Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> ماں بولی بنا پنجابیاں رُل جاڻا

ماں بولی بنا پنجابیاں رُل جاڻا

February 22nd, 2011

  پنجابی ماں بولی دا مڈھلا سوما وادی سندھ دی رہتل ہے۔ ظاہر گل ہے جو ایتھے دیاں وسنیکاں تے باہروں آؤڻ والیاں سنسکرت، فارسی تے عربی نے وی وادی سندھ دیاں زباناں بناؤڻ وچ ہتھ پایا۔ جے تسیں پنجابی، سندھی، گجراتی تے ہندی دی لفظالی دی سانجھ ویکھو تے تہانوں پتہ لگ جاندا ہے جو ایہناں سب دا سوما اک ہی ہے ۔۔ سندھ وادی۔

اج اسیں جیس نوں پنجابی زبان کہنےآں اوسدے مڈھلے شاعر بابا فرید سڻ جیہناں دا وارا بارھویں صدی دا ہے۔ پندرھویں تے سولہویں صدی دے گرو نانک تے شاہ حسین دی زبان نوں پڑھ کے لگدا ہے جو اوس ویلے تیکر پنجابی زبان ہر طرحاں مکمل ہو چکی سی۔ ایہہ اوہ زمانہ سی جدوں اردو زبان دا مڈھ وی نہیں بجھیا سی۔ پر مغلاں نے فارسی توں وکھ کوئی زبان منی ہی نہ۔ پر جدوں انگریز آئے تے اوہناں نے ہر علاقے دی زبان نوں ترقی دتی۔ اک نہیں دتی تے پنجابی نوں۔ ایس دے کئی کارن سن جیہناں دا ایتھے ذکر دا مقام نہیں۔ پر انگریزاں جو دھرو کیتا اوہ اردو نوں پنجاب دے سر تے تھپ کے کیتا۔ چنگی بھلی زبان والے پنجابی گونگے ہو گئے تے اردو دی ہر تھاں تے چڑھت ہو گئی۔

اج اسیں جنی مرضی حال دہائی پائیئے پر حقیقت ایہہ ہے جو پنجابی اک نکرے لگی سُنگڑدی جا رہی ہے تے انگریزی اردو پردھان بڻ کے راج کردیاں پھردیاں نیں۔ پر اسیں اک گل کہہ سکنے ہاں جو پاکستان دا اج جو حال برباد ہے اوسدا تعلق ماں بولیاں توں وانجیاں ہوڻا وی ہے تے جد تیکر ماں بولیاں موڑ کے کار ویہار وچ نہ آئیاں پاکستان دا ایہو مندا حال رہڻا ہے۔ ایس لئی ساڈی دلیل ایہہ ہے:

اجے تیکر ساری دنیا وچ کسے ملک نے اوناں چر تیکر صنعتی ترقی نہیں کیتی جد تیکر مڈھلی پڑھائی ماں بولی وچ نہ ہووے۔ ایہہ بھاویں اٹھارویں صدی دا یورپ ہووے تے بھاویں ویہویں صدی دا چین تے جاپان۔ وجہ اوہدی ایہہ ہے جو لوکائی دی پڑھائی ماں بولی توں باہر ہو ہی نہیں سکدی تے مڈھلی سکھلائی وی۔ تسیں آپڻے کارخانیاں تے گیراجاں دے مستریاں نوں ویکھو اوہ کیہڑی زبان وچ سکھدے نیں؟ ماں بولی وچ۔

پاکستان دی وچار دھارا وچوں ات واد وی اوس ویلے تیکر نہیں نکلڻا جد تیکر ماں بولی نہ پڑھائی گئی۔ جے سلطان باہو، وارث شاہ تے بلھے شاہ نوں نہ پڑھایا جاوے تے عام بندہ ملاں دیاں کرتوتاں بارے کتھے پڑھے گا؟

پاکستان وچ اچی پدھر دے لکھاری تےآرٹسٹ وی نہیں جمڻے جد تیکر ماں بولی وچ نہ پڑھایا گیا۔
ایہناں ساریاں گلاں نوں مکھ رکھدیاں اج ماں بولیاں دے جگت دن تے پنجابیاں فیصلہ کرنا ہے جو اوہ رُل جاڻا چاہوندے نیں یا اگے ودھڻا چاہوندے نیں!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels