Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> جمہوری بیر

جمہوری بیر

بابا نجمی
April 14th, 2013
5 / 5 (2 Votes)

دھرتی دے جمہوری بیر
سستّے لکھ روپیے سیر

پکّے پکّے چُن چُن کڈھو
کچے کانے داغی چھڈو
کِنے تولاں جھولی اڈو
ایہو جیہے نیں اونے فیر
دھرتی دے جمہوری بیر
سستّے لکھ روپیے سیر

کوئی وی رشوت خور نہ لینا
قاتل ڈاکو چور نہ لینا
وعدے دا کمزور نہ لینا
جیویں مرضی پھولو ڈھیر
دھرتی دے جمہوری بیر
سستّے لکھ روپیے سیر


جدّی پُشتی ویچن والا
ویلا نہیں جے سوچن والا
ایویں دند کھروچن والا
نیکی ویلے کاہدی دیر
دھرتی دے جمہوری بیر
سستّے لکھ روپیے سیر


جرنل کرنل وی منگواؤندے
میئیں خان وڈیرے آؤندے
غُنڈے اپنے نال لیاؤندے
لا لا تڑھیاں کردے زیر
دھرتی دے جمہوری بیر
سستّے لکھ روپیے سیر


بندہ واں بڑبولا بھاء جی
شیشے ورگا تولا بھاء جی
کیہڑی گل دا اولھا بھاء جی
اِک دُوجے دے اسیں مسیر
دھرتی دے جمہوری بیر
سستّے لکھ روپیے سیر


ایہناں نوں زرداری کھاندا
میاں ویکھ دھمالاں پاندا
ہر سرکاری لے کے جاندا
مِشری پاواں کرو چنگیر
دھرتی دے جمہوری بیر
سستّے لکھ روپیے سیر


وچوں علمی ادبی لبھّو
سچّے ہسبی نسبی لبھّو
محبتی، مذہبی، کسبی لبھّو
چھڈو ایویں تسبی پھیر
دھرتی دے جمہوری بیر
سستّے لکھ روپیے سیر


ماڑے پھڑ پھڑ گِٹکاں تکن
ایویں ہوکے ہاواں پھکّن
گاہکاں دا پئے رستہ ڈکّن
ایڈے مہنگے بڑا ہنیر
دھرتی دے جمہوری بیر
سستّے لکھ روپیے سیر


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels