Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> امن تے کلچر:لہور وچ دو روزہ پنجابی میلہ مک گیا۔زباناں لئی قومی کمیشن بناؤ

امن تے کلچر:لہور وچ دو روزہ پنجابی میلہ مک گیا۔زباناں لئی قومی کمیشن بناؤ

وچار ڈیسک
March 15th, 2017

پچھلے ہفتہ تے اتوار نوں لہور دے قذافی سٹیڈیم وچ امن تے کلچر دے ناں نال ہون والا پنجابی میلہ کروایا گیا۔ ایہہ میلہ پنجابی انسٹی ٹیوٹ آف لینگوئج اینڈ کلچر دے تعاون نال پنجابی پرچار کمیٹی تے ’’کنزیومر ڈرائیو‘‘ نامی تنظیماں کروایا۔ ایہہ کنزیومر ڈرائیو کون ہے ایس بارے پتہ نہیں۔ ڈھول تے ناچے وادھو سن اتے رونق وی انہاں ہی دی سی اتے لوک وی ایہو ویکھن آئے سن۔ احمد رضا پنجابی رونق تے لادتی اتے پیلاگ والیاں وزیر نوں وی سدلتا تے طالب علماں نوں وی پنجابی میلے دا حصہ بنایا۔ ایہہ سب اک میلہ لئی لوڑی دا ہے۔ پر ایس پروگرام وچ ہون والے چار لٹریری سیشناں دا حال پتلا ہی رہیا۔ جے پنجابی زبان نال جڑے لوکاں نال میلے توں پہلے اکٹھ کرکے ایہہ سیشن بنائے جاندے تاں ایہہ زیادہ چنگے ہوسکدے سن۔ پنجاب دے انفارمیشن تے کلچر دے وزیر ایس میلے دا فیتہ کٹیا۔ مجتبیٰ شجاع الرحمن گل بات کردیاں آکھیا پئی اجہی سرگرمیاں امن تے ہم آہنگیاں لئی لوڑی دیاں نیں۔ ایہہ وزیر آپ وزیر تعلیم وی رہ چکے نیں۔ سوال تے ایہہ ہے پئی انہاں سرگرمیاں نوں پنجاب سرکار دی کلچر دی وزارت دی مہم دا حصہ ہی نہ بناؤ سگوں گھٹ و گھٹ نصابی کتاباں وچ پنجابی صوفیاں دے کلام نوں رلتی کرکے ایہہ دسو پئی تسی ایہہ سب کجھ کرنا وی چاہندے ہو۔ ایس موقعہ تے پنجاب کالج دے پڑھیاراں ٹیبلو وی پیش کیتا۔ ایف سی کالج تے ویمن یونیورسٹی دے پڑھیاراں وی ڈرامے رچائے۔ فلم دے سیشن وچ عامر رضا، پرویز راہی، طاہر سروسرمیر تے پرویز کلیم گل بات کیتی۔اگلے دن دے پروگرام وچ ہما صفدر اپنے گروپ نال اک پنجابی ڈرامہ کیتا۔پنجابی زبان دے حوالے نال اک سیشن ہویا جس وچ پروفیسر اشتیاق احمد، عامر ریاض، پروین ملک تے خالد فرہاد گل بات کیتی اتے افضل ساحرایس سیشن نوں چلایا۔پروفیسر ہوراں پنجابی مسلماناں نوں اْردو اپناون تے رگیدیا پر ایہہ نہ دسیا پئی 1865وچ انگریزاں پنجاب وچ اْردو کیوں لائی سی؟اوہ ایہہ وی نہ دسسکے پئی انگریزاں تے انگریز مخالفاں کنج زباناں ، لہجیاں تے سکرپٹاں نال کھیڈیا کہ جس دی سب توں بھیڑی مثال نہرو رپورٹ سی۔انہاں قائد اعظم تے نہرو وچ 1937دی چوناں بعدوں ہون والے خط پتر دی گل کردے ہوئے آکھیا پئی انہاں خطاں وچ نہرو ’’ہندوستانی‘‘ دی گل کیتی اتے قائداعظم نے اْردو دی۔ پر اوہ ایہہ نہ دس سکے پئی1938وچ خود کانگرسی وزارتاں نے ہندوستانی دی تھاں ہندی لائی اتے ایس پاروں مدراس وچ تاملاں احتجاج کیتا تے زبان دی بنیاد تے موتاں ہوئیاں۔اوہ پاکستان بنن بعدوں ہون والی پہلی تعلیمی کانفرنس بارے وی گل نہ کرسکے جس وچ وزیر تعلیم نے پاکستان دی مادری زباناں نوں اپناون دی گل کیتی۔ایہہ گلاں عامر ریاض کیتیاں۔انہاں دسیا پئی علامہ اقبال تے قائداعظم مادری زباناں دے خلاف نہیں سن البتہ اک ٹولہ زرور پہلے دن توں اْردو نوں اپنے مقصداں لئی ورتنا چاہندا سی۔پروین ملک ہوراں نے پنجابی زبان نوں سکولاں وچ لاون دی گل کیتی۔ میلے وچ مشاعرہ وی سی تے قوالیاں وی۔ لیل پور لٹریری میلے وانگ پنجابی پرچار نوں وی ایس میلے نوں ہر سال کرنا چاہیدا ہے بھانویں ایس وچ سرکار رلتی ہوئے یا نہ ہوئے۔پر ایس لئی زیادہ تگڑا ہون دی لوڑ ہے۔
 Some Clips
Dance https://www.facebook.com/PunjabiParcharOfficial/videos/705063423016874/
Song https://www.facebook.com/PunjabiParcharOfficial/videos/705042466352303/
Mirza sahibaan by FCC University team
https://www.facebook.com/PunjabiParcharOfficial/videos/704604999729383/
Reporting in Dawn https://www.dawn.com/news/1319904/punjab-festival-features-folk-dance-sufi-singing
Reporting in Tribune https://tribune.com.pk/story/1353671/festival-celebrating-punjabi-culture-ends/ 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels