Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> 21 فروری : پنجابی زبان، فن، ثقافت تے میڈیا

21 فروری : پنجابی زبان، فن، ثقافت تے میڈیا

ڈاکٹر اختر شمار
February 13th, 2015

لو کو! اسیں رڑھ چلے۔۔۔ مترو ! اسیں رڑھدے جا رہے آں۔ سانوں کون روکے؟ اسیں ہتھیں چھلاں نوں گل لایا اے۔
اسیں حرص ہوس وچ ڈُبے تے ساڈے کولوں رب رُسیا۔۔۔
اسیں جدوں دے امن دے ’’ مامے چاچے ‘‘ ساکے دار بنائے نیں، ساڈے شہراں دا امن سکھ گواچ گیا اے۔ ساڈے معصو م بال، غریب تے بیوس لوکی ’’خود کش حملیاں‘‘ وچ مردے مُکدے جاندے نیں۔ حملے دیاں تھاواں تے سانوں لہو نال بھریاں جُتیاں لبھدیاں نیں، ساڈے ہسدے وسدے بازار کھنڈر ہوندے جاندے نیں۔
اسیں کس نال حال ونڈائیے
ساڈی تے زبان کھُس گئی
جسراں صدام نوں ڈھنگا پا کے ’’چویا‘‘ گیا سی، لگدا اے ہن ساڈی واری اے۔ شکاری اپنا شکار لبھدے لبھدے ہن ساڈے ویہڑے آ وڑیا اے۔۔۔ کتھا اپنے آپ نوں دُہران لگی جے۔۔۔ بگھیاڑ تے میمنے دی کتھا۔۔۔ بہانہ بھاویں کوئی دہشت گرد ہووے۔ تلاشی ساڈی لئی جائے گی۔۔۔ اسامہ دی کہانی یاد کرو۔۔۔ پر اسیں تے حالے وی کجھ نہیں سمجھے۔
ہن تے ہر پاسے پنجاب نوں بُرا سننا پے رہیا اے۔۔۔ حالاں پنجاب وڈا بھرا بن کے ہر تھاں قربانی دا بکرا بنیا ہویا اے، پر فیر وی طعنے نہیں مُکدے۔۔۔ فوج نوں پنجاب دی فوج آکھیا جا رہیا اے۔۔۔ پنجابیاں نے کدے دوجیاں صوبیاں دا گلہ نہیں کیتا۔۔۔ نہ ای کدی سندھ، بلوچستان تے پختونخواہ نوں اپنے توں وکھ سمجھیا اے۔۔۔
پنجابی نوں ڈھگا آکھن والے کھوتا ذہن رکھدے نیں۔۔۔ کیہ اوہ پنجاب تے پنجابیاں دیاں قومی خدمتاں توں انکار کر سکدے نیں؟
پنجابی توں سوا ہر کسے اپنی ڈیڈھ اِٹ دی مسیت بنائی ہوئی اے۔ سارے اکٹھے نیں بس پنجابی اک مٹھ نہیں۔۔۔ تسیں دوجے صوبیاں دے لوکاں نوں ویکھیا ہووے گا، اوہ ہر تھاں اِک مِک ہو جاندے نیں۔ پٹھان آپس وچ ملدیاں ای پشتو مارن لگ پیندے نیں۔ ایہو کجھ سندھی بلوچی کردے نیں۔ اک اسیں آں جیہڑے اپنی ماں بولی توں وی شرمانے آں، دوجے صوبیاں وچ اوہناں دی ماں بولی مڈھلی ذریعہ تعلیم اے، اوتھے ماں بولی وچ اخبار رسالے چھپ رہے نیں، اوہناں نوں ہر تھاں اہمیت دِتی جاندی اے۔ پشتو تے سندھی زبان تے ادب تے صحافت تے نظر پا کے تسیں اندازہ لا سکدے او جے اوہناں صوبیاں وچ اپنی ماں بولی نوں سر دا تاج بنایا گیا اے۔ ایہدے مقابلے وچ اپنی ماں بولی پنجابی ول جھات پاؤ۔۔۔ اسیں پنجابی وچ بس منہ بھر کے، صرف گالھ کڈھ کے ٹھنڈے ہو جانے آں۔۔۔ افسوس دا مقام اے ساڈے کول پنجابی وچ کوئی عالمی پدھر دا اخبار نہیں۔۔۔ اک اخبار اے اوہ وی اِک دیوانہ مدثر اقبال بٹ پتہ نہیں کِنج کڈھی جا رہیا اے۔ ہن جمیل پال نے ’’لوکائی‘‘ دا دیوا بالیا اے۔۔۔ کجھ رسالے بس ناں دے جیوندے نیں۔ سانوں چیتے آ رہیا اے، چودھری پرویز الٰہی نے اپنے دور وچ ہمت کیتی تے اپنی ماں بولی لئی ’’پِلاک‘‘ جیہا ادارہ قائم کیتا۔۔۔ اوسے دور وچ پنجابی رسالیاں تے اخباراں لئی 5 فیصد کوٹے دا فیصلہ وی کیتا گیا اوہ کجھ چِر دو فیصد لبھیا فیر آن والی حکومت نے بند کر دِتا، جیہڑا ہن تیکر بند اے۔ اوس دور وچ ای روزنامہ خبراں جیہا اخبار نِکلیا سی جیہڑا بند ہو گیا۔ اسیں حیران آں، ماں بولی نال اِنج کیوں کیتا جا رہیا اے۔۔۔ کیہ ایتھے پنجابیاں دی حکومت نہیں؟ اردو ساڈی قومی تے ساریاں صوبیاں وچ رابطے دی زبان اے۔۔۔ اوہدی ترقی وی ضروری اے پر پنجابیاں نوں خاص طور تے اپنی ماں بولی دا وی خیال کرنا چاہیدا اے۔ پنجاب انسٹی ٹیوٹ نے گھٹ ویلے وچ بہتا کم کیتا اے۔ ایس نوں پنجابی یونیورسٹی بنایا جا سکدا اے۔ جتھے پنجابی ریڈیو، تے ٹی وی چالو کر کے پنجابی زبان تے ادب دی بڑھوتری کیتی جا سکدی اے۔ پنجابی اداریاں، اخباراں تے رسالیاں لئی خصوصی گرانٹ نہ صر ف ودھائی جاوے سگوں اشتہاراں دا طے ہون والا کوٹہ وی ودھا کے لاگو کیتا جائے۔ اج دے اکٹھ وچ سِر کڈھویں دانشور تے لکھاری موجود نیں سانوں پک اے ایہہ ماں بولی لئی کجھ فیصلے کر کے اُٹھن گے۔
پنجابیو! تہاڈی زبان کوئی معمولی زبان نہیں، ایہدے ادب نوں ،دنیا دی کسے وی زبان دے ادب دے مقابلے وچ دھریا جا سکدا اے۔ ایس زبان وچ ولیاں، درویشاں تے فقیراں نے ہمیش امن، محبت بھائی چارے تے انسان دوستی دی گل کیتی اے۔ اسیں بابیاں دی فکر نوں دنیا تے عام کر کے تے اوس تے آپ وی عمل کرکے اک مثالی سماج بنا سکنے آں۔ ہن سانوں اپنی ماں بولی لئی آپ کجھ کرنا پئے گا۔ ایہدے لئی اک دوجے دیاں لَتاں کھِچن دی بجائے سانوں اِک مُٹھ ہونا پئے گا۔۔۔ نہیں تے کھوتے ساہنوں ڈھگے کہندے رہن گے۔۔۔ کیہ خیال اے تہاڈا؟


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels