Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> کسے نے اج تک پنجابی دا مطالبہ ای نہیں کیتا۔ گجرات مطالبہ کیوں کرے گا ؟:گجرات وچ ماں بولی دیہاڑبیٹھک

کسے نے اج تک پنجابی دا مطالبہ ای نہیں کیتا۔ گجرات مطالبہ کیوں کرے گا ؟:گجرات وچ ماں بولی دیہاڑبیٹھک

وچار ڈیسک
February 24th, 2013
5 / 5 (1 Votes)

گجرات: شیکسپیئر نے کہیا سی کہ اوہ شخص کوئی زبان نہیں سکھ سکدا جیہنوں اپنی ماں بولی تے عبور حاصل نہیں ہوندا۔ایہناں خیالاں دا اظہارپروفیسرریاض احمد نے ورلڈپنجابی فورم تے روزن ادبی فورم دے ہیٹھ مادری زباناں دے عالمی دن دے موقع تے ہوون والی بیٹھک نوں اپنے خطاب وچ کہیا اوہناں نے کہیا کہ بھارت دے 27 صوبیاں وچ ہندی ، انگریزی تے مقامی زباناں اکٹھیاں پڑھائیاں جاندیاں نیں۔ پرائمری تک ماں بولی وچ تعلیم دتی جاندی ہے۔ ساڈا ورثہ شاہ حسین، وارث شاہ، میاں محمد بخش، بابا فرید دا ورثہ ہے۔ جیہڑا سچ بلھے شاہ دے کول ہے، جو حقیقت میاں محمد بخش کے کول ہے، تے جو روشنی دوسرے صوفی پنجابی شاعروں کول ہے اوہ ساڈے تک منتقل کیوں نہیں ہوندی۔ میراایمان ہے کہ جے میاں محمد بخش ، شاہ حسین تے وارث شاہ دا کلام انگریزی وچ ترجمہ کر کے یورپ بھیجیاجاوے تو اوتھوں دے لوگ شیکسپیئر اور ورڈز ورتھ نوں بھل جاؤن گے تے ایہناںپنجابی صوفیا دے کلام نوں ہی پڑھن گے۔ اوہناں نے کہیا کہ بھائی بندی دے رشتے ماں بولی دی وجہ توں ہوندے نیں۔ ایہہ ہن تک کیوں نافذ نہ ہوئی کیونجے ایس دی سانوں لوڑ ای نہیں سی۔ سانوں ایہدا شعور ہی نہیں سی۔ یاد رکھو اسیںپنجابی دی راکھی نہیں کرنی ، پنجابی نے ساڈی راکھی کرنی ہے۔ اینی دیر تک کوئی اہل فکر، دانشور دریافت یاں تخلیق نہیں کر سکداجد تک اوہ اپنی ماں بولی وچ سوچدانہیں ۔اسیں ایس بارے سوچدے ہی نہیں۔ کسے نے اج تک پنجابی دا مطالبہ ای نہیں کیتا۔ گجرات مطالبہ کیوں کرے گا ؟ ایہدی وڈی وجہ ایہہ ہے کہ دنیا دا سب توں گھٹ عمر چیف جسٹس محمد الیاس، سب توں بہتے نشان حیدر لیون والی ایہہدھرتی، اردو دے سب توں وڈے ناول نگار اسلم راہی ، دنیا وچ ایڈیٹر دی ڈاک وچ سب نالوں بہتے چھپن والے حکیم چراغ، ایہناں ساریاں دا سمبندھ گجرات نال سی۔ میں گارنٹی دیناں کہ جے پنجابی زبان دے نفاذ دی تحریک نوں عملی شکل دتی جاوے تے گجرات سب توں آگے ہوئے گا۔ ا یس سلسلے وچ شرط ایہہ ہے کہ دوجے شہروں نال رابطہ کاری کر کے تحریک شروع کیتی جاوے تے سپیکر پنجاب اسمبلی ساہمنے قرارداد رکھی جاوے کہ باقی دو صوبیاں وچ ماں بولی نافذ ہے تے پنجاب وچ کیوں نہیں۔ ایہہ فرض اودوں ای ادا ہو جاوے گا جد ہائی کورٹ وچ رٹ داخل کر دتی جاوے گی۔ کہ سانوںفیصلیاں دی کاپی پنجابی وچ دتی جاوے۔ پرائمری تک پنجابی نافذ کیتی جاوے۔ دُکھ صرف ایہہ ہے کہ اسیں صرف غزلاں سناندے آں۔ جے کوئی ایجنڈا بنا کے چلئے تے کوئی گل وی نکلے گی۔ اسیںپنجابی ہون تے شرمانے آں۔ جے ہمیں پنجابی وچ تعلیم ملے گی تو اسیں پنجابی کہلان وچ فخر محسوس کرون گے۔ پنجابی لئی تحریک چلاون لئی سڑکاں تے نکلنے، دھرنے دیون یاںنچن دی لوڑ نہیں، تسیں اخباراں راہیں اپنی گل کر سکدے او تے معاملہ عدالت وچ لے جاؤ۔ بیٹھک وچ اظہار خیال کردے ہوئے قلب حسین وڑائچ نے کہیا کہ ماں بولی روح دے نالبچے وچ اترتی ہے۔ ایہہ ماں کے دودھ توں بچے وچ منتقل ہوندی اے۔ تے خون وچ ملی ہوندی اے۔ دنیا وچ سب نالوں زیادہ زباناں سکھن والے لوگ ایسے خطے دے نیں۔ ایہہ ذہین لوگ نیں تے ایہناں وچ دوجیاں زباناںسکھ تے ایہناں دا اثر قبول کرن کی صلاحیت سب سے زیادہ ہوندی ہے۔ کیونکہ ایس خطے کے لوگوں وچ پورے ایشیا کا خون مکس ہو چکیا ہے۔ ایہہ سقراط دا خطہ ہے، ایہہ جنئیس لوگوں دا خطہ ہے۔ دوجی وجہ ایہہ ہے کہ پنجابی وچ ہر شے لئی پرفیکٹ اکھر موجود ہے۔ ایہہ پیغمبرانہ زبان وی ہے۔ بابا گورونانک، بابا فرید، میاں محمد بخش نے ایہہ زبان ورتی۔ ایس زبان وچ اینی خوبصورت تشبیہاںتے استعارے موجود نیں کہ جیہڑے کسے دوجی زبان وچ نہیں۔ قاضی قمرالاسلام نے اظہار خیال کردے ہوئے کہیا کہ پنجابی بولنا، سکھنا تے پڑھانا ساڈی شان ہونی چاہیدی اے۔ کوشش کرنی چاہیدی اے کہ اپنی ماں بولی نوں سکھن۔ ایس وچ جو 'چس' ہوندی ہے اوہ کسے ہور زبان وچ نہیں۔ ماں بولی نوں اوہی درجہ دینا چاہیدا اے جیہڑا حقیقی ماں دا ہوندا ہے۔ بعض لوگ ایہدے ہجیاں تے اعتراض کردے نیں۔ ایہہ ایہناں دی پنجابی زبان نال ناواقفیت دا نتیجہ ہے۔ ویسے وی ماں نوں برا نہیں کہنا چاہیدا۔لالا موسیٰ توں آئے راشد منصور راشدنے کہیا کہ ہُن تے ساڈی اردو وی گلابی ہو چکی ہے۔ گھروں وچ پنجابی دے فروغ لئی ضروری ہے کہ بچیاں نال پنجابی وچ گل کریے۔انکل سام نے بات نوں اگے ٹوردیاں ہویاں کہیا کہ ایہہ گلاںسندے اک عمر بیت گئی ہے کہ پنجابی نوں نافذ کیاتاجانا چاہیدا اے۔ ہُن ایس لئی عملی کوششاں وی کرنیاں چاہیددیاں نیں تے ایہناں بیٹھکاں توں نکل کر باہر سڑکاں تے تحریک چلانی چاہیدی اے۔ تعصباں توںپاک ہو کے اک آواز ہو کے کوشش کرنی چاہیدی اے۔ پنجابی زبان لئی افضل راز دی کوششاں صلاحن جوگ نیں۔ سانوں ایہناں دا ساتھ دینا چاہیدا اے۔ وزیر آباد توں تشریف لیائے مہمان شاعر شریف فیاض وزیرآبادی نے کہیا کہ ایہہ ہر شخص دا فرض ہے کہ اوہ اپنی ماں بولی لئی جدوجہد کرے۔ لوگ ذاتی مفاداں لئی دھرنا دیندے نیں۔ پر ماں بولی نوں تحفظ دین لئی کوئی دھرنا نہیں دیندا۔ پنجابی لوگ پنجابی ہو کے وی پنجابی ورتدے ہوئے پریشان کیوں ہوندے نیں۔ طارق سلامت نے افضل راز دی پنجابی زبان دی ترویج تے ترقی لئی کوششاں نوں بھرپور سراہندے ہوئے کہیا کہ پنجابی زبان لئی جدوجہد نوں ایس کمرے تک محدود نہ رکھن۔باہر نکل کے سڑکاں تے احتجاج کرو تے حکمراناں، صاحب اختیار لوکاں نوں مجبور کرن کہ پنجاب وچ پنجابی نافذ کرن۔ ڈاکٹرسید محمودالحسن نے کہیا کہ وچ تو اپنی ماں دی محبت وچ ایس محفل وچ آیا ں ۔ میری ماں امرتسر دی سی۔ ایسے لئی مینوں پنجابی نال محبت ہے۔ پنجابی لئی ایس توں ودھ کے کم ہونا چاہیدا اے۔ پروفیسر بشیر احمد نے خوبصورت حوالہ دیندے ہوئے کہیا کہ افضل راز اک دھاگے دی طرح ہے جیہنے دانشوراں تے اہل فکر نوں پرو کے خوبصورت مالا دی شکل دتی ہے جیہڑاکسے خوبصورت نازنین دے گلے دا سنگھار بندی ہے۔ کوئی وی زبان سکھن لئی سرمائے دی لوڑ ہوندی ہے۔ پر مادری زبان سکھن لئی کسی سرمائے دی لوڑ نہیں ہوندی۔ جس طرح بچہ اپنی ماں دا دودھ مفت پیندا ہے جیس وچ قدرت نے ساریاں طاقتاں دے جزو رکھے ہوندے نیں۔ تے وہ فطری طور پر ودھدا جاندا ہے۔ ایسے طرح بچہ مادری زبان مفت وچ ماں دی گود وچ سکھ لیندا اے۔ ایس نال مادری زبان سکھن داپراسیس چھیتی شروع ہوجاندا ہے۔ افضل راز ہنیریاں وچ اک چراغ وانگ ہے۔ مترسانجھ پنجاب دے چیئرمین افتخار وڑائچ کالروی دے گل کردیاںآکھیا کہ آج دی محفل سجا کے افضل راز نے اپنے پنجابی سپتر ہوون دا ثبوت دتا ہے۔ ایس محفل وچ پنجابی زبان نوں ترقی دیون لئی جیہڑیاں تجویزاں تے صلاحواں دتیاں گئیاں نیں۔ ایس نال حوصلہ ودھدا اے۔ ہن ایہہ سوچ جوان ہو رہی ہے کہ اپنا حق زبردستی وصول کیتا جاوے۔ جیہناں لوکاں نے اپنیاں لکھتاں نال پنجابی زبان نوں سہارا دتا۔ اسیں ایہناں لوکاں نوں ویکھ کے ہی میدان وچ آئے ہاں۔جتھوں تیک سندھ تے صوبہ خیبر وچ سندھی تے پشتو زبانوں دے نفاذ دا تعلق ہے۔ ایس مقصد لئی اوتھوں دے دانشوراں نے بڑی محنت کیتی۔ ساڈا ایہہ متفقہ فیصلہ ہے کہ اپنے مقصد دے حصول لئی باہر سڑکاں تے آنا ہی پوے گا۔ دھرنے دینے پین گے۔ احتجاج کرنا پوے گا۔ پنجابی نوں سیاست وچ گھیسٹنا پوے گا۔ باہر نکل کے نچنا پوے گا۔ لوڑ ایس گل دی ہے کہ ایس تحریک نوں سیاسی رنگ ڈھنگ وچ اگے ودھنا چاہیدا اے۔ چوہدری اسماعیل چیچی نے گل بات نوں اگے ودھاندے ہوئے کہیا کہ ایتھے بیٹھ کر گل کرنا کوئی گل نہیں۔ جے سندھ یا ںخیبر وچ مادری زبانیں چل سکدیاں نیں تے ایتھے کیوں نہیں۔ تحریک چلان یاں دھرن دیون دی وی کوئی لوڑ نہیں ۔ ایس مقصد لئی عدالت دا بوہا کھڑکاون دی لوڑہے۔ جاوید بزمی نے کہیا کہ ایس گجرات نوں اعزاز حاصل ہے کہ عزیز بھٹی جیسا شیر دل کوئی ہور نہیں ہوسکدا۔ ماں بولی نوں ماں دی گود توںقبر تیک عزت دتی جاوے۔وائس آف جلالپور جٹاں کے ایڈیٹر محمد اشفاق ایاز نے ماں بولی دے حوالے نال گل بات کردے ہوئے کہیا کہ ساڈے اہل فکر، ادیب ، دانشور تے با اختیار پنجابی زبان نوں ایس دا حقیقی درجہ نہ دیون وچ سب توں وڈے مجرم نیں۔ اوہناں نے سلطان باہو، بابا فرید، میاں محمد بخش دے کلام دا دوجی زباناں وچ ترجمہ کر کے ناں تے کمایا پر دوجی زباناں دے وڈے ادب نوں پنجابی وچ منتقل نہیں کیتا۔ پر ایس چیز کا فائدہ مشرقی پنجاب والیاں چکیا اے۔ اوہناں نے بابا گورونانک کی گرنتھ صاحب نوں مڈھ بنا کر پنجابی نوں امر کر دتا۔ محمد افضل راز نے اپنے افتتاحی خطاب وچ کہیا کہ ماں بولی دے دن دی شروعات پاکستان توں ہی ہوئی سی۔ جدوں قائد اعظم نے اردو نوں قومی زبان دا درجہ دتا تو بنگلہ دیش وچ احتجاج شروع ہویا۔ اک احتجاجی جلوس تے فائرنگ ہوئی، کجھ نوجوان ہلاک ہوئے ۔ تے ایسراں ماں بولی دی ایس تحریک وچ خون وی رل گیا۔ ایس ویلے پنجاب وچ نو کروڑ تو ودھ پنجابی بولن والے رہندے نیں۔ ایہہ ملکی آبادی دا 62 فیصد ہوون دے باوجود اپنی مادری زبان دی سرکاری سطح تے پذیرائی توں محروم نیں۔ اج جے کالجاں وچ پنجابی پڑھائی جاندی ہے تے اوہ صرف مجموعی نمبراں وچ وادھے لئی پڑھائی جاندی ہے۔ جے پنجابی تعلیم نوں روزی روٹی نال جوڑ دتا جاوے تے ایہدامستقبل وی بہتر ہو جاوے گا تے ایہنوں ترقی وی ملے گی۔ پہلے پنجابی صوفیاں دیاں کتاباں گھراں وچ پڑھیاں جاندیاں سن۔ ہُن ایہہ روایت ختم ہوندی جا رہی ہے۔ ایہدی وجہ ایہہ کہ سرکاری سطح پر پنجابی نوں بہت پچھے رکھیا جا رہیا ہے۔ پنجابیاں وچ اک صفت ایہہ ہے کہ ایہناں وچ سکھن ، لکھن پڑھن دی صلاحیت سب سے بہتی ہوندی ہے۔ اوہناں نے مزید کہیاکہ اردو نے پنجابی نوں نقصان نہیں پہنچایا۔ کیونجے ایہہ تے رابطہ دی زبان سی۔ پنجابی وچ کسے قسم دی کمی نہیں۔ ایہہ اکھاں نال بھر پور ہے۔ ساڈی اج دی بیٹھک پنجابی زبان دے نفاذ لئی کیتی جاون والی تحریک دا حصہ ہے۔ تحریکاں تے دھرنے ہمیشہ بیٹھکاں توں جنم لیندے نیں۔ جتھے اہل فکر تے دانشور مل بیٹھ کر لائحہ عمل طے کردے نیں۔ ساڈاپہلا مطالبہ ایہہ ہے کہ پنجابی نوں گھٹوگھٹپرائمری دی سطح تک لازمی قرار دتا جاوے۔ کیونجے بچے دا اپنی مادری زبان نوں سمجھن دا سلسلہ مُڈھلی عمر توں شروع ہو سکے۔شریف فیاض،خموش چیچیانوی تے ملک عبدالجلیل پارس نے پنجابی زبان نوں منظوم خراج عقیدت پیش کیتا۔بیٹھک میں محمد اسماعیل چیچی، خموش چچیانوی، محمد اقبال بالم، غلام عباس، چوہدری باسط شعیب، افتخار وڑائچ کالروی، عبدالجلیل پارس، شریف فیاض وزیر آبادی، پروفیسر بشیر احمد مرزا، سلمان سعید سلمان، محمد اشفاق ایاز، امتیاز احمد کدھر، مرزا سجاد بابا، سید رضی عباس، جمیل اختر سیال، قلب حسین وڑائچ، راشد منصور، قاضی قمر الاسلام، انکل سام، ڈاکٹر سید محمود الحسن،طارق سلامت،جاویدبزمی،قلب حسین وڑائچ،محمداشفاق ایاز،احمدبھٹی،بلال احمد،اقبال کھوکھر،اقبال بالم،ریاض احمد تے ہور سجناں نے بھرپور رلت کیتی۔







Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels