Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> میری چنتا پنجابی زبان گھٹ تے پنجابی لوک بہتے نیں

میری چنتا پنجابی زبان گھٹ تے پنجابی لوک بہتے نیں

February 22nd, 2011

امریکہ دی ریاست ڈیلاویر توں نسیم حسن ہوراں لکھیا ہے جو پنجابی زبان نے نہیں مرنا کیوں جو ایہہ گروگرنتھ صاحب دی زبان ہے تے چڑھدے پنجاب وچ پنجابی سدا جیوت رہوے گی۔ شاید ایہہ گل ٹھیک ہی ہووے پر نسیم ہوراں نوں شاید ایس گل دا پتہ نہیں جو اجکل کھاندے پیندے سکھ وی پنجابی دی تھاں ہندی پڑھدے نیں۔ پر چلو اسیں نسیم ہوراں دی گل من لینے آ۔

مینوں فکر پنجابی زبان دا نہیں میری چنتا پنجابیاں بارے ہے۔پہلی گل تے ایہہ ہے جو ایڈیاں وڈیاں زباناں مکدیاں نہیں تے جے مک وی جاڻ تے تاں کیہڑی وڈھی قیامت ہے۔ میری پریشانی ایہہ ہے جو پنجابی نوں مار کے پنجابی آپ ہی مر جاڻ گے۔ اوہ تھرڈ کلاس قسم دی پچھونہی قوم ہی رہ جاڻ گے ۔

میں بار بار ایہہ کہنا تے سوجھواناں نوں چیلنج کرنا جو اوہ ایہہ دسڻ جو کسے قوم نے بنا ماں بولی وچ مڈھلی تعلیم دیڻ دے ترقی کیتی ہووے؟ کوئی اک ملک؟ چین جاپان کوریا نے انگریزی نہیں سکھی تے سگوں آپڻیاں ماں بولیاں وچ ہی تعلیم دتی۔ اج اوہ اگے نیں یا پچھے؟ تے اسیں جیہڑے انگریزی تے اردو نال اپنے آپ نوں مہذب بناؤڻ وچ دن رات لگے ہوئے آں ، اسیں کتھے آں؟

جد انگریز پنجاب وچ آئے تے اوس ویلے وی انگریز افسراں وچ ایس گل تے بڑی بحث ہوئی سی جو پنجاب وچ پنجابی یا اردو لائی جاوے۔ اوس ویلے بہتے افسر اردو دے حق وچ سڻ کیوں جو اوہ سارے یوپی توں آئے سڻ،  اوہناں نوں اردو آوندی سی تے پنجابی سکھڻ دی مشقت نہیں کرنا چاہوندے سڻ۔

پر اوہناں وچوں میجر ولسن شاہپور (اجوکا سرگودھا) دا ڈپٹی کمشنر پنجابی دے حق وچ سی۔ اوس دلیل دیندیاں لکھیا سی جو برطانیہ وچ جد سرکاری زبان لاطینی سی تے کوئی ورلا وانجھا ہی پڑھیا بندہ ہوندا سی۔ پھیر جد فرانسیسی لائی گئی تے پڑھن والیاں دی گڻتی کجھ ودھ گئی کیوں جو فرانسیسی انگریزی دے لاگے سی۔ پر انگریزاں وچ عام تعلیم اودوں ہی ہوئی جدوں انگریزی نوں ہر پدھر تے ورتیا گیا۔ ایس لئی اوس دا کہڻا سی پڑھائی دی شرح (لٹریسی ریٹ) ماں بولی ورتے بنا ودھ ہی نہیں سکدا۔

اوس دی پیش گوئی اج وی سچی ہے۔ اجے تیکر پڑھائی لکھائی عام نہیں ہوئی۔ جیہڑی پڑھائی ہوندی وی ہے اوہ وی بہت کچی تے جھوٹی ہوندی ہے۔ پڑھیار کجھ سکھڻ دی تھاں اردو تے انگریزی سمجھن وچ ہی گواچ جاندے نیں۔ ایس لئی اوہناں دی پڑھائی وی تھوتھی ہوندی ہے۔

ہڻ تیکر جنی وی کاہڈ ہوئی ہے اوہ ایہو دسدی ہے جو نیاڻا آپڻی ماں بولی وچ ہی سب توں بہتا سکھدا ہے۔ ایہہ ہی نہیں سگوں جیہڑا نیاڻا آپڻی ماں بولی دا پورا جاڻو ہوندا ہے اوس نوں دوجیاں زباناں وی سوکھیاں آ جاندیاں ہیڻ۔ایس لئی میری چنتا ایہہ ہے جو پنجابیاں نوں آپڻی زبان چھڈڻ نال دوجیاں زباناں وی نہیں آؤڻیاں۔

مینوں زبان نالوں ودھ فکر لوکاں دا ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels