Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> سلطان راہی تے کتاب

سلطان راہی تے کتاب

عارف وقار
March 4th, 2011

ویہویں صدی دے چھیکڑلے دھاکے وچ جدوں پاکستانی فلم انڈسٹری دا لک ٹٹ گیا سی تے فلمی صنعت دا شیش محل ڈھے گیا سی اودوں وی پچھوکڑ دی ایس شاندار عمارت دا کجھ حصہ اک مضبوط تھمی دے آسرے کھلوتا رہ گیا سی۔

تے ایہہ تھمی سلطان راہی توں سوا ہور کوئی نہیں سی، جیہڑا سن پنجاہ دے دھاکے وچ اک ایکسٹرا بوائے دے طور تے آیا تے ترقی دیاں پوڑھیاں چڑھ دا ہویا پہلوں ولن تے فیر ہیرو دے طور تے ساری صنعت تے چھا گیا سی۔

9 جنوری 1996دی رات جدوں اوہنوں ان پچھاتے ڈاکوؤاں نے قتل کردتا تے اوہ پاکستان دا سب توں بہتا رجھیا اداکار تے اوہدیاں 54 فلماں بن رہیاں سڻ۔ اوہدی موت نال وہ چھیکڑلی تھمی وی کھسک گئی تے فلمی صنعت دی رہندی کھوندی عمارت ملبے دا ڈگ بن گئی۔ ایس واپری دے مگروں فلم انڈسٹری اج تائیں اپڻے پیراں تے نہیں کھلو سکی۔

ساڈے ایتھے کیوں جو کسے دی جیوڻ کتھا لکھن نوں اک آرٹ دا درجہ حاصل نہیں ہوسکیا سگوں ایہہ افسانوی تے غیر افسانوی ادب وچکار کِتے لمکدا رہ گیا ہے، ایس لئی کسے دی وی جیوڻ کتھا توں عالمی معیار دی آس رکھڻا تے فضول ہے پر جو کجھ سلطان راہی بارے لکھی کتاب دے ناں تے ساڈے ساہمنے ہے اوہنوں تے حیاتی دے حالات دا بیان وی نہیں آکھیا جاسکدا۔

ایہہ گل ہرکھ جوگ ہے پئی اینے اہم موضوع تے اک اینی ماڑی تے ناگھڑت کتاب ساہمےن آئی ہے۔ کتاب دے پہلے ورقے تے بھاویں زاہد عکاسی دا ناں لکھاری دے طور تے لکھیا ہے پر کتاب وچ '' تدوین '' ناں دی وی کوئی شے نظر نہیں آؤندی ۔کھوج دا معیار کتاب دے پچھے لکھی جانکاری وچ سلطان راہی دیاں فلماں دی گڻتی 500 دسی گئی ہے تے ایہنوں عالمی ریکارڈ آکھیا گیا ہے، جدوں کہ ایہہ دوہویں ہی گلاں غلط نیں۔

کتاب دے صفحہ نمبر 22تے لکھیا ہے پئی سلطان راہی نے 700 توں بہتیاں فلماں کیتیاں تے صفحہ نمبر 11 تے پبلشر دے حوالے نال لکھاری لکھدا ہے جو سلطان راہی نے 800 فلماں وچ کم کیتا جیہدے پاروں گنز بک آف ریکارڈز وچ اوہناں دا ناں آگیا۔ 5 سو، 7 سو تے 8 سو دے ایہناں دعویاں دے مگروں کتاب دے اخیر وچ سلطان راہی دیاں فلماں دی پوری فہرست دتی گئی ہے ایہدے وچ کل 682 فلماں گڻوائیاں گئیاں نیں پر ایہہ گڻتی وی ٹھیک نہیں ہے۔

سنجیدہ کاہڈوواں نے پوری پڻ چھاڻ دے مگروں جیہڑی فہرست با ئی ایہدے وچ سلطان راہی دیاں 804 فلماں رلتی نیں۔ ایہناں کاہڈوواں وچ سلطان راہی دے چاہڻ والے محمد معصوم بھٹی پیش پیش نیں جیہڑے کہ سعودی عرب وسنیک نیں پر ایہناں کاہڈوواں نے وی ایہہ دعویٰ کدی نہیں کیتا جو سلطان راہی دا ناں گنز بک وچ لکھیا گیا ہے۔

حقیقت ایہہ ہے جو سلطان راہی دا ناں کدی گنز بک وچ نہیں آیا سگوں دنیا وچ سب توں بہتیاں فلماں وچ کم کرن والے کلاکار دے طور تے دکھیج ہندوستان دے کلاکار کِنے گنٹی برہمنندم دا ناں اوتھے لکھیا ہے جیہنے سن 2010 تیکر 875 فلماں وچ کم کیتا سی۔

ایہہ ٹھیک ہے پئی جے سلطان راہی جیوندے رہندے تے ایس ریکارڈ نوں توڑ دیندے پر ہرکھ جو انج نہ ہوسکیا۔

سلطان راہی دی مڈھلی حیاتی دا بیان فدا احمد کاردار دے اک پرانے انٹرویو چوں کڈھیا گیا ہے جیہڑا واہوا سوادی ہے پر سلطان راہی دے بچپنے دی کوئی مورت کتاب وچ نہیں ہے جیہدی تھوڑ بہت محسوس ہوندی ہے۔ اداکار دی پکھوں کجھ دسڻ لئی اوہناں دے جیہڑے نیڑلے سنگیاں دے خیال لکھے گئے نیں اوہناں وچ ہدایت کار اسلم ڈار، لکھاری عزیز میرٹھی، فلماں بناؤن والے سرور بھٹی تے صحافی جمیل قریشی رلتی نیں۔ ایہناں ساریاں دے خیال سوادی نیں پر ایتھے وی لکھڻ والے نے اپنے صوابدیدی اختیار اُکا نہیں ورتے ایس لئی کئی گلاں دی تکرار بھیڑی لگدی ہے۔

مضموناں دی فہرست وچ اک ہے ' سپورٹنگ کردار ' جیہڑا کہ صفحہ 121 تے وکھایا گیا پر جدوں ایس صفحے تے اپڑے تے ایہہ زمرہ غائب سی۔ کتاب دی سب توں دکھ دین والی گل ایہدی چھپوائی دا معیار ہے۔ صفحہ 65,68,69,72,72,76,77 تے دوہری چھپائی ہو گئی ہے یعنی ہور صفحیاں دی عبارت ایہناں صفحیاں وچ گڈ مڈ ہو گئی ہے جیہدے پاروں ایہناں ستاں صفحیاں دی عبارت پڑھی ہی نہیں جاسکدی۔

پاکستانی سینما دے وڈے کلاکار دی جیوڻ کتھا چھاپ دیاں ہوئیاں جیویں دی بے پرواہی تے بے حسی وکھائی گئی ہے ایہدی تلافی انج ہی ہوسکدی ہے جو ایس بہت ہی گھٹیا ایڈیشن نوں تلف کر دتا جاوے تے کتاب نوں پوری توجہ دے نال فیر چھاپیا جاوے۔



Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels