Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> قومی بولیاں نوں کون نہیں مندا

قومی بولیاں نوں کون نہیں مندا

زبیر احمد
July 22nd, 2014
5 / 5 (3 Votes)

ماروی میمن دا رب بھلا کرے جس نوں لوکاں دیاں بولیاں دا خیال آیا تے اوس قومی اسمبلی دی قائمہ کمیٹی وچ لوکاں دیاں دیس بھر وچ بولن جاون آلیاں بولیاں نوں قومی بولیاں بناون دا بل پیش کیتا۔ اجے ایس بل نیں اسمبلی وچ آونا سی تے مُڑ اوتھے وی ردّ ہو جانا سی کیوں جے اجے تیک پاکستان دے سیاست دان، سُوجھوان، لاکڑی ایس گل نوں منن لئی تیار نہیں پئی لوکاں دی بولی ہور اے تے ساڈی قومی بولی نری اک بہوں گھٹ گنتری دے بولن آلیاں دی بولی اے۔ ایس دا سٹہ ایہہ نکلیا اے پئی ساڈی تعلیم دا وی ستیا ناس ہویا اے، سُلیکھ(ادب) دا وی تے بدوبدی ساڈے سِر اُتے مَلی بولی پاروں نہ ایہہ فلسفے دی بولی بن سکی نہ پڑھائی دی تے انگریزی ساریاں نوں کڈھ کے پردھان بن گئی۔
آؤ تکیے اوہ کنج دی دماغی بنتر اے جیہڑی لوک بولی دی ویری اے تے ایس دے پچھے کیہڑے میل دے لابھ تے لبھت اے۔ ایس لئی نری ایس بل دے ردّن ویلے جو گل بات ہوئی اوس نوں ویکھ کے ساری گل بات دی سمجھ آ جائے گی۔
ایہ بل قومی اسمبلی دی قنون تے انصاف دی قائمہ کمیٹی وچ پیش کیتا گیا سی تے 16 جولائی نوں ردّ کیتا گیا۔ چنگی گل بات پچھوں قنون وزرات دے اک ہنڈے افسر دیاں دلیلاں پچھوں ایہہ بل اک- چار ووٹاں توں ردّ کر دتا ۔ ایس توں ایس گل دا وی پتہ چلدا اے پئی اک اُچیچے قومی مسلے نوں ساڈے آگو کنی اُچیچتا دنیدے نیں۔ ایس کمیٹی دی اگوائی بشیر ورک ہوراں کیتی۔ اوہ اکلے ایم این اے جس ایس بل دے حق وچ ووٹ دتا اوہ سردار امجد فاروق کھوسہ سن جیہڑے ڈیرہ غازی خان توں نیں۔ عجب گل اے پئی پی پی پی دے ایم این اے ایاز سومرو نے پہلاں گل بات وچ بل دی حمایت کیتی جد اوہناں ایہہ منگ کیتی پئی سندھی نوں وی قومی بولی قرار دتا جاوے پر اخیر وچ اوہناں ا پنا ووٹ بل دے خلاف دتا۔
جمیت علماء اسلام (ف) تے تحریک انصاف نے وی ووٹ ورودھ وچ دتا۔ جد کے ایم کیو ایم ووٹاں ویلے غیر حاضر سی۔
محترمہ ماروی میمن ہوراں آئین وچ بدلی دا ایہہ بل 2014 فروری وچ مسلم لیگ ن دے 9 ممبراں دی حمایت نال پیش کیتا سی جیہڑا آئین دی شق 251 وچ بدلی چاہندا سی ۔ ایس بل راہیں بلوچی، بلتی،براہوی، شینا، پنجابی، پشتو، سندھی، سرائیکی، ہند کو ، اُردو تے اوہناں ساریاں بولیاں نوں جیہڑیاں نیشنل لینگوئج کمیشن پاکستان نے ماں بولیاں قرار دتیاں نیں اوہناں نوں قومی بولی بناون دی منگ کیتی گئی سی۔ بل وچ ایہہ منگ وی کیتی گی سی پئی سرکار اک نیشنل لینگوئج کمیشن بنائے جیہڑا ملک وچ بولن والیاں ماں بولیاں نوں قومی بولیاں قرار دین دی کسوٹی متھے۔
بل دی اُچیچتا نوں اُگھیڑدیاں میمن ہوراں کمیٹی نوں دسیا پئی ایس بل دا مُڈھا ٹیچا ایہہ وے پئی ساریاں مقامی بولیاں نوں آدر دین لئی اوہناں نوں قومی بولیاں قرار دتا جاوے۔
اوہناں ایہہ وی آکھیا اوہناں دا ایہہ بل پہلے بل نالوں اُکا وکھر اے کیوں جے ایہہ بل پاکستان مسلم لیگ (ن) دے چوناں دے مینی فسٹو نوں مُکھ دھر کے پیش کیتا گیا اے جس وچ پارٹی نے وعدہ کیتا سی پئی نیشنل لینگوئج کمیشن بنایا جائے گا۔
بل دا ورودھ کردیاں، قنون وزرات دے سپیشل سیکرٹری جسٹس(ر) رضا خان نے آکھیا ایہہ بل کوئی مقصد حل نہیں کرے گا جے اسیں ایس نوں آرٹیکل 24 نوں مُکھ رکھ کے پڑھیئے جس وچ نکھیڑویں ڈھنگ نال بولی، لپّی یاں رہتل دی راکھی دی گل کیتی گی اے۔ اوہناں ہور آکھیا وزرات پہلاں ای اک اجیہا بل ردّ کر چکی اے جیہڑا اے این پی دے حاجی عدیل ہوراں پیش کیتا سی۔
سپیشل سیکرٹری ہوراں آکھیا قوم دی اک قومی بولی ہونی چاہیدی اے۔ وار(تواریخ) نوں چیتے کردیاں اوہناں آکھیا ملک پہلاں ای 1971 وچ ’’ مشرقی پاکستان‘‘ دا دُکھانت بھوگ چُکیا اے جد اساں اُردو تے بنگالی نوں قومی بولیاں قرار دتا سی۔
کیا بات اے جی سپیشل سیکرٹری دی جیہناں نوکری مُکن پچھوں وی ملک دا کھیڑا نہیں چھڈیا ۔ایہ اوہ تکنی تے میل اے جیہڑا پاکستان دے لوکاں دا حق مار کے بیٹھا ہویا اے جیہڑا ساڈی بولی، رہتل تے وار دا ویری اے۔ کیہ اسیں اک قوم آں پئی ساڈے اُتے اک بولی لاگو کرو او؟ کیہ پاکستان ایس پاروں ٹٹیا سی پئی بنگالی نوں قومی بولی قرار دتا گیا سی؟۔ ایس توں لگدا اے پئی اسیں وار توں کجھ نہیں سکھیا تے وار دے پُٹھے سٹے کڈھے نیں۔ مینوں پی پی پی دے ایاز سومرو اُتے وی حرانی ہوندی پئی پی پی پی والیاں نوں اینے آگو شہید کرا کے وی سمجھ نہیں آئی تے پھیر کدی نہیں آونی۔ اوہ کیویں دوجیاں پارٹیاں نال بُگت گے۔
مینوں اک وقوعہ چیتے آوندا اے۔ جنگ اخبار وچ پنجابی بولی دے حق وچ فورم سی۔افضل احسن رندھاوا جی پنجابی دی آگوائی کردے پئے سن۔ کسے نیں سوال کیتا پئی جے پنجابی آ گئی تے اُردو دا کیہ بنے گا۔رندھاوا جی نے جواب دتا ’’اسیں اُردو نوں کیہ کیہا اے، کیہ اُردو دی جُتی چوری ہو گئی اے، یاں کسے اوہدی ٹوپی کسے لا لئی اے؟‘‘۔
اصلوں مسئلہ ایہہ وے پئی جے دوجیاں بولیاں آ گیاں تے اُردو دا کیہ بنے گا، جے لوک راج آ گیا ساڈا کیہ بنے گا۔ پر ایہہ سچ نہیں ایہہ جھوٹ اے۔ ایہہ اک دن مُکنا اے۔لوک بولیاں اک دن پردھان ہونا اے ۔دُعا کرو ایہہ ملک تے اسمبلی رہ جاوے کیوں جے ایہناں دی نیت نہیں لگدی لوکاں دے حق پرتاون دی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels