Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> درد منداں دا دردی، وارث شاہ ؒ

درد منداں دا دردی، وارث شاہ ؒ

ڈاکٹر رزاق شاہد
April 1st, 2011
5 / 5 (1 Votes)

اُٹھ دھرتی دیا وارثا، اج فیر تیری لوڑ
اپڻے اج قلم دیاں، فیر ہُڻ واگاں موڑ

توں دردی پنجاب دا، سب نوں تیری تانگھ
تھاں تھاں ظلم دا راج اے، اج فیر پہلے وانگ

''درد منداں دیا دردیا''، سڻ دا نہیں کوئی کوک
سارے جُھگے راکھیاں ، ہتھیں دتّے پھوک

لاشاں دے اج ڈھیر نیں، اُچی نیویں تھاہر
پہرے لائے خوف نیں، کیہ اندر کیہ باہر

ظلم ہنیرا پھیلیا، ساڈے چار چوفیر
آل دوالا ویکھ کے، دل نوں پیندے گھیر

بیلے سنجے ہو گئے، ایسی وگّی واء
دھرت پیاسی ہو گئی، سُکّ گئے دریا

نونہہ نکھڑے نیں ماس توں، چٹے ہو گئے خُون
زہری سپّاں وانگ دی، بندیاں بدلی جُون

گلی گلی سپ شُوکدے، تکھے زہری ڈنگ
لبھیا نہیں کوئی ماندری ، ''نیلے پے گئے انگ''

جیبھاں سان چڑھائیاں، چھریوں تکھے بول
ڈردا کوئی نہیں بیٹھدا، اج کسے دے کول

لٹ کھسٹ دا دور اے، ہر کوئی داؤ داء
عزتاں ویکھ لٹیندیاں، ہر تھاں سرِ راہ

لکھاں دھیاں اجّ وی، ویکھ ہڻ پئیاں روڻ
کوئی نہ اتھرو پونجدا، چپ کراوے کوڻ؟

ویکھ سکیں تاں ویکھ توں، جو جو مچیا قہر
رانجھے کُٹھے کھیڑیاں، ہیراں پھکڻ زہر

اج کتاب عشق دی، رکھی اے اساں ٹھپ
نفرت ویڑھے آ وڑی، ساریاں حداں ٹپ

بھل گئے اکھّر پیار دے، بھلی پیار پریت
نفرت آ کے کھا گئی ، پیار دے مٹھے گیت

جُھلیاں ظلم ہنیریاں، کریئے کنج بچا؟
سانوں کجھ نہیں سُجھدا، توں کوئی دے سُجھا


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels