Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> پنجاب سرکار ولوں پنجابی لکھتاں تے 56لکھ دے ایوارڈاں دا اعلان

پنجاب سرکار ولوں پنجابی لکھتاں تے 56لکھ دے ایوارڈاں دا اعلان

وچار ڈیسک
February 22nd, 2017

کل لہور وچ ماں بولی دیہاڑ حوالے نال پنجابی انسٹی ٹیوٹ آف لینگوئج آرٹ اینڈ کلچر (پیلاگ) ولوں سیمینار وی کیتا گیا اتے ماں بولی وچ لکھن والیاں لئی 56لکھ دے ایوارڈاں دا اعلان وی کیتا گیا۔ پنجاب ہائر ایجوکیشن کمیشن دے پردھان ڈاکٹر نظام الدین ہوراں پروگرام دے اْچیچے پروہنے سن۔ایہہ ایوارڈ ترے قسم دے نیں اتے ایس وچ پرائیڈ آف پنجاب ایوارڈ8شعبیاں وچ دتے گئے نیں۔ ایس توں اڈ پنجاب یونیورسٹی لہور، اسلامیہ یونیورسٹی بہاولپور، بہاؤالدین زکریا یونیورسٹی ملتان اتے سرگودھا یونیورسٹی وچ شعبہ پنجابی،سرائیکی دے ایم اے تے بی اے دے پڑھیاراں نوں وی اکیڈمک ایوارڈ دتے نیں۔ پرائڈ آف پنجاب ایوارڈ لین والیاں وچ پنجابی زبان و ادب دے شعبہ وچ تحقیق دا ایوارڈ سابق وزیر تے وکیل سید افضل حیدر ہوراں نوں دتا گیا ہے، نثری ادب دا ایوارڈ فخر زمان ہوراں نوں ملیا ہے تے شعری، ادب دا ایوارڈ رفعت عباس نوں دتا گیا ہے۔ رفعت عباس ہوراں تے ایوارڈ نہ لین دے حوالے نال فیس بک تے پیغام دے چھڈیا ہے۔ اوہ پنجاب حکومت دے ملازم وی نیں اتے ملتان وچ ڈبلیو ایچ اسلامیہ کالج وچ پڑھاندے نیں۔انہاں میڈیا نوں دتے بیان وچ ایوارڈ نہ لین دیاں ترے وجہاں دسیا نیں۔’’اک تے میں شاعر ہاں تے میں پنجابی لئی نہیں سگوں سرائیکی لئی کم کیتا ہے۔ دوجا میں سرائیکی قوم پرست ہاں تے تریجا میرے ہمسائے وچ چھوٹیاں قوماں ایندیاں نیں جنہاں تے پنجاب دا قبضہ ہے۔‘‘جس پنجاب دے قبضے دے رفعت ہوری خلاف نیں اوسے دے ملازم وی نیں۔شاعر ہوراں نوں کوئی سمجھائے پئی اج گلوبلائزیشن دا ویلہ ہے تے قوم پرستیاں قدامت دی نشانی جے۔اوہ بھل گئے نیں پئی انگریز تے ایتھے باہروں آکے قابض ہویا سی پر ٹیگور اوس کولوں ایوارڈ لتا سی۔یا تے رفعت ہوری ایس ایوارڈاں دی سیاست دے ہی خلاف ہوندے تاں اہناں دا بیانیہ کجھ سمجھ آندا پر اوہ تے پنجاب سرکار دے ملازم وی نیں۔اجہے خلافتی بیانیاں پاروں اساں بہوں گھجل ہو چکے ہاں۔ذرا ڈان والیاں تے غور کرو، انہاں مادری زباناں لئی پہلی وار56 لکھ روپیئے دین دی خبر دی تھاں پاڑ ودھان دی خبر نوں لانا لوڑی دا سمجھیا اتے دوجی خبر چھاپی ہی نہیں۔جے پنجاب سرکار اْردو زبان دے لکھاریاں لئی ایوارڈ دتے ہوندے تے ڈان والیاں ایوارڈ واپس کرن والیاں بارے گل ہی نہیں کرنی سی۔جتھے میڈیا وی خلافتی مہماں چلائے اتھے گل گواچ جاندی جے۔جنہاں سرائیکی طلباء نوں اک اک لکھ تے 50اتے 30ہزار دے انعام ملے نیں کیہہ رفعت ہوری انہاں ماڑیاں نوں ’’غدار‘‘ آکھن گے؟ آپ تے اوہ پنجاب سرکار توں تنخواہ وی لیندے نیں پر پڑھیاراں دا کیہہ قصور ہے۔پرائڈ آف پنجاب دا اک ایوارڈ پنجابی تنظیماں لئی وی ہے اتے ایہہ ایوارڈ ایس سال پنجابی ادبی بورڈ نوں دتا گیا ہے جو اک چنگی گل ہے۔ پرائڈ آف پنجاب دے باقی چار ایوارڈ اسلم کمال (مصوری)، مصطفی قریشی (فلم)، منو بھائی (ڈرامہ) تے عارف لوہار (موسیقی) دے حصے آئے نیں۔ ہر کسی نوں ترے لکھ روپیا نقد لبھے گا۔ شفقت نذیر مرزا ایوارڈ تحقیق، نثری ادب، شعری ادب، بچیاں دا ادب، مذہبی ادب تے فن و ثقافت وچ ہے۔ اپنے اشتہار وچ انہاں لفظاں دی پنجابی پیلاگ والیاں نہیں کیتی۔ ہرشعبے وچ ترے ترے ایوارڈ نیں اتے پہلا شفقت تنویر مرزاایوارڈ اک لکھ، دوجا 50ہزار تے تریجا 30ہزار دا ہے۔
تحقیق وچ پہلا ایوارڈ ڈاکٹر ظہیر احمد شفیق (کتاب: پنجابی وچ ترجمے دی روائیت)، دوجا ڈاکٹر ثنا مدثر (پنجابی نظم وچ نفسیات) تے تریجا ایوارڈ ڈاکٹر میاں ظفر مقبول (قصّہ کاری) نوں دتا گیا ہے۔ نثری ادب وچ پہلا ایوارڈ علی انوار احمد( تند، تند میلی چادر) دوجا احمد شہباز خاور (جنتا بچہ فقیر) تے تریجا ڈاکٹر کرامت مغل (توں کہانی تے میں) دتا گیا ہے۔ شعری ادب دے ایوارڈاں وچ پہلا ظفر اقبال، دوجا رفاقت حسین ممتاز تے تریجا ثمینہ اسماء نوں دتا گیا۔ بالاں دے ادب دے ایواڈاں وچ پہلاں اشرف سہیل، دوجا محمد اکرم تے تریجا محمد شعیب مرزا نوں ملیا۔ مذہبی ادب وچ قاضی تنویر الدین احمد، محمد بشیر ناطق تے محمد عرفان الحق نوں پہلا، دوجا تے تریجا ایوارڈ ملیا۔ فن و ثقافت وچ اسد سلیم شیخ نوں نگر نگر پنجاب تے پہلا ایوارڈ ملیا اتے اکرم شیخ نوں برا حال ہویا پنجاب دا تے دوجا اتے امجد پرویز ہوراں نوں میلوڈی میکرز تے تریجا ایوارڈ ملیا۔ ایوارڈاں دی کل مالیت 56لکھ ہے اتے ایہہ اک چنگی گل ہے ۔پیلاگ دی پردھان دسیا پئی پندرہ ججاں نے ایہہ فیصلے کیتے نیں۔
انہاں نین سکھ دے سوال تے آکھیا پئی اساں پالیسی پاروں ججاں دے ناں نہیں دس سکدے پر انہاں وچ بہوں محترم تے سینئر لوک رلتی نیں۔ پرناں فائنل کرن توں پہلاں ایوارڈ لین والیاں نوں پچھنا چاہیدا سی تاں مارے رفعت عباس وانگ کوئی انکار نہ کردا۔ جے اج کوئی گھاٹا ہے تے چلو کل نوں صحیح وی ہوجائے گا۔ ایوارڈاں دی سیاست اُردو تے انگریزی وچ وی بہوں ہے۔ شعبیاں بارے وی گل ہوسکدی ہے کیونجے میڈیا وچ پنجابی دی گل کرن والے صحافیاں نوں وی ایوارڈ دے کے ہلا شیری دینی چاہیدی ہے۔ایس وچ ویب میڈیا، ریڈیو، ٹی وی تے اخبار رلتی نیں۔تقریراں کرن والیاں وچ مشتاق صوفی سنے بہوں لوک رلتی سن ۔کجھ تقریراں بلکل روائیتی سن کیونجے مقرراں نوں پتہ ہی نہیں سی کہ اوہناں بولنا وی ہے۔ہورے ایس دی وجہ ایہو سی پئی سیمینار دا فیصلہ وی اخیری ویلہ تے ہویا سی۔کجھ مقرراں بنگالی لہر نوں چکنا شروع کر دتا پئی بنگالیاں تے اْردو نال تخت تے 1954وچ تھاں حاصل کر کے پاکستانی مادری زباناں دے حقاں دا سوال پچھے سْٹ ماریا سی۔1956دے آئین وچ بنگالی نوں اْردو دے نال نال قومی زبان من لتا سی جہیڑا اک ڈنگ ٹپاؤ فیصلہ سی اتے اوس نال مادری زباناں دا مسئلہ ہور چوڑ ہو گیا سی۔تقریراں لئی دو سندھیاں نوں وی سٹیج تے بلایا گیا اتے ہال وچ بیٹھے پنجابیاں اوہناں نوں آکھیا پئی تسی سندھی وچ گل بات کرو۔پنجابیاں لئی سندھی نوں سمجھنا کوئی ایڈا اوکھا نہیں۔انہاں دی سندھی تقریراں لوکاں سنیاں تے داد وی دتی۔اوہ پنجاب نوں سندھ وانگ اپنی ماں بولی وچ تعلیم دا درس دیندے رہے پر ایہہ بھل گئے پئی انگریزاں سندھی لائی سی پر پنجاب، کشمیر تے پختون تھاواں تے انگریزاں ماں بولیاں دی تھاں اْردو لائی سی۔اوہ تے ایہہ وی نہ دسیا پئی ماں بولی وچ تعلیم دے باوجود اج سندھیاں دا تعلیمی بندوبست ایڈا ماٹھا کیوں ہے؟اساں تے انہاں پنجابی تے غیر پنجابی لوکاں نوں جاندے ہاں جہیڑے پنجابی تے پنجاب نوں ونڈن وچ لگے ہوئے نیں۔پنجاب تے محمد علی جناح تے ذوالفقار علی بھٹو نوں لیڈر منیا سی اتے ووٹ دے کے لیڈر وی بنایا سی۔اْردو پراجیکٹ نال پنجابی ڈیڑھ سو سالاں توں کنج نجیٹھ رہے نیں ایس نوں سمجھن دی لوڑ ہے۔ڈاکٹرنظام الدین ہوراں وی رواجی گلاں کیتیاں اتے گریثرن سٹیٹ تے اْردو پراجیکٹ پاروں اساری گئی انگریز پالیسی بارے جھات نہ پا سکے۔پنجاب تے پنجابیاں نوں طعنے مہینے دین نال گل اگے نہیں ودھے گی سگوں سانوں زباناں بارے پھیلائے لسانی بیانیاں تے مڑ جھات پانی لوڑی دا ہے۔
 More Punjabi news Click below link
http://www.wichaar.com/news/124/ARTICLE/32420/2017-02-22.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels