Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> مردم شماریاں وچ پنجابیاں دی گنتریاں نوں گھٹاون دی کوششاں کیوں؟

مردم شماریاں وچ پنجابیاں دی گنتریاں نوں گھٹاون دی کوششاں کیوں؟

March 16th, 2017

اسلام آباد وچ بیٹھے پالیسی ساز اتے بیورو کریٹ پہلے دن توں اکثرتیاں خلاف محاذ بناون وچ رجھے ہوئے نیں۔کیونجے ایہہ عوام مخالف نیں تاں مارے جس وی صوبے وچ عوام دی اکثریتاں ہوندیاں نیں اوس خلاف ایہہ محاذ بنادے نیں۔ پاکستان بنن توں پہلاں اوہ لکھنو پیکٹ ورگے جعلی بندوبستاں نال پنجابی تے بنگالی مسلماناں دی اکثریتاں نوں گھٹ کرن وچ لگے رہے سن۔ حکیم اجمل خان، میاں شفیع تے علامہ اقبال ہی نہیں سگوں سی آر دا س ورگے لیڈراں ایس پاروں لکھنو پیکٹ نوں ’’وڈا کھڈا‘‘ لکھیا سی۔ پاکستان بنن توں بعد ایہہ بنگالی اکثریتاں نوں اگے پچھے کردے رہے جس دی سب توں گھٹیا مثال ون یونٹ دا بنانا سی جس وچ کراچی دے افسر اگے اگے سن۔اکثریتاں نوں تھلے نہیں لایا جا سکیا اتے 16 دسمبر نوں بنگالی وکھرے ہوگئے، پر انہاں نوں عقل نہیں آئی۔ 1972 بعدوں انہاں بھٹو تے پنجاب دا اتحاد توڑن توں مڑ پرانی پالیسیاں اساریاں۔ جداں ضیاالحق دور وچ 1981 دی مردم شماری ہوئی تے پنجابی دی تعداد نوں گھٹاون لئی اتے چاروں صوبیاں وچ نویں جھگڑے پیدا کرن لئی ’’سرائیکی‘‘ دا خانہ رکھا گیا اتے ہندکو نوں پنجابی توں وکھ کرن دی گل کیتی گئی۔ لہجیاں نوں بدوبدی، بغیر تحقیق تے اسمبلیاں وچ بحثاں کیتے بغیر، زباناں آکھن مگر اک ڈونگی سوچ سی۔پنجابی تے غیر پنجابی دی لڑائیاں انہاں نوں سوٹ کردیاں سن تاں جے جمہوری لہر تگڑی نہ ہو سکے۔ایس پاروں انہاں نوں بڑے سجن مل گئے۔ محض پنجاب مخالفتاں وچ پنجابی زبان نوں ونڈن والے مختلف مفاداں پاروں ایہہ کم کررہے نیں۔ ایس کم وچ سرائیکیاں نال پیار گھٹ اتے ایجنڈے وادھو نیں۔ اے این پی دا ہور مقصد ہے، سندھ قوم پرستاں دا ہور، اُردو بولن والے دانشوراں دا ہور، این جی اوز دا ہور پر اسلام آباد دی سول ملٹری بیوررکریسی دا ہور ٹیچا ہے۔
1971 تیک ایہہ بنگالی اکثریتاں نوں گھٹ کرن وچ لگے رہے تے 1972 توں پنجابی اکثریتاں دے مگر نیں۔ بغیر کسی سائنسی تحقیق، بغیر کسی اسمبلیاں وچ بحثاں دے اتے بغیر کسی قومی لسانی کمیشن دے اج انہاں سرائیکی، ہندکو ورگے پنجابی لہجیاں نوں زباناں آکھیا ہے تے کل پشتو، پختو، تھری، جٹکی، بارے وی ایہو گلاں ہون گیاں۔ اے این پی نے تے اپنے پچھلے دور وچ نرا پختوناں دا تناسب ودھان لئی پنجابی دے لہجیاں ہندکو، گوجری تے سرائیکی نوں ونڈ دتا سی۔ ایہہ وی کانگرسی تے ضیاالحقی طریقے تے چلاکیاں سن۔ ہن نویں مردم شماریاں وچ وی ایہو کیتا گیا ہے اتے سرائیکی تے ہندکو نوں زباناں دے خانے وچ وکھری زباناں پاروں لکھیا ہے۔ کجھ دانشور تے ایہہ یقین کیتے بیٹھے نے کہ پنجابیاں دا تناسب گھٹ ہوئے گا تاں پاکستان وچ جمہوریت تگڑی ہوئے گی۔ایس ضیالحقی تھیسس تے رویا وی نہیں جا سکدا۔ پر اوہ ایہہ بھل جاندے نیں پئی زبردستی کسی اقلیت نوں اکثریت تے اکثریت نوں اقلیت بناون نال کم ہور چوڑ ہی ہوندا ہے۔ ایس دا ردعمل وی ہور کم خراب کردا ہے۔ سیاستداناں نوں چاہیدا سی پئی اوہ انہاں مسلیاں نوں پارلیمان وچ قومی لسانی کمیشن بناکے طے کردے۔ جے کل نوں کراچی دے لوک وکھرے صوبے دے حق وچ ووٹ دین گے تاں تسی کیہ کروگے؟ جنوبی پنجاب وچ غیر سرائیکی کیہ کرن گے؟ اجہی چلاکیاں نال کم چوڑ تے ہوئے گا پر مسلے حل ہون ول نہیں جاسکدے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels