Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> پنجابی نوں رہن دیو۔۔۔۔۔۔

پنجابی نوں رہن دیو۔۔۔۔۔۔

May 7th, 2012
5 / 5 (6 Votes)

پنجابی نوں رہن دیو۔۔۔۔۔۔

مظہر ترمذی

پنجابی بولی دی حالت وی غریب لوکائی ورگی اے۔ ایتھے ہر شے سٹیٹس دے نال جڑی اے۔ گل بات ،رہن سہن، کھاون پیون،شادی، مرن، جس بولی دا کوئی سٹیٹس نہ ہوئے اوہنوں بھلا کون پُچھدا اے۔ پنجابی، پنجابی نال اُردو بولدا اے تے اوہنوں شرم دی بجائے فخر دی گل لگدی اے، جے اوہنوں انگریزی بولنی آندی ہووئے تے اوہ اردو تے وی لعنت بھیجدا اے۔انگریزی لینگوج آف پاورتے اردو لینگوج ان پاور اے۔ایہہ گھٹ گنتی والی بولی دا بوہتی گنتی والی بولی تے راج اے۔ایہہ راج پنجابی حاکم ٹولے نے آپ قبولیا اے،تاں جے اوہ پورے پاکستان تے راج کر سکن۔

 

حالت ایہہ ہے کہ سندھی صدر پنجاب وچ آ کے پنجابی وچ مشکری کردا اے تے پنجابی حاکم ٹولااردو وچ جواب دیندا اے۔جے میں اجوکی پنجابی لوکائی دی تصویر چھکاں تے انج اے کہ پنجابی کھاندے پیندے گھراں دی بُتی وگار کردی اے، گھراں تے مارکیٹاں دے باہر کچرا پھرولدی اے، سستا سُرخی پاؤڈر لا کے سڑکاں تے منگدی اے، بولدی اے تے ایہدی گل کسے نوں سمجھ نہیں آؤندی۔ نہ ایہہ سکول جاندی اے، نہ اہنوں نوکری ملدی اے، نہ ایہہ چنگا کھا پہن سکدی اے۔ ایہدے وارثاں اہنوں گھروں کڈ چھڈیا اے تے جہیڑے ایہدے سکے نیں اوہ وی اہنوںگھر تاڑ کے رکھنا چاہندے نیں، پئی متاں ایہہ گھروں نہ نس جائے۔ ایہنوں سرکاری تے کار ویہار دی بولی بنان دے خلاف نیں۔ ایہہ انج ہی ایہدا گل گھٹدے پئے  نیں جیس طرحاں  نویں  ٹی وی چینلاں تے ایہنوں اردو دا پاجامہ پوا کے سِر تے جناح کیپ رکھوا کے مسلمان پنجابی بنایا جا رہیا اے۔

کیہ سانوں واقعی پنجابی دی لوڑ نہیں رہی؟بولی دی لوڑ تاں تد ہوندی اے جدوں اہنوں ورتیاں بنا گذارہ نہ ہووے نالے اوہدی کو ئی عزت آبرو تے سٹیٹس ہو وے۔ سٹیٹس تاں سرکار دیندی اے ساڈیاں سرکاراں اتے سجی کھبی سیاسی جماتاں قومیتاں دے سوال توں کنی کتراندیاں نیں ، جے اوہ سبھ بولیاں نوں قومی بولیاں من لین تے آئیڈیالوجی آف پاکستان دے بھکانے چوں پُھوک نکل جاندی اے۔شفقت تنویر مرزا ہوریں ساڈے اجیہے پنجابی سوجھوان ہن جو ساری حیاتی ایس سوال دیاں گنڈھاں کھولدے رہے اوہ اجکل بمار نیں، اسیں اوہناں نوں ملن گئے تے اوہ اپنی بماری نو ں بُھل کے پنجابیاں نوں لگی بماری بارے گلاں کردے رہے۔


ڈیرے دار پنجابی اشرافیہ پنجابی نوں سرکاری بولی نہیں بنن دینا چاہندی تے ایس لئی دلیل بولی نوں رلے توں بچاون دی اے۔جے ایہہ دلیل من وی لیئے تے فیر وی پنجابی نوں کسے نہ کسے شکل وچ سرکاری بولی بناؤناں اہنوں اُکا ای مارن توں تاں چنگا اے ،نالے تکڑے پچھوکڑ آلی بولی ہر حالت وچ اپنی اصلی شکل کڈ ای لیندی اے۔ایہدی مثال یورپ دیاں کئی بولیاں نیں جو مُڑ کے جیندیاں ہو رہیاں نیں۔

اسیں کنے مُورکھ آں جو بولی دا ویہڑا کُھلا کرن دی بجائے اوہنوں ہور سوڑا کردے پئے آں ، اگے ای پنجابیت تے پنجابی شناخت دا مطلب جٹ، آرائیں ذات برادری تے علاقہ بن گیا اے۔ جے اسیں پنجابی نوں اک ماڈرن بولی بناؤناں چاہندے آں تے سانوں ایہہ 'گُرو کلچر' وی مکاؤنا پئے گا۔ پنجابی دے اورنگزیب بنن دی بجائے رنجیت سنگھ ورگے کھلے دماغ دی لوڑ اے جس آکھیا سی پنجابی ماواں نوں پڑھا دیو تے اگلیاں پیڑھیاں آپوں  ای پنجابی بن جان  گیاں۔


میرے نال لاہور دے اک پنجابی ایکٹوسٹ نے ہرکھ کیتا کہ لاہور دے وڈھے سوجھوان جیہڑی بولی لکھدے پئے نیں اوہ بناؤٹی اے،  اگاں ودھن دے لائق نہیں عام بندے تے سٹریٹ لینگوج توںکوہاں دور اے، انگریزی ہار ڈراندی اے تے پہلوں ای اپنی بولی توں پچھڑے ہوئے لوکاں لئی رسونت ورگی اے۔ ایس ایکٹوسٹ دا خیال سی  جو  ایہو  جہیی بولی لکھن والے چڑھدے پنجاب دے سنسکرت مارکہ پنجابی پروفیسراں ورگے نیں تے بولی دی شُدھی کرنا چاہندے نیں۔ اوس پنجاب وچ تاں اوہناں دا ایجنڈا پنجابی وچ سنسکرت واڑ کے مین سٹریم لینیگوج پولیٹکس کرنا اے۔ ساڈے ول گدی نشینی تے ہٹی چمکانا اے۔
 
میں ایس جھلّے ایکٹوسٹ دی ساری گل بات نال سہمت نہیں  سی پر مینوں ایہہ دلیل ٹھیک لگدی اے  بئی پنجابی نوں اوکھا  نہیں  سوکھا بناؤنا چاہیدا اے جیکن ساریاں ماڈرن بولیاں انگریزی سمیت عام بندے دے نیڑے آ رہیاں نیں ۔ لکھن پڑھن تے بولن دی زبان وچ پاڑ گھٹدا پیا اے، مقصد بولی نوں فنگشنل رکھنا اے نہ کے اوہنوں اوکھا کر کے عام بندے نوں ایس توں ایلیانیٹ  (وکھرا) کرنا ۔

مظہر ترمذی
ؒلہور
٣۔مئی۔ ٢٠١٢

 


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels