Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> امرت ویلے پھُرنا

امرت ویلے پھُرنا

April 7th, 2011

کل میں اک نوجوان کڑی نوں ملیا۔ جدوں اوہنے مینوں ہیلو آکھیا تاں میں اک واری تاں آلے دوآلے دیکھیا اس لئی نہیں کہ اوہنے مینوں ہیلو کہیا سی سگوں اس لئی کہ میں دیکھاں کہ میں امریکہ دی کینسس سٹیٹ وچ ہاں جاں کہ کشن پور وچ۔اوہ کڑی بالکل امریکن مڈ ویسٹ ایکسنٹ وچ بول رہی سی۔ اوہنے مینوں دسیا کہ اوہدا جم پل پنا مہاراشٹر دا ہے اتے اوہنوں مراٹھی بہت گھٹ آؤندی ہے۔اوہدا ٹبر اک عام نوکری پیشہ ٹبر ہے اتے اوہدیاں پنج بھیڻاں ہیڻ اتے اوہ ساریاں ہی آئی ٹی وچ ملازم ہیڻ۔ اوہنوں اس گل دا ماڻ وی سی کہ اوہنوں مراٹھی نہیں آؤندی اتے اوہ امریکن ایکسنٹ نال انگریزی بڑی ودھیا بولدی ہے۔ ایہہ بدلدے حالات دی اک نشانی ہے۔

ہندوستان وچ وچلا میل جاں مدھ شریڻی اجکل امریکن ایکسنٹ نال انگریزی بولڻا اک سماج وچ رتبے دی نشانی سمجھدا ہے۔ پہلاں برٹش لہجے نال انگریزی بولڻا خاندانی ہوڻ دی نشانی سمجھی جاندی سی۔حاکم میل آپڻے نیاڻیاں نوں پبلک سکولاں اتے فیر ہیرو اتے آکسفورڈ تعلیم اتے تربیت لئی بھیجدے سڻ۔پر امریکن کمپنیاں نے بڑی مہارت نال ایہہ کم مدھ شریڻی دی جھولی قصبے اتے شہراں وچ بیٹھے بٹھائے ہی پا دتا ہے۔کال سینٹراں اتے ایکسنٹ نیوٹرلائیزینگ ٹریننگ سینٹراں وچ موہالی اتے گڑگاؤں وچ ہی ایہہ کم آسانی نال ہو جاندا ہے۔ہڻ برٹش لہجے وچ انگرزی بولڻا موڈرنٹی دی نشانی نہیں۔ ہڻ تاں ینکی لہجے نال ہی تسیں ماڈرن بڻدے ہو۔

پہلاں جنی ودھیا انگریزی برٹش لہجے نال بولدے اتے آپڻی ماں بولی نوں جنی چھیتی چھڈدے جاں اس توں منکر ہوندے تاں اوناں بہتا کلچر دا معیار منیا جاندا سی پر ایہہ حاکم میل تک ہی محدود سی۔ وچلے میل دے گڻے چڻے بندے اس خاص کلب وچ وڑ سکدے سی۔مثال دے طور تے فوج دے افسر،کرکٹ کھڈاری بہتا حاکم اتے اُتلے میل چوں ہوندے سڻ جیہناں نوں اس گل تے فخر ہوندا سی کہ اوہ ماں بولی نہیں پسند کردے اتے برٹش انگریزی فر فر بولدے ہیڻ۔ پر ینکی مستعدی نے ایہہ گرج مدھ شریڻی دے حوالے کر دتی ہے۔ہڻ مدھ شریڻی وی اس ماڈرن سفنے دا حصہ بڻ سکدی ہے لوڑ صرف امریکن لہجے نال انگریزی بولڻ دی ہے۔ صرف اس قابلیت نال تسیں ماڈرن اتے ویلے نال سرمیل ہو سکدے ہو۔

ماں بولی، ورثہ، ریت اتے اتہاس اس ماڈرنٹی لئی اک رکاوٹ سمجھے جاندے ہیڻ اتے جنی چھیتی ایہنوں چھڈیا جاوے اوسے وچ ہی تہاڈا بھلا دسیا جاندا ہے۔ ایہہ گر منتر ہر روز نوجواناں نوں پڑھایا جاندا ہے جو کہ لکھاں دی گڻتی وچ روزگار دی بھال وچ ایہناں قصبیاں اتے شہراں وچ متھا کھپائی کر رہے ہیڻ اتے اس ماڈرن امریکن سفنے دی بھال وچ ہیڻ۔اس امریکن ماڈرنٹی دا نواں پروہت ہڻ ٹیلیوژن اتے الیکٹرونک میڈیا ہے جو کہ گورے ہوڻ دیاں کریماں دے اشتہاراں نال اس سورگ دے سفنے نوں ہور وی من کھچواں بڻا رہیا ہے۔امریکن انگریزی بولو، گورے ہوڻ دی کریم لاؤ تے سورگ دا جھوٹا لؤ۔ تہانوں آکسفورڈ جاں لندن جاڻ دی لوڑ نہیں۔گھر بیٹھے ہی تسیں تہذیب والے اتے تعلیم والے بڻ سکدے ہو۔

اس وچکار ہی ایہہ سفنیاں امریکہ وچ کروڑاں ہی لوکاں لئی اک خوفناک حقیقت بڻ چکیا ہے جس وچ بے روزگاری،گھراں دی قرقی، قرضے، جسمانی اتے روحانی تھکیواں لوکاں نوں ہر روز ڈس رہے ہیڻ۔ وسکانسن، اوہائیؤ اتے ہورناں تھاواں تے لوک آپڻے ایہناں ٹٹیاں ہوئے سفنیاں بارے وچار وٹاندرا کر رہے ہیڻ اتے آپڻے مسئلیاں دے حل لئی اُدم کر رہے ہیڻ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels