Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> کیہڑا لہور تے کیہڑے سُلیکھ میلے

کیہڑا لہور تے کیہڑے سُلیکھ میلے

زبیر احمد
March 1st, 2013
5 / 5 (1 Votes)

لہور اج کل بسنتی ہویا پھردا اے جد بسنت ہوندی سی تد لہور گُڈیاں نال بھریا ہوندا سی پر ہوا وچ سواد اجے اوسے رُت دا ہے ۔
جد دی لال پری (میٹرو بس) لہور وچ چلی اے لہور دی ٹور تاں ویکھی نہیں جاندی۔ پچھلا ہفتہ لہور دے پنجابی پیاریاں تے اُردو تے انگریزی لکھاریاں لئی بہوں رُجھواں سی ۔ بہتا ماں بولی تے لہور دے انگزیری لکھاریاں لئی۔ 21 فروری نوں ماں بولی دیہاڑ سی تے پنجابی پیاریاں لہور پریس کلب توں اسمبلی ہال تیک بھرواں جلوس کڈھیا۔ اوسے شہر وچ 23,24 فروری نوں لہور سُلیکھ(ادبی) میلہ ہویا جس وچ ساریاں بولیاں سن ، اُردو تے انگریزی پر نہیں سی تے لہور دی بولی نہیں سی، لہور دے لوک نہیں سن، لہور دی رہتل نہیں سی۔ اسیں لہوریاں دے ہتھاں دے بنے پُٹھوڑے ، نان حلیم تاں شوق نال کھانے آں پر ایہناں لوکاں دی بولی سانوں اینی بھیڑی کیوں لگدی اے؟ تے ایہناں میلے ہتھاں تے محنتیاں نوں جھب کڈھ دینے آں۔
آؤ پہلاں ماں بولی دے جلوس دی گل کرئےے۔ ایہہ جلوس بہوں چر پچھوں نکلیا اے پر سارے پنجابی پیارے ہن ایس گل اُتے مُکے ہوئے نیں پئی ہن ویلا اے کہ اسیں گج وج کے پڑ وچ آئےے تے بولی لئی گھول کرئےے ہن نُکرے بہہ کم کرن دا ویلا نہیں جد اج وی اسیں بولی لئی گھول نہ کیتا تے پھیر ویلا ہتھ نہیں آونا۔ ایہہ بہوں خُشی دی گل اے پئی سجناں تے بولی پیاریاں جلوس دے سّدے دا بھرواں ہنگارا دتا۔ ایس جلوس دا مُڈھلا ٹیچا ایہہ سی پئی گھٹو گھٹ بال نوں پرائمری تعلیم ماں بولی وچ دتی جاوے تے ماں بولی جے لازمی نہیں تے اک مضمون دی پدھر اُتے پڑھائی جاوے۔
جے ماں بولی دے جلوس وچ مہاتڑ تے ہیٹھے میل دے جی سن تے لہور سُیلکھ میلے وچ کوئی وی مہاتڑ نہیں سی۔ بوہتے جوان لوک سن انگزیری سکولاں تے یونیورسٹیاں دے پڑھیار یاں اُستاد تے پروفیسر تے وچ کجھ ادھکڑ تے وڈیری عمراں دے وی سن۔ پڑھیار آپس وچ وی انگریزی وچ گل بات کردے سن تے پنجابی تاں دور دی گل اے اُردو توں وی فارغ سن۔ ایہہ پڑھیار انگزیری دے لکھیاراں نوں ویکھن تے سُنن آئے سن۔ ایہناں لکھاریاں وچ سرکڈھویں محسن حامد، دانیال محی الدین، بپسی سدوا ، ولیم ڈلرمیپل، ندیم اسلم تے کجھ ہور لکھاری وی سن۔ سیاسی نرواراں وچ طارق علی، احمد رشید، حمید ہارون ، وار کار عائشہ جلال تے فرانسن روبسن شامل سن۔ جیہڑے اکٹھ ہوئے اوہ سارے انگریزی وچ سن تے سُنن آلے وی انگریزی دے جانو سن۔ دسیا گیا اے 30,000 لوکاں ایہہ میلہ تکیا ۔ 50 توں ودھ بُلار سن۔ ایس میلے اُتے پنجابی پیاریاں نوں کھل کے گل کرنی چاہیدی اے تے نرا ایہہ آکھ کے پئی ساڈا ایس نال کیہ تعلق اے گل نوں رد نہیں کر دنیا چاہیدا۔
پہلا گل تاں ایہہ اے پئی ایہناں سُلیکھ میلیاں دی کیہ سیاست اے؟ ایہناں پچھے کون اے؟ دوجی انگزیزی بولی تے سُلیکھ دی کیہ سیاست اے۔ کیہ ایہہ انگریزی بولی ہندوستان وچ گوریاں دی بولی توں وکھ اے؟ برطانیہ دا ایہناں میلیاں وچ خاص ہتھ اے انگزیری لکھاری تے سفارت خانے ایہناں میلیاں وچ ودھ چڑھ کے حصہ پارہے نیں۔ دوجے ایہناں میلیاں دا تعلق منڈی دی معیشت نال اے۔ ایہناں میلیاں دا ملٹی نیشنل کمپنیاں ہتھ ونڈا رہیاں نیں تے خرچیاں وچ حصہ ونڈا رہیاں نیں۔ ایہناں میلیاں توں کسے نوں ڈر نہیں میلے کران آلے تے آون آلے اُچ میل دے نیں جو رج کے لوکاں توں وجوگیا ہویا میل اے ایہناں دی دولت دے سومے کیہ نیں پچھے کوئی نہ کوئی دونمبری دی کہانی ہووے گئی۔ ایہہ گل وے اے پئی اُردو دی کہانی مُک گئی اے۔ گھٹو گھٹ سُلیکھ وچ۔ بھاویں اک جہان جاندا اے عبداﷲ حُسین تے انتظار حُسین نوں پر ایہناں میلیاں وچ ایہناں دی کوئی تھاں نہیں۔ اُردو جو ساڈیاں بولیاں نال کیتا اوہو ہن اوس نال انگریزی کردی پئی اے۔ ایس نویں بولی دی سیاست وچ اُردو دی کوئی تھاں نہیں اُردو دا جنازہ نکل گیا اے پر اساں پڑھیا نہیں۔
ایہہ انگریزی پڑھن آلا پڑھیار ہن ہو گیا اے آ گیا اے۔ مینوں لگدا اے ایس ساری بدلی وچ ساڈا کم سوکھا ہو گیا اے۔ اُردو دے مُکن نال ہن ساڈی تھاں نکل آئی اے ساڈی بولی آ سکدی اے۔ اُردو نال ایہہ ہونا سی جیہناں اُردو پڑھی سکھی اوہناں دے بال ای انگریزی پڑھدے پئے نیں۔ اُردو نال کسے دا جذباتی رشتہ نہیں سی ایس لئی ایس دے مرن دا کسے نوں دُکھ وی نہیں اے۔ لہور سُلکیھ میلے ایہہ تاں کیتا۔ رہندی کہانی پھیر کراں گئے۔
(لکھاری نال میل کرن لئی ۔kitab.trinjan@gmail.com )



Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels