندے تے ولن وی۔ مینوں اودوں محسوس ہویا کہ ہیرو بہتی لمبی دوڑ نہیں دوڑ سکدا، باقی مینوں ڈانس کرن توں وی جھجک سی اتے دیکھن والیاں دے آشیرواد نال میں جو راہ چڻیا اوہ صحیح سی اتے مینوں اوس وچ کامیابی ملی۔

سوال: تسیں آپڻا رول ماڈل کس نوں منندے ہو، جس طرحاں کہ ہر کسے دا کوئی نہ کوئی رول ماڈل ہوندا ہے؟
جواب: سیکھوں صاحب، ایہہ آپڻی آپڻی سوچڻی ہے، کسے نوں کوئی رول پسند ہوندا ہے، کسے نوں کوئی ہور۔ جس طرحاں ولناں دے وچ وکھو وکھ فلماں وچ پریم چوپڑہ جی، ونود کھنہ، گھنھایا لال، جیون، رنجیت، ڈینی، شتروگھن سنہا اتے امجد خاں نے تاریخی رول نبھائے اتے میں وکھو وکھ فلماں وچ وکھو وکھ کلاکاراں توں کجھ نہ کجھ سکھیا۔

سوال: تہانوں ہالی ووڈ دی فلم وی ملی، تسیں ہالی ووڈ اتے بالی ووڈ وچ کیہ فرق محسوس کردے ہو؟
جواب: بس اکو لائن "نیتاں نال مراداں" نے اتے اک گل ہور دساں بالی ووڈ تے ہالی ووڈ وچ کوئی فرق نہیں، فرق ہے صرف سوچڻی وچ۔

سوال: جس طرحاں کہ فلم لائن وچ اک ریت پے گئی ہے، کہ ایکٹر دا بچہ ایکٹر ہی بڻدا ہے، تہاڈے بچے وی ایکٹر بنڻ جا رہے ہیڻ؟
جواب: بے شک میرا پتر فلماں نال جڑیا ہے پر ایکٹر دے طور تے نہیں۔ اوہ لاس ایجنلس توں فلماں بناؤڻ دی پڑھائی کر رہیا ہے 'MGM' توں جیہناں نے جیمز بانڈ ورگیاں فلماں بڻائیاں۔

سوال: کجھ چراں توں اک نواں دور ویکھڻ نوں ملیا گلشن جی، کہ کترینا، سنی دیول ورگے کلاکار وی پنجاب وچ شوٹنگ وچ حصہ لے رہے ہیڻ اتے جیکر غلط نہ ہووے تاں میں سڻیا ہے کہ ہالی ووڈ والے وی فلماں بناؤڻ لئی پنجاب ول رُخ موڑ رہے ہیڻ؟
جواب: پنجاب دا کلچر ہی اینا امیر ہے کہ ہر کسے نوں اج نہیں تاں کل ایتھے آؤڻا ہی پیڻا اے۔ پر اس سبھ دا انعام میرے دوست اکشے کمار نوں ملنا چاہیدا ہے، جو ضد کرکے آپڻی ہر فلم وچ پنجابی گاڻا پواؤندا ہے اتے سبھ کجھ بدل دتا اوہدی فلم "سنگھ از کنگ" نے۔ باقی ہڻ پنجاب بہت ترقی کر گیا چنگے ہوٹل، چنگیاں کاراں سبھ کجھ مل جاندا اے ہڻ ایتھے۔ ہاں گرپریت، بہتے لوک ایتھے مارچ توں پہلاں آؤڻا چاہوندے ہیڻ پیلے پھل کھیتاں وچ لہراؤندے ویکھڻ لئی۔

سوال: گلشن جی، اک گل تہاڈے شعبے توں ہٹ کے پچھڻا چاہوندا ہاں، تسیں دنیا دے ہر کونے وچ گھمے ہو، تسیں سہپڻ اتے پیار دی کیہ تعریف ہو؟
جواب: پیار دی کوئی زبان نہیں ہوندی تے سہپڻ دی کوئی تعریف نہیں ہوندی، انسان دا انسان نال پیار ہوڻا لازمی ہے۔

سوال: میں سڻیا ہے کہ بالی ووڈ وچ کڑیاں نال دھرو وی ہوندا ہے؟
جواب: (بہت غصے بھرے لہجے وچ) ایہہ سبھ بکواس ہے گرپریت۔ جو فلم تے کروڑاں روپئیے لا رہیا ہے اوہ اس طرحاں دا کم کنج کر سکدا ہے۔ بے شک کسے چھوٹے پدھر تے انج ہوندا ہووےگا۔

سوال: گلشن جی ودھائیاں تہانوں اوس ایوارڈ لئی جو تہانوں ١٩٩٤ وچ سبھ توں ودھیا ولن لئی ملیا اتے کرپا کرکے دسڻا کسے ہور ایوارڈ دی آس کردے ہو تسیں؟
جواب: ٹھیک ہے گرپریت سیکھوں جی، کہ ایوارڈ نال اگے ودھن دا تھاپڑا ضرور ملدا ہے پر سبھ توں وڈا ایوارڈ لوکاں ولوں دتی کم نوں ملی عزت ہے۔ پر میں سوچدا ہاں کہ جیہڑا ایوارڈ مینوں نہیں ملیا اوہ میرے قابل نہیں سی۔ پر جیکر میں آپڻے دیس لئی اک آسکر لے آواں تاں سونے تے سہاگے والی کہاوت سچ ہو جاڻی ہے۔

اج ساڈی عدالت دے بوہے چھیتی بند ہو جاڻے ہیڻ کیونکہ سارا دیس بھارت دی کرکٹ وچ ہوئی جت دیاں خوشیاں منا رہیا ہے اتے ساڈا پیارا دیس ترقی دیاں پوڑیاں چڑھدا جا رہیا ہے۔ شالہ! گلشن گروور ورگے کلاکار ساڈی کچہری وچ درشن دیندے رہڻ اتے اسیں ماڻ نال کہہ سکیئے ساڈے فنکار مہان ہیڻ تے ایہناں نوں پیدا کرن والی دھرتی دا کوئی جواب نہیں۔ ساڈی دلوں دعا ہے کہ گلشن جی وی ایسے طرحاں ترقی دیاں پوڑیاں چڑھدے رہڻ آمین!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels