Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> اُردو نہیں انگریزی پڑھاؤ

اُردو نہیں انگریزی پڑھاؤ

April 18th, 2013
4 / 5 (2 Votes)

پاکستانی لوکائی دے بوہتے لوک انگریزی پڑھنا چاہندے نیں اُردو نہیں۔ایہہ را ء لوکاں گیلپ پاکستان دے مُلک بھر وچ کیتے سروے وچ کیتی اے۔ایہہ سروے جنگ،دی نیوز تے جیو دی سانجھ نال کیتا گیا تے شہری تے پینڈو علاقیاں وچ کیتا گیا۔ 18 مارچ توں 25 مارچ دے ایس سروے وچ ہر عمر دے مرداں جنانیاں سانجھ پائی۔ تعلیم دیاں تناں پوڑھیاں بارے وکھرے سوال کیتے گئے۔پرائمری تعلیم بارے سوال دا جواب دنیدیاں 49% آکھیا پڑھائی دا وسیلہ انگریزی ہونی چاہیدی اے تے 42% نے اُردو دے حق وچ راء دتی تے 8% نے ’مقامی بولیاں‘ دے حق وچ۔سیکنڈری(چھیویں توں دسویں) بارے 60% نے انگریزی تے 34% نے اُردو تے 4% نے مقامی بولیاں دے حق وچ راء دتی۔اعلی تعلیم بارے سوال دے جواب وچ65% نے انگریزی تے 30% نے اُردو تے 4% نے ’مقامی بولیاں دے حق وچ راء دتی۔
ایہ انکڑے کوئی نرپکھ نہیں ہن تے ایہناں وچ وی بڑے رولے نیں۔ ونگی وجہوں جے تُسی اندرون سندھ دے وچ پُچھو تُسی کیہڑی بولی وچ پڑھنا چاہندے اوہ تاں خورے اک بندہ وی اُردو دے حق وچ نہ بولے تے اِنج لہور تے وڈے شہراں دے جی جیہڑے ’مادری زبان‘ نوں اُردو سمجھدے نیں بھاویں اوہناں دی ماں بولی اُردو نہیں اے ایہ لوک اُردو دے حق وچ بولن گے۔ایویں کراچی تُوں اک بندہ وی خورے ’مقامی بولی ‘ دے حق وچ نہ بولے۔ پر اسیں من لیندے آں ایہ انکڑے صیحح نیں تے ایہہ کیہہ دس پاندے نیں۔
پہلی گل تاں ایہہ وے پئی اُردو دا رولا مُکدا جاپدا اے کیوں جے ہن اُردو نال کوئی میل اُچیرا نہیں ہوندا تے خاص فرق نہیں پیندا۔ ہن رُتبہ انگریزی نال جُڑیا اے سگوں وچلے میل دیاں تنے پرتاں اُچلا وچلا میل تے وچلا وچلا میل تے کجھ کجھ ہیٹھلا وچلا میل جے بوہتے مہنگے نہیں تاں گھٹ مہنگے انگریزی سکولاں وچ بالاں نوں پڑھا ندے پئے نیں جیہڑی ہن محلیوں محلے کُھلے ہوئے نیں۔ کیوں جے رزق ہن اُکا انگریزی نال جُڑیا ہویا اے تے اُردو سائنیس تے ٹیکنولوجی دی بولی نہیں بن سکی ایس لئی اُردو کوئی پڑھنا وی نہیں چاہندا اے۔ خاص کر جے میٹرک پاس جوان کمپیوٹر یاں موبائل دا کوئی نکا موٹا کم کردا اے تے اُردو اوس دا کجھ نہیں سواردی ہاں جے اوس نوں تھوڑی انگریزی آوندی ہوندی تاں اوس نے کتھوں ودھ کمائی کرلینی سی۔ پردیس جانا وی سوکھا اے جے انگریزی آندی ہووے ۔ چیتے رہوے پئی وچلے میل دے سوکھے جیاں کول رزق وسیلے ہوندے نیں تے اوہ کوئی نہ کوئی آسرا بھال لیندے نیں ۔گھٹو گھٹ اوہناں کول چنگی تعلیم تاں ہوندی اے جیہڑی اوہناں دا ہتھ پھڑی رکھدی اے۔ پر ماتڑاں کول تاں کجھ وی نہیں ۔ایس لئی انگریزی کمائی دا وی وسیلہ اے تے چڑھائی دا وی راہ اے۔
ہن پنجاب سرکار نے پہلیاں تن جماعتاں وچ انگریزی لا دتی اے تے بال ایہہ وی آکھدے نیں سانوں انگریزی چھیتی آ جاندی اے اُردو دی تھاں۔ تیجی تے اُچیچی گل ایہہ وے اُردو ہن اوس ’نظریہ پاکستان‘ دی گٹھڑی ( پیکج) دا ای حصہ رہ گئی اے جیہدی ورتوں ہن دستور دیاں 62,63 دیاں شقاں وچ رہ گئی اے پئی کیہڑا بوہتا مسلمان اے تے کیہڑا گھٹ۔ ہن اُردو رابطے دی بولی بن گئی اے تے ایس نوں منن وچ کوئی حرج نہیں جے اوہ ساڈیاں لوک بولیاں نوں قومی بولیاں من لین۔
اسیں دوبو لڑی تعلیمی نظام ول ودھدے پئے آں۔ جیہڑا انگریزی تے بال دی ماں بولی ہوسی ۔ایس ویلے ماں بولی راہیں اسیں بالاں دے پیر مُڑ دھرتی اُتے ٹکا سکنے آں کیوں جے نری انگریزی بولی بالاں نوں آپنے دیس، دھرتی تے لوکائی تُوں وجوگ دنیدی اے۔ لہور دی سبھ توں مہنگی یونیورسٹی Lums لمز وچ جگ دیاں ساریاں بولیاں پڑھائیاں جاندیاں نیں سوائے پنجابی دے سارے جگ دیاں واراں پڑھائیاں جاندیاں نیں سوائے لہور دے جتھے ایہہ یونیورسٹی ہے جس دی ہوا ، ٹُکڑ تے رُتاں تُسیں ماندے اوہ پر اوس شہر نوں نہیں مندے ۔ سارے جگ دیاں پڑھائیاں کر کے ایہہ شہر پڑھیاراں لئی کورا، وجوگیا تے ان جانیا رہندا اے۔ تُسی سوچو تُسی آکسفررڈ یاں ہاروڈ وچ پڑھو تے لندن یاں بوسٹن توں واقفی نہ ہووے۔
ایس دا اُپا ایہو اے پئی بالاں نوں پہلیاں جماعتاں توں اوہناں دی آپنی بولی وچ تعلیم دیو تے مُڑ اگے جا کے انگریزی تے اُردو وچ۔ ماں بولی پیارے 65 ورھیاں توں ماں بولی پڑھان دی منگ کردے پئے نیں۔ اسیں اُردو نوں تھاں دین لئی وی راضی ساں پر کسے ساڈی نہ منی تے ہن ویلے نے آپوں اُردو ٹکے ٹوکری کردتی اے۔ اجے وی ویلا اے پئی اسیں بالاں نوں اوہناں دا جماندرو حق پرتا دئیے۔
اُردو دی ناقدری ماں بولی دے پیاریاں نہیں کیتی ایہہ کیتی اے منڈی نیں تے راس والی (سرمایہ داری) نے جس وچ اُردو دی کوئی تھاں نہیں ہن علامہ اقبال دی گاڑھی اُردو کون پڑھسی۔ دوجے بنے اُردو نال ساڈا کوئی جذبے دا تعلق کدی وی نہیں سی سگوں بدوبدی ساڈے اُتے مڑھی گئی سی تے آپے ہن ڈھیلی پیندی جاندی اے۔ دوجے بنے جے دیس وچ جمہوریت تگڑی ہوندی اے لوک بولیاں دی گل نوں ولانا اوکھا ہوندا جاسی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels