Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> پنجابی تحریک وچ نواں اُبھار

پنجابی تحریک وچ نواں اُبھار

وچار ڈیسک
April 1st, 2013

اقوام متحدا ولوں 21 فروری نوں مادری زبان دا دن مِتھے جان دے بعد ایہدے اثرات پاکستان وی اپڑ پئے نیں۔ شروع دے اک دو سالاں تیکر تاں اردو مافیا نے قوم نوں ایس دن دی ہوا وی نہیں سی لگن دتی۔ بعدوں قومی تے مادری زباناں دے لفظ نوں آپو وچ اک دُوجے دا متبادل مِتھدے ہویاں پنجاب اندر زور شور نال پراپیگنڈا کیتا جان لگیا کہ پنجاب واسیاں دی تاں ماں بولی ای اردو ہو چکی اے۔ رب دا شکر اے' ایس مکروہ پراپیگنڈے دا پنجابیاں اُتے کوئی بہتا اثر نہیں ہویا تے میڈیا دے ایس دور وچ اوہ حقیقتاں وی ساہمنے آون لگ پئیاں نیں جیہناں نوں کسے نہ کسے دھر ولوں لُکان دے جتن کیتے جاندے رہے۔ ایس وار مادری زبا ن دیہاڑ اُتے پورے پنجاب اندر کوئی اِکی بائی تھاواں اُتے نکے وڈے اکٹھ کیتے گئے جیہناں وچ مادری زبان پنجابی دے حوالے نال ای گلاں ہوئیاں۔ لاہور دِیاں دو یونیورسٹیاں وچ مادری زبان دیہاڑ منایا گیا تے پڑھیاراں نوں ماں بولی دی اہمیت بارے دس پائی گئی۔ لاہور وچ ای پنجابی ادبی بورڈ ولوں اک پریس کانفرنس' وکھالے تے جلوس د ے آہر ہوئے جیہدے وچ بارش دے باوجود پنجابی سیوکاں دی وڈی گنتی نے رلت کیتی۔
ایس سلسلے وچ چیتے رکھن والی گل ایہہ اے کہ اجے پنجابی زبان نوں اوہدے حق دوان واسطے بہت زیادا یدھ لڑن دی لوڑ اے۔ اُچیاں کرسیاں اُتے بیٹھی افسر شاہی تے حکمران پنجابی زبان نوں اوہدا حق اینی چھیتی نہیں دین گے۔ اردو مافیا وی ایہدی مخالفت واسطے نویں سریوں سرگرم ہو جاوے گا۔ ایہہ ساریاں اوہ چیزاں نیں جیہناں بارے ہر پنجابی سیوک نوں پہلاں وی پتا اے۔ جیہڑی گل دی ضرورت اگے نالوں ودھ محسوس ہو رہی اے' اوہ ایہو اے کہ پنجابی سیوکاں نوں اپنیاں صفاں وچ ایکا قائم رکھنا پوے گا۔ ساڈی ناکامی دا وڈا کارن وی ایہو اے کہ کجھ سیوکاں نے ڈیڈھ اِٹ دیاں مسیتاں بنائیاں ہوئیاں نیں تے کسے وی گل اتے اتفاق نہیں کردے۔ سارے تے نہیں پر اِکا دُکا اجہے وی نیں جیہناں دا زیادا زور تے تران کم ول دھیان دین دی بجائے دُوجے دی مخالفت وچ لگ جاندا اے جیہدے پاروں اک پاسیوں کندھ بناون تے دُوجے پاسیوں اوسے کندھ نوں ڈھائی جان دا عمل ہو رہیا اے۔
پنجابی دی حمایت وچ جلوس دے بعد ایس ٹمپو نوں برقرار رکھنا ای اصل کم اے۔ عام کر کے پنجابی سیوک چھیتی تھکدے تاں نہیں پر اَکدے ضرور نیں۔ محنت تے جدوجہد دے بعد اک پاسے بہ جان دا نتیجا ایہہ ہوندا اے کہ کیتا ہویا کم وی ضائع ہو جاندا اے۔ ایہہ شاید پہلی واری ہویا اے کہ پنجابی دِیاں ساریاں دھراں کٹھیاں ہو کے ''گھٹ توں گھٹ منگاں'' دے نال ساہمنے آئیاں نیں۔ آس کیتی جاندی اے کہ ایسے ایکے تے آہر نال اوہ رَل مِل کے اپنی جدوجہد نوں منطقی انجام تیکر اپڑان گیاں تے مخالفاں دے پراپیگنڈے' پھٹ پاوُ کرتوتاں تے نااتفاقی توں بچن دا آہر کرن گیاں۔
(شکریے نال اداریہ روزوار ''لوکائی'')


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels