Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> اردو مُک کیوں نہیں جاندی؟

اردو مُک کیوں نہیں جاندی؟

انورسِن رائے
February 10th, 2011
5 / 5 (1 Votes)

کراچی لٹریچر فیسٹیول دو دن جاری رہ کے مک گیا۔ ایس فیسٹیول دی اک بیٹھک دا موضوع ایہہ سوال سی جو ' کیہ اردو پڑھن والے گھٹدے جا رہے نیں'۔

بیٹھک شروع ہوڻ توں پہلوں ہی 'جنے منہ اونیاں گلاں ' والا حال ہو گیا سی۔ ایس بیٹھک دے بلاریاں وچ ڈاکٹر نعمان الحق، افتخار عارف تے زاہدہ حنا رلتی سڻ جدوں کہ بیٹھک دی ماڈریٹر عارفہ سید زہرہ سڻ۔

مینوں ایہہ تے پتہ نہیں جو بلاریاں دا چوڻ کس مڈھ تے کیتا گیا پر افتخار عارف دا چوڻ کجھ ایس لئی چنگا لگدا ہے پئی اوہ شاعر تے سوجھوان ہوڻ توں اڈ ساری حیاتی ہی انج دے اداریاں نال جڑے رہے نیں جیہڑے کسے نہ کسے طرحاں اردو دی ترقی دا کم کردے رہے نیں تے ہڻ وی اوہناں دے موڈھیاں تے نیشنل لینگویج اتھارٹی یاں مقتدرہ قومی بولی دے پربندھ دا بھار ہے۔

ہور رلتیاں وچ زاہد حنا خورے ایس لئی ٹھیک سمجھیاں گئیاں ہوڻ گیاں پئی جدوں توں میں سُرت سنبھالی ہے اوہناں نوں اردو اردو ہی کردیاں ویکھیا ہے۔ اوہ اردو دے ڈائجسٹ دی مدیرہ ہے جیہدی بولی تے بیان تے کوئی انگلی نہیں چک سکدا سگوں اوہ اردو دی اک وڈی افسانہ کار تے کالم کار وی نیں۔

اوہناں توں اڈ ڈاکٹر نعمان الحق تے عارفہ سید زہرہ لہور وچ مینجمنٹ سائنسز دے اک انج دے ادارے وچ اردو دی پڑھائی نال جڑے نیں جیہنوں پاکستان دے وڈے اداریاں وچ گڻیا جاندا ہے۔

افتخار عارف، زاہدہ حنا تے دوہاں استاداں دا ایس گل تے کوئی پاڑ نہیں سی جو اردو پڑھن والے گھٹدے جا رہے نیں تے ایہدے لئی اوہناں نے پاکستان وچ اخباراں رسالیاں تے ٹی وی چینلاں دی بھر مار دے ذکر دے نال نال اُچیچا اک ٹی وی چینل دا ناں لیا جیہنے حالیں اپنی نشریات انگریزی توں اردو وچ کیتی ہے۔

ایہدے مگروں وی سینتاں وچ ایہہ گل کہی گئی پئی بولی تے رہتل دے آسرے جیوندی رہندی ہے جدوں بولی دے سر تے ہتھ دھرن والی رہتل مرن لگدی ہے تے بولی وی مرن تے سمٹن لگدی ہے۔ ایہدے لئی یونانی تے عربی دا حوالہ دتا گیا۔

چاراں رلتیاں دا ایس گل تے وی ایکا سی جو بولی دا معیار دنو دن ڈگدا جا رہیا ہے۔ ایہناں گلاں تے فکراں وچ ایہہ بیٹھک مک گئی۔ دوجے لوکاں دے نال جدوں میں ' مہاراجہ ' ہال توں باہر نکل رہیا سی تے مینوں آپڻے پچھوں ایہہ جملہ سڻیا ' ایہہ اردو تے اردو بولن والے مک کیوں نہیں جاندے؟ '

میں مڑ کے ویکھیا تے اک جوان آپڻے سنگی نال گل کر رہیا سی۔

میں پچھیا : ' کیہ مطلب؟'

جوان نے کہیا ' ہاں جی۔ ہڻ ویکھو ناں،ایہہ اینے لوک ایتھے اکٹھے نیں ایہناں وچ کنے لوکاں دا اردو نال لیڻا دیڻا ہے۔ ایہہ انگریزی دے لوک نیں تے اوہناں وچوں جیہناں دی ماں بولی اردو وی ہووے گی اوہناں وی کوشش کیتی ہووے گی پئی اوہناں دے بال جے اردو بولڻ وی تے انگریزی وچ ہی بولڻ کیوں جو جناب سارا کچھ تے انگریزی بولڻ نال ہی ملدا ہے ہڻ جے ساڈے ورگے جیہناں دے ماپے انگریزی نہیں پڑھا سکدے جیہڑے انگریزی بولڻ والیاں دا بھار چکدے نیں مک جاڻ تے سارے انگریزی بولڻ والے ہی رہ جاڻ کیوں جو ایہہ تے ہو نہیں سکدا جو سارے اردو والے ہو جاڻ تے فیر پتہ لگے پئی خوبی کیہ ہوندی ہے۔ عارفہ سید نے ٹھیک کہیا جو اردو ساڈی بد نصیب وراثت ہے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels