Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> ’’سنگت بُلھے شاہ‘‘ لاہور وچ پہلا بُلھے شاہ میلا

’’سنگت بُلھے شاہ‘‘ لاہور وچ پہلا بُلھے شاہ میلا

وچار ڈیسک
September 3rd, 2013

(رپورٹ: عرفان کامریڈ )
اج ساڈا سماج جیہڑے دہشت گردی تے شدت پسندی دے گھیرے وچ آئی ہوئی اے‘ اوہدے توں سانوں بلھے شاہ ای بچا سکدا اے
بلھے شاہ نے دوجے صوفیاں وانگ عام لوکاں دی گل کیتی‘ پیار محبت تے بھائی چارے دا سنیہا دتا‘نوجوان نسل تیکر ایہہ سنیہا اپڑانا ضروری اے
جولائی دے پہلے ہفتے وچ دُبئی ٹاؤن رائے ونڈ روڈ لاہور دے کُجھ نوجواناں نے فکرِ بُلھے نوں نویں نسل تیکر اپڑان دے عزم نال اک تنظیم ’’سنگت بُلھے شاہ‘‘ قائم کیتی جہدے مقصداں وچ بُلھے شاہ دا کلام چھاپنا، گانا تے ڈرامے وغیرا دے ذریعے لوکائی تیکر پہنچانا طے ہویا۔
ایس تنظیم دے واجد علی سر پرستِ اعلیٰ، شبیر حسین ایڈووکیٹ جنرل سیکرٹری، اعجاز علی فنانس سیکرٹری، ماسٹر انوار احمد چیئرمین مِتھے گئے، سنگت نے لاہور وچ پہلا بُلھے شاہ میلا 24 اگست 2013 نوں ہفتے دے دیہاڑے شام 8 وجے دُبئی ٹاؤن وچ منایا۔ پروگرام وچ بُلھے شاہ دی حالات زندگی تے فِکرو فلسفے اُتے چانن پاندے ہوئے میاں ممتاز حسین ایڈووکیٹ تے جناب مسعود خالد (سانجھ پاکپتن) نے ایس گل اُتے زور دتا کہ ایس طرحاں دے پروگرام منعقد کرواناکیوں ضروری نیں ؟ ایہہ پروگرام گلی گلی ہونے چاہیدے نیں تاں جے ساڈی سوسائٹی اپنی صوفی روایت توں غافل نہ ہووے تے خاص کر نوجوان نسل اپنے شاندار تواریخی ورثے نوں سنبھال سکے۔ اوہناں نے ہور آکھیا کہ صوفی ہمیشہ عام لوکاں دی گل، پیار، محبت تے بھائی چارے دے پیغام دیندے نیں، صُلح گل تے رواداری دا پرچار کردے نیں۔ اج ساڈی سوسائٹی شدت پسندی تے دہشت گردی دے نرغے وچ اے۔ سانُوں بُلھا ای بچا سکدا اے۔ پروگرام وچ محفل مشاعرہ، ڈراما ہیر رانجھا، بُلھے شاہ دی شاعری، حالات زندگی اُتے گل بات تے سنگیت وچ بُلھے شاہ تے ہور شعراں دا کلام گا کے سُنایا گیا۔ محفل مشاعرہ دی صدارت اوکاڑہ توں آئے شاعر جناب فِدا بخاری تے اُچیچے پروہنے مشاق عالم گوگا، نظامت دے فرائض یوسف پنجابی تے افضل ساحر نے نبھائے، سنگیت کاراں وچ شفیق احمد ساجدی (حافظ آباد) مینا حمید (لاہور) خالد بھٹی (قصور) محمد حسین سمندری، سیمسن (لاہور) تے صفدر ماہی نے کافیاں گاکے حاضرین محفل دے دل موہ کے داد لئی۔ سمندری توں آئے رانا عبدالستار نے جوڑی وجائی جو کدی عالم لوہار دے نال وجاندے ہوندے سن جیہنوں لوکاں نے بہت پسند کیتا۔
کسے ہال یاں حویلی دی بجائے مین بازار وچ سٹیج تے کُرسیاں لگیاں سن۔ بال، جوان، بُڈھے تے سوانیاں سبھ اکٹھے میلے سمے موجاں مان رہے سن۔ شام 8 وجے توں سویر 4 وجے تیکر مجال اے کسے نے ہوٹنگ یاں رولا پایا ہوئے، کسے نوں تنگ کیتا ہوئے ہر امیر غریب اک ای کیفیت وچ نظر آئے۔ اخیر وچ افضل ساحر دا پُرمغز خطاب ’’صوفی تے مُلاں دے فرق‘‘ دا شاندار تجزیہ سی۔
پنڈال وچ بُلھے شاہ دے شعراں والیاں فلیکساں لگیاں ہوئیاں سن جیہناں اُتے بُلھے شاہ دے ایہہ شعر درج سن۔
اٹ کھڑکے دُکڑ وجے تتا ہوئے چُلھا
آون فقیر تے کھاکھا جاون راضی ہوئے بُلھا
عاشق ہویوں رب دا، ہوئی ملامت لاکھ
تینوں کافر کافر آکھدے توں آہو آہو آکھ
بُلھے نالوں چُلھا چنگا، جس پرطعام پکائی دا
رل فقیر اں مجلس کیتی بھورا بھورا کھائی دا
کئی حاجی بن بن آئے جی
گل نیلے جامے پائے جی
حج ویچ ٹکے لئے کھائے جی
بُلھا ایہہ گل کیہنوں بھائے جی
شعراکرام فدا بخاری، افضل ساحر، یوسف پنجابی، مشتاق عالم گوگا، صائمہ الماس، علی احمد گجرات، عارف شاہ کامونکی، حافظ صادق فِدا بھائی پھیرو، زاہد صدیقی، احمد اقبال بزمی، حمید ناصری، سید ذاکر حسین شاہ، اسلم شوق تے کامریڈ عرفان علی شامل سن۔
پروگرام دے اخیر اُتے بُلھے شاہ دے کلام اُتے دھمال پائی گئی تے بُلھے شاہ سنگت دے سیکرٹری جنرل شبیر حسین ایڈوکیٹ نے سارے شعرا اکرام، گلوکاراں، ڈرامے دے فنکاراں تے سامعین دا شکریہ ادا کیتا۔ بُلھے شاہ سنگت دے سارے عہدیداراں نوں میلے دی کامیابی اُتے مبارکباد پیش کیتی۔ بُلھے شاہ دے عرس دے موقع اُتے ہر سال لاہور وچ بُلھے شاہ میلا منان دے عہد دے نال ایہہ پروگرام ختم ہویا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels