Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> کھرل دیہاڑ

کھرل دیہاڑ

وچار ڈیسک
September 26th, 2014

22ستمبر نوں پنجابی پرچار ولوں، پارٹی دے مرکزی دفتر وچ کھرل دیہاڑ دا پربندھ کیتا گیا۔ ربّ دے کلام توں تقریب دا مُڈھ بجھا تے مُڑ اوس دا بڑا سوہنا پنجابی ترجمہ عبدالرحمن پنجابی نے کیتا۔ سبھ توں پہلاں نجم الحسن حیدر ہوراں نے گل بات کیتی تے اوس توں مگروں اوہناں نے اپنیاں کجھ رچناواں سُنا کے پروہنیاں دا من پرچایا تے پنجابی سیوک محمد آصف رضا ہوراں نے گل بات کیتی اوہناں دا کہنا سی ایہہ گل بڑے منکھ نال کہہ رہیاں کہ ویہہ سال پہلاں پنجابی تحریک دی جیہڑی رفتار سی اج اوہ رفتار ودھن دی تھاں گھٹی ہے۔ پنجابی نے ترقی دی تھاں تنزلی ول پَیر پُٹے نیں ایس دی سمجھ نہیں پیندی۔ اوہناں نے مہمانِ خصوصی منظور احمد منظور ہوراں نال ویہہ سال پہلی ملاقات دا حوالہ دیندیاں ہویاں آکھیا کہ منظور صاحب نوں جدوں اسیں ملے ساں تے میں اوہناں توں پچھیا سی کہ ’منظور صاحب تسیں پنجابی فنکشناں وچ کیوں نہیں جاندے؟‘ تاں اوہناں جواب دِتا سی کہ اتفاق نال میں گیا سی مگر اوتھے پنجابی ادبی سنگت (وائے ایم سی ہال) اِک واری گیا سی اوتھے دا ماحول ویکھ کے میں ایہو آکھیا سی کہ ایہہ پنجابی نوں ہور ویہہ سال پچھے لے کے جان گے ۔آصف ہوراں اوہناں دی ایس گل نوں یاد کردیاں ہویاں کہیا کہ اج اوہناں دی گل سچ پئی لگدی اے۔ اوہناں نے گل بات دے دوران اپنے شعراں راہیں وی پنجابی مسئلے تے گل کیتی تے اوہناں پنجابی پرچار دے ایس اُدھم دی وی تعریف کیتی کہ کیویں صرف اِک دن دے فیصلے تے ایہہ ساری محفل سجی اے، جے کر ہور پلاننگ نال کم کیتے ونجن تے ہور بہتری آسکدی اے۔ اوہناں آکھیا کہ اِک احمد رضا پنجابی دے کلّے پیار دا صدقہ ہے کہ اج اینے جی جُڑ بیٹھے نیں جے اسیں سارے اپنے اپنے طور اُدھم کرئیے تے گل کِتے دی کِتے اپڑ سکدی اے۔ اج پنجاب اپنے سُورمیاں تک نوں بُھلائی بیٹھی اے ایس توں ودھ کے شرم دی کیہ گل ہو سکدی اے۔
سٹیج سکتر اوس دوران ہر مہمان نوں سدن دے نال نال مہان سُورمے احمد خان کھرل بارے جانکاری دیندا رہیا تے نال دی نال دھولیاں راہیں کھرل دیاں واراں وی پڑھ پڑھ کے سُناندا رہیا۔ اوس توں مگروں بابا نجمی ہوراں نے گل بات کیتی اوہناں دا کہنا سی کہ اج بڑی خوشی دی گل ہے کہ اسیں اپنے سُورمیاں نوںیاد پئے کردے آں، دیر نال ای سہی مگر چلو کوئی یاد کرن دا بہانا تے بنیا۔ اوہناں آکھیا کہ قوماں اپنے سورمیاں دے ناواں توں تے اپنے کلاسیکی ادب توں پچھانیاں جاندیاں نیں، اِک پکھوں تے اسیں لوکائی دی اپنی عقیدت دے کرے ہی بابیاں نوں تے یاد کیتی بیٹھے آں پر سُورمیاں ولوں سادیاں اکھاں بند نیں۔ اوہناں نے پنجابی فلم اندسٹری دی ایس حوالے نال تعریف کیتی اوہنا ں کہیا کہ ساڈے تیکر پنجابی سورمیاں دا ناں تے اوہناں بارے جانکاری فلماں راہیں ہی پہنچی ہے، جے ایہہ نہ ہوندا تے خورے اج اسیں اوہناں دا ناں تک نہ جاندے ہوندے، ایہہ تے بھلا ہووے اوس انڈسٹری دا جیس نے بھاویں اپنے مقصد لئی ہی سہی، ایہناں دی یاد تازہ کیتی رکھی۔ اوہناں نے احمد رضا پنجابی ، عارف جٹالا صاحب ولوں کیتی ایس تقریب دی بہوں تعریف کیتی کہ اینی جلدی وچ اوہناں نے پنجابی پیارے کٹھے کر لئے تے اج اسیں احمد خان کھرل دا دیہاڑ منا رہے آں۔گل توں مگروں اوہناں اپنی پنجابی وار دیاں کجھ تکاں وی پڑھ کے سُنائیاں۔
اوس توں مگروں جٹالا صاحب نے پنجابی پیارے دے ایس اکٹھ نوں بہت ای سلاہیا اوہناں دا کہنا سی کہ اج تحریکاں چلان دے طریقے بدل چُکے نیں سانوں نویں جدت ایہہ دس رہی ہے کہ پرانے طریقے نال چیزاں ہُن نہیں چل سکدیاں۔ اوہناں آکھیا کہ اج دی ایہہ شام اصل فیس بُک تے پنجابی نال پیار کرن والیاں دا وی اِک گرُپ بن چکیا اے جیہڑا ایس دے لئی کم کر رہیا اے ۔ ایہہ فیس بُک راہیں اج سارے اسیں ایتھے کٹھے ہوئے آں۔ سانوں ایس نویں زمانے دے نال پیر نال پیر پا کے تُرنا چاہیدا اے۔ تاں ای اسیں اپنی آن والی نسل لئی کوئی راہواں پدھریاں کر سکاں گے۔ اوہناں آکھیا کہ ایس توں سوہنی گل کیہ ہو سکدی اے کہ ایس ویلے پنجاب دے تِن شہراں وچ احمد خان کھرل نوں یاد کیتا جا رہیا اے۔ اخیر وچ اوہناں احمد رضا پنجابی دے کلّے طور کیتے ایس اُدھم نوں بہت سلاہیا۔
اوس توں مگروں ظہیر وٹو ہوراں نے اپنے خیالات دا اظہار کیتا تے کجھ گلاں سانجھیاں کیتیاں اوہناں دسیا کہ 1857ء میرا موضوع رہیا اے تے میری کتاب’’1857وچ وٹوواں دا کردار‘‘ ناں دی کتاب وچ میں پورے طور تے وٹوواں دی جدوجہد تے ہور راوی وسدے قبیلیاں نے جِنی دلیری نال گورے نال یُدھ کیتے نیں اوہ سارا ساڈے لوک ادب وچ پدھرا ظاہر نظریں پیندا اے۔ افسوس کہ اسیں ایس سرمائے ول ویکھیا ای نہیں۔ مٹی دے پُتراں نے مِٹی دا پورا پورا قرض ادا کیتا اے۔ اخیر وچ اوہناں کہیا کہ جو بندہ اپنی وسوں اپنی رہتل تے مان نہیں کردا میرے بھانے یاں توں ایس دھرتی دا نہیں یاں فیر اوہ حرام دا ہے۔۔
اوس توں مگروں پنجابی سکالر تے داکٹر سعید بُھٹا ہوراں نے احمد خان کھرل دی حیاتی تے اوس ساری جدوجہد دے پچھوکڑ دی گل کردیاں ہویاں دسیا کہ کیویں یورپین ساڈے سونے دی چِڑی دے دیس وچ لُٹاں پائیاں، اوہناں باہرلیاں نوں اندازہ ہی نہیں سی کہ ایہہ دیس ایڈا امیر تے کلچر ولوں ایڈا بھرواں ہووے گا۔ اوہناں دیاں تاریخ دیاں کتاباں وچ ساڈے لوکاں بارے اوہناں کدے وی چنگا نہیں لکھیا، اوہناں اِک ایسا سچا ڈھال لیا جیس وچ اوہناں اپنے مطابق ہی تاریخ رچی۔ افسوس دی صرف گل صرف اینی ہے کہ ساڈے لوکاں اپنی امیری، اپنے شاندار ماضی دا پتہ ای نہیں۔ ڈیڈھ دن دی لڑائی وچ پورے سندھ نوں ڈھیر کیتے انگریز دُشمن نوں پنجاب بہت ای مہنگا پیا۔ اِک ہوش محمد شیدی دی سندھ دی اواز بن کے اُٹھیا تے اوس ولوں ماریا نعرہ ’’مرسوں مرسوں سندھ نہ ڈیسوں‘‘ اج وی لوکاں دے مونہہ تے سلوگن بن کے رہ گیا اے، ہُن کدھرے وی سندھ نوں ونڈن یاں اوس دے حقاں تے ڈاکہ مارن دی گل ہووے تاں سندھی ایہہ نعرہ ماردے نیں تے پنجابی جیس نے اینے سال گورے دے پیر پنجاب دی دھرتی تے لگن نہ دِتے اوس دے شہیداں نوں یاد کرن واسطے نہ پنجابیاں کول ٹائم ہے تے نہ سرکار نے کدے ایدھر سوچنا ہے۔ اوہناں کہیا کہ اپنی رہتل، اپنی بولی نوں دی سانبھ واسطے کدھروں وانڈھیوں لوکاں نہیں آونا ایہہ سبھ کجھ سانوں آپ کرنا پینا اے۔ شہید احمد خان کھرل اَسی سالاں دی عمرے اُٹھیا کھلوتا سورما نِرا کلا پُرا ای نہیں سی راوی دے وسنیکاں کدے وی بگانے پیر دھرتی تے ٹِکن نہیں دِتے مگر افسوس اج صرف سانوں شہید احمد خان کھرل یاد اے کہ جد کہ اوس جوہ دے کِنے غیرت مند قبیلیاں نے جان تلی تے رکھ کے جنگاں لڑیاں سانوں پتہ ای نہیں۔ یورپین نے پنج پنج سو سال پرانی اپنی تاریخ تے لبھ لئی تے ساتھوں ڈُڈھ سو سال جو کہ ہُن دی گل سمجھی جانی چاہیدی اے سانوں پتہ نہیں کہ ساڈے کِنیاں سورمیاں نے جاناں دِتیاں۔ آخر ایہہ کِس کرنا اے ؟ ایہہ سانوں آپ ای کرنا پوسی۔
اخیر وچ پنجابی پرچار دے کنوینیر رضا احمدپنجابی ہوراں نے کہیا کہ مینوں اُمید وی نہیں سی کہ اینے سجن کٹھے ہو جاسن۔ اوہناں کہیا کہ جد میں پنجابی دا کم کرن لگا تاں کئیاں نے مینوں ڈرایا کہ مسئلے پیدا ہو سکدے نیں، مینوں نہ سمجھ آئی کہ اپنے حق لئی گل کرن نال کیہڑے مسئلے پینے چاہیدے نیں، اسیں مُلک توڑن دی گل کر رہے آں جاں کسے دے ایجنٹ بن رہے آں۔ایس ملک دی بقا دے ناں تے سانوں ساڈی ماں بولی اپنے دیس دی سیوا توں ہمیشہ روکن ایہہ رویہّ کوئی نویں گل نہیں۔ کدی مذہب دے ناں، کدی ملک دی سلامتی دا ناں لے لے کے سانوں ساڈے حقاں توں علاوہ سیوا توں وی دُور رکھیا گیا، مگر ایہہ ڈراما ہُن مزید نہیں چل سکدا، اج لوکاں دا شعور بیدار ہو رہیا اے۔ تے اج دا اِکٹھ ایس گل دا ساکھی بھردا اے۔ اوہناں نے آون والے سارے سجناں بیلیاں دا شکریہ ادا کیتا کہ اوہناں دے آون نہ میرا حوصلا مزید ودھیا اے تے اپنی بِت موجب جِنا ہو سکیا کردے رہواں گے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels