Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> اُچا کر کے جاواں گا میں جگ تے بول پنجابی دا

اُچا کر کے جاواں گا میں جگ تے بول پنجابی دا

بابا نجمی
February 25th, 2013
5 / 5 (1 Votes)


اکھراں وچ سمندر رکھاں میں اقبال پنجابی دا
جھکھڑاں دے وچ رکھ دتا اے دیوا بال پنجابی دا

جیہڑے آکھن وچ پنجابی وسعت نہیں تہذیب نہیں
پڑھ کے ویکھن وارث، بُلھا، باہو، لال پنجابی دا

دُھوڑاں نال کدے نہیں مرنا شیشے دے لشکارے نیں
جِنّی مرضی تِکھّی بولے اردو بال پنجابی دا

لوکی منگ منگا کے اپنا بوہل بنا کے بہہ گئے نیں
اَساں مِٹی کر دتا اے سونا گال پنجابی دا

نویں نسل دے ساڈیاں قبراں اُتے آ کے تھُکّن گے
جے نہ ساڈے کولوں ہویا چن اُچھال پنجابی دا

تن دا ماس کھوا دیندا اے جیہڑے ایہنوں پیار کرے
کوئی وی جبراً کر نہیں سکدا وِنگا وال پنجابی دا

تیری غفلت پاروی لگا جو جنگال پنجابی نوں
جیبھ دے نال رگڑ ہُن بہہ کے اوہ جنگال پنجابی دا

اُچا کر کے جاواں گا میں جگ تے بول پنجابی دا
گھر گھر وجدا لوک سُنن گے اک دن ڈھول پنجابی دا 

اِک اِک مصرعے وچ ہزاراں رمزاں لُکیاں ہوئیاں نیں
کوئی وی مصرعہ بابا نجمیؔ پھڑ کے کھول پنجابی دا
                               ٭٭٭
ساڈا حق نہیں دیندے جیہڑے ایسی تیسی اوہناں دی
ہون نہیں دیندے کُھلّے ویڑھے ایسی تیسی اوہناں دی

اِس دھرتی دی بولی جیہناں وچ نصابوں کڈھی اے
جیہناں پُٹھے کھوہ نیں گیڑے ایسی تیسی اوہناں دی

ناں تے میرا وی اے رانجھا پر میں ونجھلی والانہیں
ڈُھکن تے سہی بابا کھیڑے ایسی تیسی اوہناں دی 
                       ٭٭٭




Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels