Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> ماں بولی دے جلوس لئی مشتاق صوفی ہوراں دی پریس کانفرس

ماں بولی دے جلوس لئی مشتاق صوفی ہوراں دی پریس کانفرس

(رپورٹ:زبیر احمد)
February 19th, 2013

 21 فروری نوں جگت ماں بولی دیہاڑ مناون لئی ماں بولی پیاریاں ولوں جلوس کڈھن دی تیاری اُدھم نال جاری اے۔ پاکستان پنجابی ادبی بورڈ دی چھتر چھاویں ایس جلوس دی اگوائی شاعر تے سُوجھوان مشتاق صوفی کرن گے۔ ایس پچھوکڑ وچ اج تن وجے لہور پریس کلب وچ اک پریس کانفرس کیتی گئی تاں جے میڈیا نوں ماں بولی دیاں منگاں توں جانو کیتا جاوے۔ مشتاق صوفی ہوراں اپنی بھرویں پریس کانفرس وچ پنجاب دی بولی دا پچھوکڑ دسیا تے سوالاں دے جواب دتے۔ اوہناں آکھیا پئی ہندوستان اِک لہر دے سٹے پاروں ازاد ہویا سی پر پاکستان چار اکائیاں دے رلن نال تے ایہناں وچ ہوئے ریفرنڈم پاروں بنیا سی۔ بنگالیاں، سندھیاں، پختوناں تے پنجابیاں نے وکھو وکھ چوناں تے ریفرنڈم وچ پاکستان دے حق وچ ووٹ دتے سن ۔ اج کِنے دُکھ دی گل ہے پئی ایہناں ساریاں اکائیاں دی رہتل تے بولی نوں نہیں منیا جا رہیا تے بدوبدی ساڈے اُتے اک بولی مڑی جارہی اے۔ اوہناں آکھیا پئی پنجابی ایس علاقے دی سبھ توں پُرانی بولی ہے ایس دی اک ہزار ورھے پرانی وار ہے تے ایس وچ بابا فرید، نانک، شاہ حُسین، بُلھے شاہ، وارث شاہ ورگے انمول شاعراں دی لڑی اے۔ انگریزاں دے آون توں پہلاں ساڈی بولی پڑھائی لکھائی دا حصہ سی تے پنجاب صوبہ سبھ توں پڑھیا لکھیا سی تے ایس وچ زنانیاں وی سن۔ کچی روٹی، پکی روٹی ورگا نصاب وی سی تے پنجابی لکھائی پڑھائی دی بولی سی۔ ایس گل دی گواہی لٹنر دی کتاب دیندی اے۔
اوہناں آکھیا ساریاں بولیاں معتبر نیں پر اک بولی اک جہان ہوندی اے اک تکنی ہوندی اے، جگ نوں ویکھن دا اک رنگ ہوندی اے، اک ڈھنگ ہوندی اے جد تُسی ایہہ بولی مُکاؤندے اوہ تاں اوہ جگ تکنی مُکا دیندے او۔ اوہناں پنجاب دے حاکماں دی نندیا کردیاں آکھیا نری مادی ترقی کجھ نہیں ہوندی جے تُسی اوس نال روحانی تے فکری ترقی نہیں رلاندے تے ایہہ ماں بولی ای تہانوں دے سکدی اے۔ اخیر وچ اوہناں منگ کیتی پئی پنجاب اندر گھٹو گھٹ پرائمری تیک ماں بولی لاگو کیتی جاوے تاں پنجاب اندروں ان پڑھتا مُکائی جاسکے۔ اوہناں آکھیا پنجابی مہاتڑ لوکاں دی بولی اے اسیں مہاتڑ آں ساڈے کول بہتے وسیلے نہیں پر اسیں 21 فروری نوں پریس کلب لہور توں اسمبلی ہال تیک احتجاجی جلوس کڈھاں گئے۔ اوہناں ساریاں نوں بھرویں رلت دا سدا دتا۔
ایس پریس کانفرس وچ لکھاریاں بھرویں رلت کیتی جیہناں وچ مظہر ترمذی، پروین ملک، اقبال قیصر، بابا نجمی، سرفراز احمد صفی، افضل ساحر، عباد نبیل شاد، ناصر رانا ، یوسف پنجابی، نصیر احمد ، امجد سلیم منہاس تے ہور سجن وی شامل سن۔




Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels