Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> اپنے حق دی راکھی

اپنے حق دی راکھی

شفقت تنویر مرزا
February 8th, 2014

ہاشم شاہ آکھیا:
کہہ سُن حال حقیقت ہاشم ہُن دیاں بادشہاں دی
ظلموں کُوک گئی اسمانیں دکھیا زور دلاں دی
بس ہن ہور نہ کہہ کجھ ہاشم جؤں رب رکھے رہنا
ایہہ گل نہیں فقیراں لائق برا کسے نوں کہنا
فقیر ہاشم شاہ ایس دنیا دے ویہار نوں اک ہور پکھوں وی ویکھدا ہے۔ کہندے نیں اوس سسّی پنوں وغیرہ توں وکھ ہیر رانجھے دی سی حرفی وی لکھی جیہدے وچ کوٹ قبولے دے حاکم راجہ عدلی دے حوالے نال اک ہور پکھ نکھیڑیا۔ ہاشم شاہ کہندا اے:
یار نوں یار دے ہتھ دتا اوہناں کھیڑیاں تائیں کھدیڑیو ای
جُگ جُگ ہووے راج عادلاں دا، راجے نیاؤں ہی نیاؤں نبیڑیو ای
ہاشم شاہ اوہناں دوئیاں دا بُوٹا مڈھ توں چا اکھیڑیو ای
گل ساری دی ساری انصاف دی ہے۔ ہیر نوں انصاف نہ ملیا اوہ ماپیاں دے وی گل پے گئی تے نال ای قاضی شمس الدین دے وی۔۔۔ سسّی نال ہوت دَھرو کر گئے اوس آزادی کھوہ لئی تے پنوں وَل ٹر پئی۔۔۔ جو آزادی کھوہندے نیں اوہناں نوں ایس یُدھ وچ موت سمیت بہت کجھ جرنا پیندا اے۔۔۔ سسّی آزادی خاطر موت نوں چُن لیا۔۔۔ اپنے حقاں لئی سوہنی پرنیون دے باوجود لڑدی رہی، اپنا بنیادی حق ورتیا تے فیر اوہدی موت بارے ہاشم شاہ آکھیا:
پڑھیا خضر حیات جنازہ دفن کیتے وچ پانی
ہاشم عشق سوہنی دا جگ وچ جُگ جُگ ریہگ کہانی
ایہہ سسیاں، سوہنیاں، ہیراں تھلاں تے چناہواں نوں عشق دے ناں لا گئیاں ایہہ کوئی آسان کم اے۔۔۔ ازلی ابدی عاشق بننا تے فیر صوفیاں، درویشاں تے کُل لوکائی نوں مگر لا لینا۔۔۔ بہوں اوکھا پندھ اے تے ایہدے بارے ہاشم شاہ آکھیا:
قصہ آکھنا عاشقاں کاملاں دا ایہہ وی بندگی ہے دُھروں نال آئی
ایہہ عاشق کون سن؟ ازلوں اپنا حق منگن والے، یعنی بنیادی حقوق منگن والے، انصاف منگن والے تے ایہناں دے قصے آکھنا ہاشم شاہ دی عبادت بن گیا۔ اوہنے ایویں نہیں آکھیا تے ایہہ عبادت وی مسیت توں شروع ہوندی اے۔
اک دن شوق سمے، جگدئیں بیٹھاں وچ مسیتی
یاراں دردمنداں فرمائش نال محبت کیتی
سوہنی تے مہینوال بناؤ نال انھاں جو بیتی
گل صرف سوہنی مہینوال تائیں نہیں رُکی۔ عبادت صرف پنج نمازاں تائیں تاں نہیں رکدی پر کسے دی اپنی ہمت، توفیق تے نیت ہے۔ ہاشم واسطے عاشقاں دی اک وڈی قطار ہے جیہنوں اوہ نیوں نیوں سلام کردا اے۔
سوہنی تے مہینوال، زلیخا، مرزا ہیر سلیٹی
سسّی ہوت، جلالی، مجنوں، ملکی عشق جٹیٹی
ہند زبان کہی شعراواں سبھے عشق اوہناں دے
ہند زبان دی گل آئی تے ہاشم شاہ تاں عرباں دا پُتر سی، عربی عرباں واسطے سبھ توں وڈی وڈیائی اے۔ ہاشم پیو نال عربوں ٹُر کے آیا پر ایتھے لوکاں نال جبہ و دستار والا ہتھ نہیں کیتا۔ ع تے ق۔۔۔ دی وڈیائی تے استادی نوں اک پاسے کر اوس ہند زبان وچ اپنا آپ ظاہر کیتا تے جیہڑیاں کتاباں قصیاں توں وکھ لکھیاں، اوہناں دے ناں نیں:
گیان پرکاش، شلوک، چنتاہر، راج نیتی
پوتھی حکمت و رَمل تے ٹیکا پنج گرنتھی
ہاشم شاہ انج نہیں آکھیا پئی میری قومی تے مادری زبان عربی اے جیویں ساڈے ایتھے سٹھ ورھیاں توں آکھیا جا رہیا اے۔ اوس فارسی وچ وی لکھیا تے اوہدی دس انج پائی جاندی ہے۔ دیوان ہاشم، مثنوی ہاشم، چہار بہار ہاشم، گنجِ معانی (فقر نامہ)
آکھیا جاندا ہے وارث شاہ نے بھاگ بھری نوں باریں ڈاچیاں چراندیاں ویکھیا، ہاشم شاہ بارے کہیا گیا پئی اوہ اک برہمن کُڑی نوں ویکھ سسّی لکھن بہہ گئے یاں اوس کُڑی پاروں جگدیو چھڈ کے سیالکوٹ دے تھرپال آن بیٹھا یاں شاہ حسین مادھو لال نوں ویکھ کافیاں دی صورت دبی مارن لگ پیا۔۔۔ ایس سلسلے دی اک لمّی لین ڈوری اے جیہڑی جُگ جُگ رہس کہانی۔۔۔
ہاشم شاہ دی ہند زبان ول دھیان مارو: اوتھے جُگ جُگ رہس کہانی وی اے تے جُگ جُگ ریہگ کہانی۔۔۔ رہسی تے رہوے گی۔۔۔
ایہہ ہند زبان دیاں ساریاں گلاں تے مسئلے اج نبیڑن دی بڑی لوڑ اے۔۔۔ اج ایہہ گل وی نبیڑنی ہوسی پئی ہاشم شاہ دی گیان پرکاش یاں گیان مالا ایہدر کیوں نہ چھپی۔۔۔ پوریاں لکھتاں سامنے نہ آون پاروں بندے دی پوری کایا یاں شخصیت دا پتہ بھلا کیویں لگ سکدا اے۔۔۔ ہاشم شاہ اک اجیہیا شاعر اے جیہدی زبان نوں لسانیاتی اصولاں مطابق ویکھن پرکھن دی ڈاہڈی لوڑ اے۔۔۔ ایہہ ساڈی سیاسی کہانی تے ادبی لوڑ اے۔ ایسے طرح گیان پرکاش بارے کھوج پرکھ ساڈے فکری پچھوکڑ نوں سمجھن تے سمجھاون لئی اَت ضروری اے۔۔۔
آکھن نوں تاں ڈاکٹر موہن سنگھ ہاشم شاہ نوں پنجابی دا عمر خیام وی آکھ چھڈیا پر ایس گل نوں اگے کیویں ٹوریئے۔۔۔ اساں تاں اپنیاں ساریاں نوں بھلاون اُتے زور لا دتا اے۔۔۔ پر احمد راہی ورگے وی سن جیہناں اندر ہاشم دی آواز وی گونجدی سی، ایہہ سرمایہ وی اوہدے خون اندر رچیا ہویا سی، اوس آکھیا:
جے توں مرزا ہوندیوں رانجھیا تے میں تتڑی زہر نہ پھکدی
تے ہاشم شاہ ہیر توں وی ایہو گل اکھواندا اے:
جچرک جوگ کمائے، جے توں جان تلی پر دَھردوں
مرزے یار وانگوں دِن اکسے، یار مِلدوں یا مردوں


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels