Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> میری بولی میری پچھان

میری بولی میری پچھان

شیبا چیمہ
July 19th, 2010
5 / 5 (2 Votes)

میں کدے کدے سوچدی آں کہ کِسے ہور ذات دا بندہ تے بھانویں لکھنو دا بھئیا بن جاوے پر پنجاب دا اک جٹ تے اوہ وی چیمہ کدے بھئیا نہیں بن سکدا۔ مینوں دور جان دی لوڑ نہیں اے۔ اوہ جٹ تے چیمہ میں آپ ہاں تے میرے توں ودھ کون جاندا اے ۔ میرے نانکے دادکے دویں جٹ نیں۔ نانکے میرے بھلر نیں تے دادکے میرے چیمے نیں۔ نانکے میرے لاہور دے رہن والے سن 1847 وچ جد انگریز آئے تے ساڈے وڈکے لاہور چھڈ کے امرتسر چلے گئے سن تے اوتھے کٹڑا رائے سنت سنگھ وچ رہن لگ پئے ایہہ علاقہ اوس ویلے بوہت ماڈرن سی تے اوس ویلے دے سارے لیڈر ایتھے ای رہندے سن۔ ڈاکٹر سیف الدین کچلو کانگرس دا پردھان سی دیوان چند جنتا پارٹی دا پردھان سی تے علامہ مشرقی خاکسار تحریک دا پردھان ۔ میرے نانکے اوتھے سو سال رہے 1947 تک میرے نانا جی دے ایتھے حُجرے سن جو چوہدری حجرے کہاؤندے سن ۔ پاکستان بنن دے مگروں ایہہ سبھ لاہور آکے وس گئے۔

دادکے میرے ہندوستان دے رہن والے سن تے جدوں پاکستان بنیا تے ساڈا پریوار ونڈیا گیا جو مسلمان سن اوہ پاکستان آ گئے جو سکھ سن اوہ اوتھے ای رہے پر دادا جی میرے سیالکوٹ دے رہن والے سن۔ ساڈیاں فیصل آباد وچ بڑیاں زمیناں سن پر ساڈے پر دادا جی دیاں بھیناں تے بھراواں دیاں اولاداں حالے وی ہندوستان وچ ای رہندیاں نیں۔ پردادا جی نوں واہی بیجی دا شوق تے ہے ای سی پر اوہدے نال اوہناں آپنے پتراں نوں پڑھایا لکھایا وی۔
اِک پتر آپنے بال بچیاں نال ہندوستان وچ رہندا سی تے چھوٹا پترحال گھڑی دے پاکستان وچ آپنے پیو نال رہندا سی اوہ سارے سیالکوٹ دے اک پنڈ واسن وچ رہندے سن۔ ساڈے دادا جی گورنمنٹ کالج توں بی اے کیتا تے اوتھوں اوہناں نوں پنجابی شاعری دا شوق لگا اوہناں دیاں کئی لکھتاں اسیں اوہناں دی زندگی دے بعد پڑھیاں۔ ساڈے پردادا جی آپنے پوترے دے نال زمیناں ول سیالکوٹ جا رہے سن کہ راہ وچ اک حادثہ ہویا تے ساڈے پڑدادا جی اوتھے ای فوت ہو گئے تے دو دناں بعد اوہناں دے پوتے دا وی زندگی نے ساتھ چھڈ دتا۔ ایس طرحاں اسیں سیالکوٹ چھڈ کے پکے فیصل آباد آگئے۔ ویلا لنگھ جاندا اے تے کئی نویں چہرے دنیا وچ آ جاندے نیں پر ساتھ نہیں بن دے صرف جاناں دے وادھے ہوندے نیں۔ تُر گئے ہمیشہ چیتے آؤندے رہندے نیں ایہہ ای وجہ سی کہ دادے نے اپنا دل گانواں مجھاں وچ لا لیا نال سیاست وچ وی حصہ لین لگ پئے۔ اوہ دن ویلے سیاست کردے تے شام نوں شاعری۔

دادا جی نوں سبھ بال بہت پیار کردے سن اوس زمانے وچ میرے پیو میرے چاچے تے میریاں پھپھیاں وی بی اے کیتا ہویا سی۔ ساڈے گھر وچوں سبھ سیاست وچ سن پر ناں ساڈے چاچے ای کمایا تے اوہ حالے تک سیاست وچ نیں۔ ساڈے وڈیاں نے دسیا سی کہ ساڈی قوم چیمے جٹ نیں جو کابل دی گوت نیں۔ اوہناں دا کہنا سی کہ جد غوری نیں رائے تنورا نوں شکست دتی تے 25 پیڑھیاں کابل دی جد وچوں اک چوہان راجپوت جان بچا کے دلی توں نسیا ایہہ پہلے کانگڑہ تے فیر امرتسر گیا جتھے اوہدے پتر چھوٹو لال نے علاؤالدین خلجی دے زمانے وچ دریا بیاس دے کنڈھے اک پنڈ آباد کیتا اوہدے پُتر دا ناں رانا کنگ سی۔ اوہنوں رب نے اٹھ پُتر دتے اوہناں وچوں سبھ توں چھوٹا پُتر ڈھول سی۔ ایہہ ڈھول ای چیمیاں دا وڈکا سی ۔ دُگل، موہتل، ناگرہ تے چیمہ۔ بزرگاں ایہہ وی دسیا کہ چیمہ قوم طاقت ور تے اک مُٹھ قوم اے ایس قوم چوں بہت ساریاں اورنگ زیب دے ڈنڈے دے زمانے وچ اسلام قبول کیتا۔ پا کستان وچ چیمیاں دے بہتے پنڈ گجرانوالا تے سیالکوٹ وچ آباد نیں۔

ساڈے گھر وچ ہمیشہ چیمیاں دی وڈیائی تے بہادری دیاں گلاں کیتیاں جاندیاں سن تے مان کیتا جاندا سی کہ چیمے پنجاب دی شان نیں۔ پر سوادی گل ایہہ ہے کہ ایسے گھر وچ سانوں پنجابی بولن دی اجازت نہیں سی تے سانوں سختی نال اردو بولن لئی کہیا جاندا سی۔ مینوں یاد ہے کہ مینوں اک انگریزی سکول وچ پڑھنے پایا گیا اس سکول وچ جد وی کوئی پنجابی بولدا سی تے اوہنوں سزا دتی جاندی سی۔ میں ایہہ سارے سال کسے کُڑی نوں آپنے سکول وچ پنجابی بولدیاں نہیں سی دیکھیا۔ پہلی واری میں کسے کڑی نوں اودوں پنجابی بولدیاں دیکھیا جد میں کالج داخل ہوئی گئی۔ ایتھے کئی کڑیاں پنڈاں دیاں سن جو پنجابی بولدیاں سن تے اوہناں دی بولی تے ٹھٹھے مخول مینوں سمجھ نہیں لگدے سن۔ ایہہ دیکھ کے میرا بڑا دل کردا سی کہ مینوں اوہناں دی گل سمجھ لگے۔ ایس مقصد لئی میں اک اجیہی کڑی نال دوستی لا لئی جو پنڈوں آئی سی تے پنجابی بولدی سی۔ میں اوہدے کولوں بہت سکھیا۔ پر دکھ دی گل ایہہ سی کہ میں نا تے آپنی ایس سہیلی نوں آپنے گھر لے جا سکدی ساں تے نا ای آپنے گھر والیاں نوں اوہدے بارے دس سکدی ساں اوہدی وجہ پنجابی بولی سی۔ میں ڈردی ساں کہ جے میرے گھر والیاں نوں پتہ لگ گیا کہ اوہ پنجابن اے تاں میرے گھر والے خورے میرا کیہ حشر کرن گے۔

میں جد باراں جماعتاں پاس کرکے بی اے وچ داخل ہوئی تے مینوں پتہ لگا کہ بی اے وچ بندہ پنجابی دا مضمون پڑھ سکدا اے میں آپنی اس سہیلی نال رل کے پنجابی دا مضمون رکھ لیا تے مینوں انج لگا جیویں مینوں میری گواچی روح لبھ گئی ہووے۔ پنجابی شہد ورگی مٹھی بولی اے ایتھے ای میں آپنے کالج دے رسالے لئی پہلی پنجابی غزل لکھی جو اج وی مینوں یاد اے۔ میری پروفیسر نوں میری ایہہ غزل بہت پسند آئی تے اوہنے مینوں شاباش دتی تے میرا حوصلہ ودھایا تے مینوں انج لگا جیویں مینوں میرے اُتے دھکے نال سوار کیتے اردو والے بھئیے توں آزادی مل گئی ہووے تے میں اک جٹ پنجابن بن گئی ہوواں پر میرے گھر والیاں نوں ایس گل دا پتہ نہیں سی۔ میں آپنے گھر آؤن والیاں سہیلیاں نوں سختی نال ہٹکیا ہویا سی کہ اوہ میرے گھر میرے پنجابی پڑھن تے پنجابی وچ لکھی میری غزل دی گل نا کرن۔

اک دن میں آپنے کالج دا رسالہ پڑھدی پئی ساں جے میرے ابا جی میتھوں ایہہ رسالہ لے کے پڑھن لگ پئے جد اوہناں دی نظر چوں میری پنجابی غزل گزری تے اوہناں نوں یقین نا آیا کہ ایہہ میری لکھی سی اوس دن مینوں لگا کہ میں کُجھ صحیح لکھیا اے۔ میرے ابا جی مینوں کہیا : '' جو کم وی کرو حوصلے تے ہمت نال کرو کدیں نا کدیں تسیں کامیاب ہو جاؤ گے''۔

اج میرے ابا جی ایس دُنیا وچ نہیں نے پر اوہناں دی گل انج لگدی اے جیویں کہ اوہ جاندے سن کہ انسان دی پچھان اوہدی بولی ہوندی اے تے اوہ اک طرحاں مینوں پنجابی بنن دی ہمت تے حوصلہ دے گئے ۔ اج مینوں مان اے کہ میں پنجابی آں تے پنجاب دے دل لاہور وچ رہند ی ہاں۔
میری سارے پنجابی بھین تے بھراواں اگے بینتی(عرض) اے کہ تسیں بھانویں پنجاب وچ رہو یاں امریکہ وچ۔ جد تسیں آپنی اولاد نوں ہور چیزاں سکھاؤندے او تے اوہناں نوں اوہناں دی ماں بولی وی ضرور سکھاؤ۔ ایہہ ساڈا دیس تے پچھان اے اسیں سو بندیاں وچ آپنی پچھان آپنی بولی راہیں کراؤندے ہاں ۔ پنجاب وچ پنج دریا وگدے نیں۔ بھانویں تسیں جتھے وی جا وسو ایہناں دریاواں دے پنجابی گیت ہر پاسے گونجدے نیں۔ ایہہ پنج دریا ہتھ دیاں انگلاں وانگوں نیں ایہہ انگلیاں جدوں وی اکٹھیاں کرو اک مُٹھ بن جان گیاں جیویں چیمے اکٹھے ہوندے نیں تے اوہناں دی پچھان پنجابی اے۔


Share |


 

Depacco.com


 

 

Visitors Comments

Name:TARIQ GUJJAR
Date:20th July

Comment: Boht aala...sohna likhia...rawaan,asar bharia...te moh rangia


Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels