Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> خیبر پختون خواہ وچ ماں بولیاں لاگو ہوسن

خیبر پختون خواہ وچ ماں بولیاں لاگو ہوسن

October 18th, 2010
5 / 5 (1 Votes)

خیبر پختون خواہ وچ ماں بولی لاون دیاں تیاریاں سخر اُتے نیں جتھے کابینہ دی کمیٹی نے صوبے وچ سبھے ماں بولی پڑھان دے اک فارمولے دی منظوری دے دتی اے۔

پشتو دے نالونال ہندکو، سرائیکی، کھوار تے کوہستانی نُوں اسمبلی وچ قنون راہیں صوبے دیاں لازمی بولیاں قرار دتیاں جاون گیاں تے ایہناں بولیاں نُوں نجی تے سرکاری سکولاں وچ سر پر پڑھایا جاوے گا جتھے جتھے ایہناں بولیاں دی بوہتی گنتری ہے۔

کمیٹی نے منظوری دتی اے پئی پشتو نُوں صوبے دیاں 17 ضلعیاں وچ پڑھایا جاوے جد کہ ڈیرہ اسماعیل خان وچ سرائیکی، چترال وچ کھوار، کوہستان وچ کوہستانی، تے ہزارہ وچ ہندکو تے پشاور وچ ہندکو تے پشتو۔

خیبر پختون خواہ صوبے دی سرکار دے ایس حکم دی جنی سلاہنا کیتی جاوے گھٹ اے۔ پہلی واری پہلے صوبے وچ لوکاں نُوں بولی دے مُڈھ اُتے ونڈن دی تھاں جوڑ دتا گیا اے۔ ساڈے دیس وچ لوکاں دیاں بولیاں نُوں کدی منیا نہیں گیا کئی جمہوری سرکاراں آئیاں تے لنگھ گئیاں پر لوکاں دی بولی دی گل کسے نہ گھولی۔ لوکاں اُتے نرے 7% لوکاں دی بولی اُردو نوں لاگو کر دتا گیا تے ایس نُوں ای لوکاں دی ماں بولی بنن دا چارا کیتا گیا ایہہ تاں اگوں بھاگ لوکاں دے تے اوہناں دیاں امیر بولیاں دے پئی ایہہ لشکری بولی ساڈی بولی نہ بن سکی۔

جے سجناں نُوں بھیڑا نہ جاپے تے ایہہ آکھیا جا سکدا اے پئی ایس اوپری بولی نیں جو ساڈے اُتے 'قومی بولی' دے ناں اُتے مَلی گئی اے اوس سانوں ونڈیا اے جوڑیا نہیں جے اسیں اک دوجے نال پشتو، سندھی وچ گل کردے تے ایہہ بولیاں سانوں پڑھایاں جاندیاں پئی اسیں آپنی بولی دے نال اک ہور دوجے صوبے دی بولی وی سکھ لیندے تے ستے خیراں ہونیاں سن۔ پنجابی /سرائیکی یاں کسے ہور صوبے دی بولی اوس وچوں تخت شاہی یاں راج شاہی دا ڈنگ کڈھ دیندی اے تے ساڈی بولی ہے ای بابیاں دا کلام جو فقیری دی گل بوہتی کردا اے۔

اک ہور سوہنی گل ایہہ کیتی گئی پئی جد ماں بولی پڑھان دا قنون منظور ہوجاوے گا تے پھیر ایہہ ساریاں اُتے لاگو ہووے گا جس وچ نجی ادارے وی شامل نیں جس وچ اوہناں نُوں ماں بولی مُڈھی جماعت توں لے کے بارھویں تیک پڑھانی پئے گئی۔

ایس کمیٹی دی اک ہور چنگی گل پشور شہر وچ ہندکو تے پشتو لاون دی اے۔ پشور شہر پہلاں ہندکو بولن آلیاں دا شہر سی جد کے ایہدے پنڈاں تے آل دوالے وچ پشتو بولی جاندی سی۔ ہن پشور نُوں شہر تے پنڈ وچ ونڈن دی صلاح بنائی گئی اے تاں جو ماں بولی نُوں صیح پکھوں لاگو کیتا جا سکے۔

خیبر پختون خواہ نے صوبے دیاں ساریاں بولیاں نُوں لا کے ہن اوہناں سبھ دے مونہہ بھن دتے نیں پئی تُسیں پنجابی چاہندے اوہ تے کجھ سرائیکی چاہندے نیں تے ایس طرحاں گل ہمیش اگانہہ پا دتی جاندی سی ہن ایہہ پج وی مُک گیا اے ہن صوبے وچ سرائیکی ہندکو/ پھوٹھواری تے پنجابی لا کے سارا جھیڑا مُکایا جاسکد اے۔

آؤن آلے ویلے وچ جوں جوں حقاں دی گل ودھنی اے تے پرانی سیاست دی بُرج اُلٹنے نیں لوک حقاں دی گل نال بولی تے لوک رہتل دی گل وی ودھنی اے پر دُکھ دی گل اے سبھ توں ودھ پڑھے لکھے صوبے دے حاکم یاں تاں ایس گل تُوں اُکا بے سُرتے نیں یاں پھیر اُنج ای کھیس وٹی بیٹھے نیں۔ پر ایس نویں سیاست وچ کیہ بچنا اے تے کیہ نہیں بچنا ایس دا اجے ایہناں نُوں کوئی خیال نہیں۔ پر اک گل صاف اے پئی ہن ریاست دی پرانی بنتر نہیں چلنی تے نویں وچاردھارا آونی اے تے کجھ شکلاں تاں ویکھن آلیاں نیں ویکھ لئیاں نیں دیس دی پرانی وچار دھارا ایس نوں بوہتا نہیں ٹھل سکدی۔

ساڈی عرضوئی اج دے پنجاب دے حاکماں لئی ایہو اے پئی ویلے دے ویہن نُوں سیہانن تے جگت نال تُرن جد سارا جگ ایہہ گل منی بیٹھا اے پئی بال دا حق اوہدی ماں بولی اے تاں تُساں جگ نال کیوں لڑدے اوہ، سچ دا راہ کیوں ڈکدے اوہ۔ نہیں تاں آوندا ویلا تہانوں اِنج ای ڈھاڈھیری کردیوے گا جیویں ایوب، ضیا تے ہور ہوئے نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels